𑌸𑌂𑌸𑍍𑌕𑍃𑌤𑌾𑌤𑍍 𑌇𑌤𑌰𑌾𑌃 𑌭𑌾𑌷𑌾𑌃 𑌅𑌨𑍀𑌚𑌾𑌃

Sun, 14 Feb, 2010•ambarish•sanskrit, dravidian languages

𑌲𑍇𑌖𑍇𑌷𑍁 𑌸𑌂𑌸𑍍𑌕𑍃𑌤𑌾𑌦𑌿𑌤𑌰𑌾 𑌭𑌾𑌰𑌤𑍀𑌯𑌭𑌾𑌷𑌾𑌃 𑌪𑍍𑌰𑌾𑌦𑍇𑌶𑌿𑌕𑌭𑌾𑌷𑌾𑌃 𑌪𑍍𑌰𑌾𑌨𑍍𑌤𑍀𑌯𑌭𑌾𑌷𑌾𑌃 𑌇𑌤𑍍𑌯𑌭𑌿𑌧𑍀𑌯𑌨𑍍𑌤𑍇 । 𑌇𑌤𑍍𑌥𑌂𑌪𑍍𑌰𑌯𑍋𑌗𑍇𑌣 𑌲𑍇𑌖𑌕𑌸𑍍𑌯𑍋𑌦𑍍𑌦𑍇𑌶𑌾𑌸𑍍𑌤𑍍𑌰𑌯𑍋 𑌭𑌾𑌸𑌨𑍍𑌤𑍇 । 𑌪𑍍𑌰𑌥𑌮𑍋 𑌯𑌤𑍍 𑌸𑌂𑌸𑍍𑌕𑍃𑌤𑌭𑌾𑌷𑌾 𑌭𑌾𑌰𑌤𑍀𑌯𑌾𑌨𑌾𑌂 𑌭𑌾𑌰𑌤𑌦𑍇𑌶𑌸𑍍𑌯 𑌚 𑌰𑌾𑌷𑍍𑌟𑍍𑌰𑌭𑌾𑌷𑌾 𑌪𑍂𑌰𑍍𑌵𑌮𑌾𑌸𑍀𑌤𑍍 𑌸𑌾𑌮𑍍𑌪𑍍𑌰𑌤𑌂 𑌵𑌰𑍍𑌤𑌤𑍇 𑌶𑍍𑌵𑍋 𑌵𑌾 𑌭𑌵𑍇𑌤𑍍 । 𑌅𑌨𑍍𑌯 𑌉𑌦𑍍𑌦𑍇𑌶𑌃 𑌸𑌂𑌸𑍍𑌕𑍃𑌤𑌾𑌦𑍍 𑌇𑌤𑌰𑌾𑌸𑌾𑌂 𑌭𑌾𑌷𑌾𑌣𑌾𑌮𑍍 𑌅𑌧𑌿𑌕𑌾𑌰𑌃 𑌸𑍍𑌵𑌸𑍍𑌵𑌪𑍍𑌰𑌦𑍇𑌶𑍇𑌷𑍍𑌵𑍇𑌵𑍇𑌤𑌿 । 𑌤𑍃𑌤𑍀𑌯 𑌉𑌦𑍍𑌦𑍇𑌶𑌾𑌸𑍍𑌤𑍁 𑌉𑌕𑍍𑌤𑌾𑌭𑍍𑌯𑌾𑌂 𑌕𑌾𑌰𑌣𑌾𑌭𑍍𑌯𑌾𑌂 𑌸𑌂𑌸𑍍𑌕𑍃𑌤𑌭𑌾𑌷𑌾 𑌭𑌾𑌰𑌤𑍀𑌯𑌭𑌾𑌷𑌾𑌸𑍁 𑌸𑌰𑍍𑌵𑌪𑍍𑌰𑌥𑌮𑌾 𑌚𑍇𑌤𑌿 ।

