𑌸𑌂𑌸𑍍𑌕𑍃𑌤𑍋𑌚𑍍𑌚𑌾𑌰𑌣𑌮𑍍

Thu, 21 Oct, 2010•ambarish•sanskrit

𑌶𑍍𑌰𑌵𑌣𑌵𑌚𑌨𑌯𑍋𑌃 𑌸𑌾𑌧𑌨𑌰𑍂𑌪𑍇𑌣 𑌶𑌬𑍍𑌦𑍇𑌨 𑌅𑌰𑍍𑌥𑌪𑍍𑌰𑌤𑌿𑌪𑌤𑍍𑌤𑌿𑌰𑌿𑌤𑌿 𑌸𑌾𑌮𑌾𑌨𑍍𑌯 𑌆𑌚𑌾𑌰𑌃 । 𑌸𑌂𑌸𑍍𑌕𑍃𑌤𑌸𑍍𑌯 𑌵𑌿𑌶𑍇𑌷𑌤𑌯𑌾 𑌶𑌬𑍍𑌦𑌃 𑌪𑍍𑌰𑌧𑌾𑌨𑌾𑌂𑌶𑌃 𑌯𑌤𑌃 𑌶𑌬𑍍𑌦𑌪𑌰𑌮𑍍𑌪𑌰𑌯𑍈𑌵 𑌵𑍇𑌦𑌪𑍁𑌰𑌾𑌣𑌾𑌦𑍀𑌨𑌿 𑌅𑌧𑍍𑌯𑌾𑌪𑍍𑌯𑌨𑍍𑌤𑍇 𑌸𑍍𑌮 ।

𑌬𑍍𑌰𑌾𑌹𑍍𑌮𑍀 𑌤𑍁 𑌭𑌾𑌰𑌤𑍀 𑌭𑌾𑌷𑌾 𑌗𑍀𑌰𑍍𑌵𑌾𑌗𑍍𑌵𑌾𑌣𑍀 𑌸𑌰𑌸𑍍𑌵𑌤𑍀 ।
𑌵𑍍𑌯𑌾𑌹𑌾𑌰 𑌉𑌕𑍍𑌤𑌿𑌰𑍍𑌲𑌪𑌿𑌤𑌂 𑌭𑌾𑌷𑌿𑌤𑌂 𑌵𑌚𑌨𑌂 𑌵𑌚𑌃 ॥

𑌅𑌮𑌰𑍋𑌕𑍍𑌤𑍍𑌯𑌾𑌮𑌸𑍍𑌯𑌾𑌂 𑌭𑌾𑌷𑌾𑌯𑌾𑌃 𑌪𑌰𑍍𑌯𑌾𑌯𑌪𑌦𑌾𑌨𑌿 𑌨𑍈𑌕𑌾𑌨𑌿 𑌵𑌾𑌚𑌂 𑌹𑌿 𑌸𑍂𑌚𑌯𑌨𑍍𑌤𑌿 𑌇𑌤𑍍𑌯𑌤𑌃 𑌶𑌬𑍍𑌦𑌸𑍍𑌯 𑌪𑍍𑌰𑌾𑌧𑌾𑌨𑍍𑌯𑌂 𑌸𑍍𑌪𑌷𑍍𑌟𑌂 𑌵𑌿𑌜𑍍𑌞𑌾𑌯𑌤𑍇 । 𑌵𑍇𑌦𑌪𑌾𑌠𑍇 𑌸𑌮𑍍𑌭𑌾𑌷𑌣𑍇 𑌵𑌾 𑌶𑌬𑍍𑌦𑍇 𑌦𑍁𑌰𑍁𑌚𑍍𑌚𑌾𑌰𑍍𑌯𑌮𑌾𑌣𑍇 𑌵𑌿𑌪𑌰𑍀𑌤𑌾𑌰𑍍𑌥𑌃 𑌭𑍍𑌰𑌮𑌃 𑌦𑍁𑌷𑍍𑌪𑌰𑌿𑌣𑌾𑌮𑌾𑌃 𑌵𑌾 𑌫𑌲𑌿𑌤𑌾 𑌭𑌵𑌨𑍍𑌤𑌿 ।