𑌪𑌰𑌨𑍍𑌤𑍁 𑌯𑌦𑍍𑌯𑌪𑌿 𑌵𑌿𑌭𑌿𑌨𑍍𑌨𑍇𑌷𑍁 𑌕𑌾𑌲𑍇𑌷𑍁 𑌬𑌹𑍁𑌤𑍍𑌰 𑌸𑌂𑌸𑍍𑌕𑍃𑌤𑌂 𑌭𑌾𑌷𑌿𑌤𑌭𑌾𑌷𑌾 𑌸𑍍𑌯𑌾𑌤𑍍 । 𑌨 𑌕𑌦𑌾𑌚𑌨 𑌆𑌭𑌾𑌰𑌤𑌵𑌰𑍍𑌷𑌂 𑌤𑌸𑍍𑌯 𑌪𑍍𑌰𑌯𑍁𑌕𑍍𑌤𑌿𑌃 । 𑌬𑌹𑍁𑌤𑍍𑌰 𑌸𑌂𑌸𑍍𑌕𑍃𑌤𑌾𑌦𑌾𑌗𑌤𑌾𑌃 𑌪𑌾𑌲𑍀𑌮𑌹𑌾𑌰𑌾𑌷𑍍𑌟𑍍𑌰𑍀𑌯𑌵𑍍𑌰𑌜𑌾𑌦𑌯𑌃 𑌪𑍍𑌰𑌾𑌕𑍃𑌤𑌾𑌃 𑌪𑍍𑌰𑌯𑍁𑌕𑍍𑌤𑌾𑌃 । 𑌭𑌾𑌰𑌤𑌨𑍍𑌨𑌾𑌮 𑌕𑌿𑌮𑌿𑌤𑌿 𑌲𑌕𑍍𑌷𑍍𑌯𑌮𑌾𑌣𑍇 𑌵𑍇𑌦𑌪𑍁𑌰𑌾𑌣𑌾𑌗𑌮𑌶𑌾𑌸𑍍𑌤𑍍𑌰𑌾𑌦𑌿𑌕𑌂 𑌸𑌂𑌸𑍍𑌕𑍃𑌤𑌭𑌾𑌷𑌾 𑌚 𑌯𑌤𑍍𑌰 𑌵𑌿𑌰𑌾𑌜𑍇𑌤𑍇 𑌇𑌤𑍍𑌯𑌭𑌿𑌜𑍍𑌞𑌾𑌯𑍇𑌤 । 𑌤𑌦𑍍𑌦𑍃𑌷𑍍𑌟𑍍𑌯𑌾 𑌇𑌦𑌾𑌨𑍀𑌨𑍍𑌤𑌨𑌂 𑌕𑌾𑌮𑍍𑌭𑍋𑌜𑌾𑌦𑌿𑌕𑌮𑍍 𑌅𑌪𑌿 𑌪𑍁𑌰𑌾 𑌭𑌾𑌰𑌤𑌮𑌿𑌤𑌿 𑌲𑌕𑍍𑌷𑌯𑌿𑌤𑍁𑌂 𑌪𑌾𑌰𑌯𑌾𑌮𑌃 । 𑌅𑌦𑍍𑌯𑌤𑌨𑌾 𑌆𑌨𑍍𑌧𑍍𑌰𑌦𑍍𑌰𑌮𑌿𑌡𑌕𑌰𑍍𑌣𑌾𑌟𑌕𑌾𑌦𑌯𑌃 𑌚𑌿𑌰𑌕𑌾𑌲𑌾𑌯 𑌭𑌾𑌰𑌤𑌸𑍍𑌯 𑌭𑌾𑌗𑌾 𑌵𑌿𑌦𑍍𑌯𑌨𑍍𑌤𑍇 । 𑌕𑌿𑌨𑍍𑌤𑍁 𑌤𑌤𑍍𑌰𑌤𑍍𑌯𑌾𑌨𑌾𑌂 𑌮𑌾𑌤𑍃𑌭𑌾𑌷𑌾𑌣𑌾𑌮𑌨𑍍𑌵𑌯𑌃 𑌸𑌂𑌸𑍍𑌕𑍃𑌤𑌾𑌦𑌨𑍍𑌯 𑌇𑌤𑍍𑌯𑌵𑍇𑌮𑌃 ।

𑌅𑌥𑌾𑌨𑍍𑌯𑌭𑌾𑌷𑌾𑌣𑌾𑌮𑌧𑌿𑌕𑌾𑌰𑌃 𑌸𑍍𑌵𑌪𑍍𑌰𑌦𑍇𑌷𑍍𑌵𑍇𑌵𑍋𑌤 𑌨𑍇𑌤𑌿 । 𑌐𑌤𑌿𑌹𑌾𑌸𑌿𑌕𑌭𑌾𑌷𑌾𑌶𑌾𑌸𑍍𑌤𑍍𑌰𑍇 𑌨𑌿𑌪𑍁𑌣𑌾 𑌮𑌨𑍍𑌵𑌤𑍇 𑌯𑌤𑍍 𑌪𑍍𑌰𑌥𑌮𑌦𑍍𑌰𑌾𑌮𑌿𑌡𑌭𑌾𑌷𑌯𑌾 𑌕𑌯𑌾𑌚𑌿𑌦𑍇𑌵 𑌦𑌾𑌕𑍍𑌷𑌿𑌣𑌾𑌤𑍍𑌯𑍇 𑌪𑍁𑌰𑌾 𑌵𑍍𑌯𑌾𑌹𑍍𑌰𑌿𑌯𑌤𑍇 𑌸𑍍𑌮 𑌤𑌸𑍍𑌯𑌾𑌶𑍍𑌚𑌚𑍍𑌛𑌾𑌯𑌾 𑌸𑌂𑌸𑍍𑌕𑍃𑌤𑌮𑌪𑌿 𑌪𑌤𑌿𑌤𑌾 । 𑌮𑍀𑌨𑌕𑍁𑌟𑍁𑌮𑍍𑌬𑌨𑍀𑌰𑌾𑌦𑌿𑌶𑌬𑍍𑌦𑌾𑌃 𑌪𑍍𑌰𑌥𑌮𑌦𑍍𑌰𑌾𑌮𑌿𑌡𑌾𑌤𑍍 𑌸𑌙𑍍𑌗𑍃𑌹𑍀𑌤𑌾 𑌇𑌤𑌿 𑌸𑍍𑌪𑌷𑍍𑌟𑌂 𑌯𑌤𑍋 𑌦𑍍𑌰𑌾𑌮𑌿𑌡𑌭𑌾𑌷𑌾𑌸𑍁 𑌤𑌚𑍍𑌛𑌬𑍍𑌦𑍈𑌃 𑌸𑌮𑍍𑌬𑌦𑍍𑌧𑌾𑌨𑍀𑌤𑌰𑌾𑌣𑌿 𑌪𑌦𑌾𑌨𑍍𑌯𑌪𑌿 𑌪𑍍𑌰𑌯𑍁𑌜𑍍𑌯𑌨𑍍𑌤𑍇 𑌯𑍇𑌷𑌾𑌂 𑌵𑍍𑌯𑌵𑌹𑌾𑌰𑌃 𑌸𑌂𑌸𑍍𑌕𑍃𑌤𑍇 𑌨𑌾𑌸𑍍𑌤𑌿 । 𑌪𑍁𑌨𑌶𑍍𑌚 𑌦𑍍𑌰𑌾𑌮𑌿𑌡𑌭𑌾𑌷𑌾𑌸𑍁 𑌕𑌤𑌿𑌪𑌯𑌾𑌸𑍁 𑌦𑌨𑍍𑌤𑍍𑌯𑌾𑌕𑍍𑌷𑌰𑌾𑌣𑌿 𑌮𑍂𑌰𑍍𑌧𑌨𑍍𑌯𑌾𑌕𑍍𑌷𑌰𑌾𑌣𑌿 𑌵𑌿𑌹𑌾𑌯 𑌵𑌾𑌯𑍁𑌕𑍋𑌶𑍀𑌯𑌾𑌕𑍍𑌷𑌰𑌾𑌣𑍍𑌯𑌪𑌿 𑌪𑍍𑌰𑌸𑌿𑌦𑍍𑌧𑌾𑌨𑌿 । 𑌸𑌂𑌸𑍍𑌕𑍃𑌤𑌸𑌮𑍍𑌬𑌦𑍍𑌧𑍇𑌷𑍁 𑌭𑌾𑌷𑌾𑌨𑍍𑌤𑌰𑍇𑌷𑍁 𑌯𑌵𑌨𑌾𑌦𑌿𑌷𑍁 𑌮𑍂𑌰𑍍𑌧𑌨𑍍𑌯𑌾𑌕𑍍𑌷𑌰𑌾𑌣𑌾𑌮𑌪𑍍𑌯𑌭𑌾𑌵𑌾𑌤𑍍 𑌤𑌾𑌨𑌿 𑌮𑍂𑌰𑍍𑌧𑌨𑍍𑌯𑌾𑌕𑍍𑌷𑌰𑌾𑌣𑌿 𑌨𑌨𑍁 𑌦𑍍𑌰𑌾𑌮𑌿𑌡𑌭𑌾𑌷𑌾𑌭𑍍𑌯𑌃 𑌸𑌂𑌸𑍍𑌕𑍃𑌤𑌂 𑌪𑍍𑌰𑌵𑌿𑌷𑍍𑌟𑌾𑌨𑌿 𑌸𑍍𑌯𑍁𑌃 । 