𑌅𑌥 𑌉𑌚𑍍𑌚𑌾𑌰𑌣𑍇 𑌶𑌙𑍍𑌕𑌾𑌃 𑌸𑌮𑌾𑌧𑌾𑌤𑍁𑌂 𑌪𑍍𑌰𑌮𑌾𑌦𑌦𑍋𑌷𑌾𑌨𑍍 𑌨𑌿𑌵𑌾𑌰𑌯𑌿𑌤𑍁𑌂 𑌪𑍍𑌰𑌯𑌤𑍍𑌨𑍋𑌯𑌂 𑌕𑍍𑌰𑌿𑌯𑌤𑍇 । 𑌅𑌪𑌿 𑌭𑌾𑌰𑌤𑌵𑌰𑍍𑌷𑍇 𑌪𑌾𑌲𑌿𑌤𑌾 𑌸𑌾 𑌵𑌿𑌶𑍍𑌵𑌵𑌾𑌣𑍀𑌤𑌿 𑌮𑌨𑌸𑌿 𑌨𑌿𑌧𑌾𑌯 𑌏𑌕𑍈𑌕𑌸𑍍𑌯 𑌇𑌤𑌰𑌭𑌾𑌷𑌿𑌣𑌃 𑌵𑌿𑌶𑍇𑌷𑌕𑍍𑌲𑍇𑌶𑌾 𑌆𑌲𑍋𑌚𑍍𑌯𑌨𑍍𑌤𑍇 ।

𑌪𑍍𑌰𑌯𑌤𑍍𑌨𑍋𑌯𑌂 𑌨 𑌮𑍇 𑌶𑌿𑌕𑍍𑌷𑌾𑌨𑍈𑌪𑍁𑌣𑍍𑌯𑌾𑌤𑍍 𑌕𑍃𑌤𑌃 𑌨 𑌵𑌾 𑌵𑌾𑌕𑍍𑌶𑍁𑌦𑍍𑌧𑌤𑌯𑌾 𑌪𑍍𑌰𑌤𑍍𑌯𑍁𑌤 𑌪𑍂𑌰𑍍𑌵𑌾𑌚𑌾𑌰𑍍𑌯𑌾𑌣𑌾𑌂 𑌵𑌚𑌨𑌮𑍌𑌕𑍍𑌤𑌿𑌕𑌾𑌨𑌾𑌮𑍍 𑌆𑌧𑌾𑌰𑍇𑌣 । 𑌮𑌤𑌮𑌿𑌦𑌂 𑌶𑍃𑌣𑍍𑌵𑌦𑍍𑌭𑌿𑌃 𑌦𑍋𑌷𑌾𑌨𑍍 𑌉𑌪𑍇𑌕𑍍𑌷𑌮𑌾𑌣𑍈𑌃 𑌗𑍁𑌣𑌮𑌾𑌤𑍍𑌰𑌂 𑌗𑍃𑌹𑍍𑌣𑌦𑍍𑌭𑌿𑌃 𑌪𑍍𑌰𑌤𑌿𑌸𑍍𑌪𑌨𑍍𑌦𑌨𑌾𑌨𑍁𑌗𑍍𑌰𑌹𑌃 𑌦𑍀𑌯𑌤𑌾𑌮𑍍 𑌇𑌤𑌿 𑌸𑌵𑌿𑌨𑌯𑌂 𑌪𑍍𑌰𑌾𑌰𑍍𑌥𑌯𑍇 ।¹

𑌸𑌰𑌲𑌤𑌰𑌾𑌃 𑌪𑍍𑌰𑌮𑌾𑌦𑌾𑌃

• 𑌪𑍍𑌰𑌾𑌣𑌭𑍇𑌦𑌾𑌃 । 𑌅𑌕𑍍𑌷𑌰𑌮𑌾𑌲𑌾𑌯𑌾𑌮𑍍 𑌆𑌦𑌿𑌮𑌾𑌨𑌿 𑌪𑌞𑍍𑌚𑌵𑌿𑌂𑌶𑌤𑌿𑌃 𑌸𑍍𑌪𑌰𑍍𑌶𑌾𑌕𑍍𑌷𑌰𑌾𑌣𑌿 𑌪𑍍𑌰𑌤𑍍𑌯𑍇𑌕𑌸𑍍𑌯𑌾𑌮𑍍 𑌆𑌵𑌲𑍍𑌯𑌾𑌂 𑌕𑌖𑍌 𑌗𑌘𑍌 𑌚𑌛𑍌 𑌇𑌤𑍍𑌯𑌾𑌦𑍀𑌨𑌿 𑌪𑍍𑌰𑌾𑌣𑌶𑌕𑍍𑌤𑍍𑌯𑌾 𑌭𑌿𑌦𑍍𑌯𑌨𑍍𑌤𑍇 । 