𑌦𑍍𑌰𑌾𑌮𑌿𑌡𑌭𑌾𑌷𑌾𑌣𑌾𑌮𑌧𑌿𑌕𑌾𑌰 𑌆𑌭𑌾𑌰𑌤𑌮𑌥𑌵𑌾 𑌨𑍍𑌯𑍂𑌨𑌾𑌤𑌿𑌨𑍍𑌯𑍂𑌨𑌮𑌾𑌦𑌾𑌕𑍍𑌷𑌿𑌣𑌾𑌤𑍍𑌯𑌂 𑌵𑌰𑍍𑌤𑌤𑍇 𑌇𑌤𑌿 𑌸𑌾𑌰𑌃 ।

𑌅𑌥 𑌸𑌂𑌸𑍍𑌕𑍃𑌤𑌸𑍍𑌯 𑌪𑍍𑌰𑌾𑌥𑌮𑌿𑌕𑌤𑍍𑌵𑌵𑌾𑌦𑌃 । 𑌭𑌾𑌰𑌤𑍀𑌯𑌭𑌾𑌷𑌾𑌣𑌾𑌂 𑌸𑌂𑌸𑍍𑌕𑍃𑌤𑌂 𑌤𑌤𑍍𑌸𑌾𑌹𑌿𑌤𑍍𑌯𑌪𑌰𑌮𑍍𑌪𑌰𑌾 𑌚 𑌪𑍍𑌰𑌾𑌚𑍀𑌨𑌤𑌮𑍇 𑌇𑌤𑍍𑌯𑌤𑍍𑌰 𑌨𑌾𑌕𑍍𑌷𑍇𑌪𑌣𑌂 𑌭𑌵𑌿𑌤𑍁𑌮𑌰𑍍𑌹𑌤𑌿 । 𑌕𑌿𑌨𑍍𑌤𑍁 𑌪𑍍𑌰𑌾𑌚𑍀𑌨𑌤𑌾 𑌏𑌕𑌮𑌾𑌤𑍍𑌰𑌮𑌾𑌨𑍀𑌤𑌿 𑌨 । 𑌪𑍍𑌰𑌤𑍍𑌯𑍇𑌕𑌂 𑌦𑍃𑌷𑍍𑌟𑍍𑌯𑌾 𑌭𑌿𑌨𑍍𑌨𑌾 𑌭𑌾𑌷𑌾 𑌵𑌰𑍀𑌯𑌸𑍍𑌯𑌃 । 𑌈𑌦𑍃𑌶𑍋 𑌵𑌾𑌦𑌾 𑌨 𑌜𑌨𑌾𑌨𑌾𑌮𑍈𑌕𑍍𑌯𑌪𑍋𑌷𑌣𑌾𑌯 𑌨 𑌵𑌾 𑌪𑌰𑌸𑍍𑌪𑌰𑌮𑌈𑌤𑍍𑌰𑍀𑌸𑌂𑌵𑍃𑌦𑍍𑌧𑌯𑍇 𑌪𑍍𑌰𑌤𑍍𑌯𑍁𑌤 𑌪𑌰𑌸𑍍𑌪𑌰𑌵𑌿𑌰𑍋𑌧𑌾𑌯 𑌕𑌲𑍍𑌪𑌨𑍍𑌤𑍇 । 𑌸𑌂𑌸𑍍𑌕𑍃𑌤𑌮𑌾𑌧𑍍𑌯𑌮𑍇𑌨 𑌵𑌸𑍁𑌧𑌾𑌯𑌾 𑌐𑌕𑍍𑌯𑌂 𑌲𑌕𑍍𑌷𑌿𑌤𑌂 𑌚𑍇𑌦𑍍𑌭𑌾𑌷𑌾𑌨𑍍𑌤𑌰𑌾𑌣𑌿 𑌨𑌾𑌵𑌮𑌨𑍍𑌯𑍇𑌰𑌨𑍍 ।