𑌏𑌕𑍈𑌕𑌸𑍍𑌯 𑌯𑍁𑌗𑌲𑌸𑍍𑌯 𑌪𑍍𑌰𑌥𑌮𑌵𑌰𑍍𑌣𑍋𑌲𑍍𑌪𑌪𑍍𑌰𑌾𑌣𑌃 𑌅𑌪𑌰𑌶𑍍𑌚 𑌮𑌹𑌾𑌪𑍍𑌰𑌾𑌣 𑌇𑌤𑍍𑌯𑌭𑌿𑌧𑍀𑌯𑍇𑌤𑍇 । 𑌭𑍇𑌦𑍋𑌯𑌂 𑌸𑌰𑍍𑌵𑍈𑌃 𑌅𑌵𑌧𑍇𑌯𑌃 𑌵𑌿𑌶𑍇𑌷𑌤𑌯𑌾 𑌭𑌾𑌰𑌤𑍀𑌯𑍇𑌷𑍁 𑌦𑍍𑌰𑌾𑌵𑌿𑌡𑍈𑌃 𑌦𑍍𑌰𑌾𑌵𑌿𑌡𑍍𑌯𑌾𑌂 𑌮𑌹𑌾𑌪𑍍𑌰𑌾𑌣𑌾𑌨𑌾𑌮𑍍 𑌅𑌭𑌾𑌵𑌾𑌤𑍍 । 𑌅𑌮𑍇𑌰𑌿𑌕𑌾𑌸𑍍𑌥𑌾𑌯𑌾𑌮𑍍 𑌆𑌙𑍍𑌲𑌭𑌾𑌷𑌾𑌯𑌾𑌂 𑌬𑌹𑍁𑌧𑌾 𑌪𑍍𑌰𑌾𑌣𑌮𑌹𑌤𑍍𑌤𑍍𑌵𑌮𑍍 𑌆𑌚𑌰𑍍𑌯𑌤𑍇 𑌇𑌤𑍍𑌯𑌤𑌃 𑌤𑌯𑌾 𑌵𑌦𑌨𑍍𑌤𑍋𑌪𑌿 𑌅𑌤𑍍𑌰𑌾𑌵𑌧𑌾𑌨𑌂 𑌦𑌦𑍍𑌯𑍁𑌃 ।
• 𑌚𑌜𑍌 । 𑌉𑌭𑍌 𑌤𑌾𑌲𑌵𑍍𑌯𑍌 । 𑌮𑌹𑌾𑌰𑌾𑌷𑍍𑌟𑍍𑌰𑍀𑌯𑌾𑌃 𑌆𑌨𑍍𑌧𑍍𑌰𑌾𑌶𑍍𑌚 𑌸𑌂𑌯𑍁𑌕𑍍𑌤𑌾𑌕𑍍𑌷𑌰𑌾𑌣𑍀𑌵 𑌤𑍍𑌸𑍍𑌯𑌵𑌤𑍍 𑌦𑍍𑌜𑍍𑌯𑌵𑌦𑍍𑌵𑌾 𑌕𑍍𑌵𑌚𑌿𑌤𑍍 𑌉𑌚𑍍𑌚𑌾𑌰𑌯𑍇𑌯𑍁𑌃 । 𑌤𑌤𑍍𑌤𑍍𑌯𑌾𑌗𑌃 𑌶𑍋𑌭𑌤𑍇 ।
• 𑌶𑌷𑌸𑌾𑌃 । 𑌸𑌕𑌾𑌰𑍋 𑌦𑌨𑍍𑌤𑍍𑌯𑌃 𑌶𑍍𑌰𑍁𑌤𑌪𑍍𑌰𑌾𑌯𑌃² 𑌤𑍍𑌯𑌤𑌃 𑌸𑌰𑍍𑌵𑍇 𑌤𑌂 𑌸𑌮𑍁𑌚𑍍𑌚𑌾𑌰𑌯𑌨𑍍𑌤𑍍𑌯𑍇𑌵 । 𑌶𑌷𑍋𑌃 𑌭𑍍𑌰𑌮𑌸𑍍𑌤𑍁 𑌪𑍍𑌰𑌚𑍁𑌰𑌃 । 𑌨𑌿𑌯𑌮𑌾𑌨𑍁𑌸𑌾𑌰𑌂 𑌷𑌕𑌾𑌰𑍋 𑌮𑍂𑌰𑍍𑌧𑌨𑍍𑌯𑌃 𑌶𑌕𑌾𑌰𑌸𑍍𑌤𑌾𑌲𑌵𑍍𑌯 𑌇𑌤𑌿 । 𑌤𑌰𑍍𑌹𑌿 𑌮𑍂𑌰𑍍𑌧𑌾 𑌤𑌾𑌲𑍁𑌶𑍍𑌚 𑌕𑌾𑌵𑌿𑌤𑍍𑌯𑌵𑍇𑌤𑍍𑌯 𑌭𑍇𑌦𑍋 𑌜𑍍𑌞𑌾𑌤𑍁𑌂 𑌶𑌕𑍍𑌯𑌃 । 𑌅𑌂𑌶𑍋𑌯𑌂 𑌵𑌿𑌕𑌿𑌪𑍀𑌡𑌿𑌯𑌾𑌯𑌾𑌂 𑌸𑌂𑌯𑌗𑍍𑌵𑌿𑌵𑍃𑌤𑌮𑌸𑍍𑌤𑌿³ । 𑌅𑌥𑌵𑌾 𑌮𑌾𑌰𑍍𑌗𑌾𑌨𑍍𑌤𑌰𑌮𑍍 𑌆𑌶𑍍𑌰𑌯𑌣𑍀𑌯𑌮𑍍 । 𑌇𑌤𑌰𑌮𑍂𑌰𑍍𑌧𑌨𑍍𑌯𑌂 𑌟𑌕𑌾𑌰𑌮𑍍 𑌉𑌪𑍇𑌤𑍍𑌯 𑌊𑌷𑍍𑌮𑌾 𑌕𑍍𑌰𑌿𑌯𑌤𑍇 𑌚𑍇𑌤𑍍 𑌷𑌕𑌾𑌰𑌃 𑌸𑌿𑌧𑍍𑌯𑌤𑌿 । 𑌯𑌥𑌾 𑌟𑌷𑍋𑌃 𑌸𑌮𑍍𑌬𑌨𑍍𑌧𑌃 𑌤𑌥𑍈𑌵 𑌚𑌶𑍋𑌰𑌿𑌤𑌿 । 𑌚𑌕𑌾𑌰𑌮𑍍 𑌉𑌪𑍇𑌤𑍍𑌯 𑌊𑌷𑍍𑌮𑌾 𑌵𑌿𑌧𑍀𑌯𑌤𑍇 𑌚𑍇𑌚𑍍𑌛𑌕𑌾𑌰𑌃 𑌸𑌾𑌧𑌿𑌤𑌃 । 𑌸𑍍𑌮𑌰𑍍𑌤𑌵𑍍𑌯𑌂 𑌮𑍂𑌰𑍍𑌧𑌨𑍍𑌯𑌾𑌨𑌾𑌮𑍍 𑌉𑌚𑍍𑌚𑌾𑌰𑌣𑌵𑍈𑌶𑌿𑌷𑍍𑌟𑍍𑌯𑌂 𑌯𑌤𑍍 𑌜𑌿𑌹𑍍𑌵𑌾𑌗𑍍𑌰𑌭𑌾𑌗𑌃 𑌕𑌣𑍍𑌠𑌮𑍍 𑌉𑌦𑍍𑌦𑌿𑌶𑍍𑌯 𑌪𑍍𑌰𑌤𑌿𑌨𑌿𑌵𑌰𑍍𑌤𑌿𑌤𑍋 (retroflex) 𑌭𑌵𑍇𑌤𑍍 ।
• 𑌜𑌯𑍌 । 𑌆𑌰𑍍𑌯𑌵𑌰𑍍𑌤𑍇 𑌏𑌵 𑌭𑍍𑌰𑌾𑌨𑍍𑌤𑌿𑌰𑌿𑌯𑌂 𑌵𑌿𑌰𑌾𑌜𑌤𑍇 । 𑌪𑍍𑌰𑌾𑌕𑍃𑌤𑌾𑌸𑍁 𑌵𑌾𑌕𑍍𑌷𑍁 𑌬𑌹𑍁𑌤𑍍𑌰 𑌯𑌕𑌾𑌰𑌸𑍍𑌯 𑌜𑌕𑌾𑌰𑍋 𑌭𑌵𑌤𑌿 । 𑌯𑌦𑍋𑌰𑍁𑌤𑍍𑌪𑌨𑍍𑌨𑌂 𑌯𑌾𑌦𑌵𑌕𑍁𑌲𑌨𑌾𑌮 𑌜𑌾𑌦𑌵𑍇𑌤𑌿 । 𑌯𑌾 𑌪𑍍𑌰𑌾𑌪𑌣𑍇 𑌜𑌾 𑌇𑌤𑍍𑌯𑌪𑌿 । 𑌯𑌕𑌾𑌰𑌃 𑌅𑌨𑍍𑌤𑌃𑌸𑍍𑌥𑌃 𑌜𑌕𑌾𑌰𑌃 𑌸𑍍𑌪𑌰𑍍𑌶𑌵𑍍𑌯𑌞𑍍𑌜𑌨𑌃 𑌇𑌤𑌿 𑌸𑍍𑌮𑌾𑌰𑍍𑌯𑌮𑍍 ।
• 𑌬𑌵𑍌 । 𑌪𑍍𑌰𑌮𑌾𑌦𑍋𑌯𑌂 𑌭𑌾𑌰𑌤𑌸𑍍𑌯 𑌪𑍂𑌰𑍍𑌵𑍇𑌷𑍁 𑌦𑍇𑌶𑍇𑌷𑍁 𑌤𑍇𑌷𑍍𑌠𑍀𑌯𑌤𑍇 । 𑌵𑌙𑍍𑌗𑌭𑌾𑌷𑌾𑌯𑌾𑌂 𑌸𑍍𑌵𑌰𑌾𑌵𑌿𑌮𑍌 𑌏𑌕𑍀𑌭𑍂𑌤𑍌 । 𑌅𑌨𑍍𑌯𑌤𑍍𑌰𑌾𑌪𑌿 𑌵𑌿𑌹𑌾𑌰𑌦𑍇𑌶𑍇 𑌵𑌕𑌾𑌰𑌸𑍍𑌥𑌾𑌨𑍇 𑌬𑌕𑌾𑌰𑌃 𑌉𑌪𑌯𑍁𑌜𑍍𑌯𑌤𑍇 । 𑌅𑌤𑍍𑌰𑌾𑌪𑌿 𑌵𑌕𑌾𑌰𑍋𑌨𑍍𑌤𑌃𑌸𑍍𑌥𑌃 𑌬𑌕𑌾𑌰𑌃 𑌸𑍍𑌪𑌰𑍍𑌶𑌵𑍍𑌯𑌞𑍍𑌜𑌨𑌶𑍍𑌚𑍇𑌤𑌿 𑌮𑌨𑍍𑌤𑌵𑍍𑌯𑌮𑍍 ।
• 𑌫𑌕𑌾𑌰𑌃 । 𑌅𑌯𑌂 𑌤𑍁 𑌪𑌕𑌾𑌰𑌾𑌵𑌲𑍍𑌯𑌾𑌂 𑌦𑍍𑌵𑌿𑌤𑍀𑌯𑌃 𑌶𑍍𑌵𑌾𑌸𑌾𑌨𑍁𑌪𑍍𑌰𑌦𑌾𑌨𑌃 𑌅𑌘𑍋𑌷𑌶𑍍𑌚 । 𑌨𑌾𑌯𑌮𑍍 𑌊𑌷𑍍𑌮𑌾𑌕𑍍𑌷𑌰𑌂 𑌪𑍍𑌰𑌤𑍍𑌯𑍁𑌤 𑌸𑍍𑌪𑌰𑍍𑌶𑌾𑌕𑍍𑌷𑌰𑌮𑍍 । 𑌪𑌾𑌰𑌸𑍀𑌮𑌰𑍍𑌯𑌾𑌦𑌾𑌃 𑌅𑌨𑍁𑌸𑍃𑌤𑍍𑌯 𑌤𑌦𑍍𑌵𑌦𑍁𑌚𑍍𑌚𑌾𑌰𑌃 𑌤𑍁𑌰𑍁𑌷𑍍𑌕𑌾𑌧𑌿𑌷𑍍𑌠𑌿𑌤𑍇𑌷𑍁 𑌪𑍍𑌰𑌦𑍇𑌶𑍇𑌷𑍁 𑌕𑍍𑌰𑌿𑌯𑌤𑍇 । 𑌸 𑌦𑍁𑌷𑍍𑌟𑌃 ।
• 𑌞𑌕𑌾𑌰𑌃 । 𑌏𑌷 𑌤𑌾𑌲𑌵𑍍𑌯𑌶𑍍𑌚 𑌅𑌨𑍁𑌨𑌾𑌸𑌿𑌕𑌶𑍍𑌚𑍇𑌤𑌿 । 𑌅𑌨𑍍𑌯𑌤𑌾𑌲𑌵𑍍𑌯𑌵𑌤𑍍 𑌚𑌜𑌵𑌤𑍍 𑌕𑌿𑌲 𑌉𑌚𑍍𑌚𑌾𑌰𑍍𑌯𑌃 𑌨𑍈𑌵 𑌨𑍍𑌯𑌵𑌤𑍍 । 𑌯𑌦𑍍𑌯𑌪𑌿 𑌯𑌕𑌾𑌰𑌸𑍍𑌵𑌰𑌶𑍍𑌚 𑌤𑌾𑌲𑌵𑍍𑌯𑌃 𑌞𑌕𑌾𑌰𑍇 𑌯𑌕𑌾𑌰𑌶𑍍𑌰𑍁𑌤𑌿𑌃 𑌅𑌕𑌾𑌰𑍍𑌯𑌾 ।
• 𑌜𑍍𑌞𑌕𑌾𑌰𑌃 । 𑌸𑌂𑌯𑍁𑌕𑍍𑌤𑌾𑌕𑍍𑌷𑌰𑌮𑌿𑌦𑌂 𑌜𑌕𑌾𑌰𑌞𑌕𑌾𑌰𑌯𑍋𑌃 𑌇𑌤𑍍𑌯𑌤𑍍𑌰 𑌨 𑌸𑌂𑌶𑌯𑌃 । 𑌈𑌦𑍃𑌶𑌃 𑌅𑌨𑌨𑍁𑌨𑌾𑌸𑌿𑌕𑍇𑌨 𑌅𑌨𑍁𑌨𑌾𑌸𑌿𑌕𑌸𑍍𑌯 𑌸𑌂𑌯𑍋𑌗𑌾𑌃 𑌅𑌨𑍇𑌕𑍇 𑌨𑌨𑍁 𑌵𑌿𑌦𑍍𑌯𑌨𑍍𑌤𑍇 । 𑌯𑌾𑌚𑍍𑌞𑌾 𑌲𑌗𑍍𑌨𑌃 𑌵𑌿𑌘𑍍𑌨𑌃 𑌪𑍍𑌰𑌯𑌤𑍍𑌨𑌃 𑌪𑌦𑍍𑌮𑌾 𑌪𑌾𑌪𑍍𑌮𑌾 𑌇𑌤𑍍𑌯𑌾𑌦𑌿𑌷𑍁 । 𑌪𑌰𑌨𑍍𑌤𑍁 𑌅𑌸𑍍𑌮𑌿𑌨𑍍𑌨𑍇𑌵 𑌸𑌂𑌯𑍁𑌕𑍍𑌤𑌾𑌕𑍍𑌷𑌰𑍇 𑌪𑍂𑌰𑍍𑌵𑍋𑌕𑍍𑌤𑌾𑌂 𑌞𑌕𑌾𑌰𑌸𑍍𑌥𑌾𑌂 𑌯𑌕𑌾𑌰𑌶𑍍𑌰𑍁𑌤𑌿𑌮𑍍 𑌆𑌧𑌾𑌰𑍀𑌕𑍃𑌤𑍍𑌯 𑌦𑍋𑌷𑌾𑌨𑍍𑌤𑌰𑌮𑍍 𑌅𑌪𑌿 𑌨𑌿𑌰𑍍𑌮𑍀𑌯𑌤𑍇 𑌉𑌤𑍍𑌤𑌰𑌭𑌾𑌰𑌤𑍇 𑌅𑌨𑍍𑌯𑌤𑍍𑌰𑌾𑌪𑌿 𑌕𑍍𑌵𑌚𑌿𑌤𑍍 । 𑌯𑌤𑍍 𑌜𑌕𑌾𑌰𑌸𑍍𑌯 𑌸𑍍𑌥𑌾𑌨𑍇 𑌗𑌕𑌾𑌰𑌶𑍍𑌰𑌵𑌣𑌮𑍍 । 𑌤𑌨𑍍𑌨𑌿𑌵𑌾𑌰𑌣𑌂 𑌵𑌰𑌮𑍍 ।⁴
• 𑌰𑍇𑌫𑌃 । 𑌪𑍍𑌰𑌾𑌯𑌃 𑌅𑌮𑍇𑌰𑌿𑌕𑍀𑌯𑌾𑌨𑌾𑌮𑍍 𑌏𑌵 𑌭𑍍𑌰𑌮𑍋𑌤𑍍𑌰 𑌉𑌤𑍍𑌪𑌦𑍍𑌯𑌤𑍇 । 𑌰𑍇𑌫𑍋 𑌨𑌾𑌮 𑌕𑌶𑍍𑌚𑌨 𑌶𑌬𑍍𑌦𑌃 𑌕𑍍𑌰𑌕𑌚𑌵𑌤𑍍 । 𑌰𑍇𑌫𑍋𑌚𑍍𑌚𑌾𑌰𑌣𑍇 𑌰𑍇𑌫 𑌇𑌵 𑌜𑌿𑌹𑍍𑌵𑌾𑌯𑌾𑌃 𑌶𑍀𑌘𑍍𑌰𑌤𑌰𑌂 𑌕𑌮𑍍𑌪𑌨𑌂 𑌭𑌵𑍇𑌤𑍍 । 𑌅𑌤𑍋 𑌦𑍍𑌰𑌵𑌮𑌯𑌃 𑌶𑌬𑍍𑌦𑌃 (liquid consonant) 𑌮𑌾 𑌭𑍂𑌤𑍍 । 𑌚𑍀𑌨𑌜𑌪𑌾𑌨𑌦𑍇𑌶𑍀𑌯𑌾𑌨𑌾𑌞𑍍𑌚 𑌲𑌕𑌾𑌰𑌰𑍇𑌫𑌯𑍋𑌰𑍍𑌭𑍍𑌰𑌮𑌃 𑌪𑌰𑌨𑍍𑌤𑍁 𑌏𑌷 𑌭𑍍𑌰𑌮𑌃 𑌸𑌂𑌸𑍍𑌕𑍃𑌤𑍋𑌚𑍍𑌚𑌾𑌰𑍇𑌣 𑌵𑌿𑌶𑌿𑌷𑍍𑌟 𑌇𑌤𑌿 𑌨 𑌪𑍍𑌰𑌤𑍍𑌯𑍁𑌤 𑌸𑌾𑌰𑍍𑌵𑌤𑍍𑌰𑌿𑌕𑌃 ।
• 𑌋𑌕𑌾𑌰𑌃 𑌤𑌤𑍍𑌸𑌮𑍍𑌬𑌦𑍍𑌧𑌦𑍀𑌰𑍍𑌘𑌶𑍍𑌚 । 𑌹𑍍𑌰𑌸𑍍𑌵𑌰𑍍𑌕𑌾𑌰𑌃 । 𑌸𑌂𑌸𑍍𑌕𑍃𑌤𑌮𑌵𑌿𑌹𑌾𑌯 𑌬𑌹𑍍𑌵𑍍𑌯𑌃 𑌭𑌾𑌷𑌾𑌃 𑌶𑌬𑍍𑌦𑌾𑌨𑍁𑌸𑌾𑌰𑌿𑌣𑍍𑌯𑌃 (phonetic languages) । 𑌤𑌾𑌸𑌾𑌂 𑌵𑌿𑌶𑍇𑌷𑌲𑌕𑍍𑌷𑌣𑌂 𑌪𑍍𑌰𑌤𑍍𑌯𑍇𑌕𑌮𑍍 𑌅𑌕𑍍𑌷𑌰𑌸𑍍𑌯 𑌏𑌕𑌶𑌬𑍍𑌦𑌤𑍍𑌵𑌮𑍍 । 𑌏𑌕𑍈𑌕𑌂 𑌧𑍍𑌵𑌨𑌿𑌂 𑌸𑍂𑌚𑌯𑌿𑌤𑍁𑌮𑍍 𑌅𑌕𑍍𑌷𑌰𑌬𑌾𑌹𑍁𑌲𑍍𑌯𑌂 𑌭𑌵𑌿𑌤𑍁𑌂 𑌨𑌾𑌰𑍍𑌹𑌤𑌿 । 𑌤𑌸𑍍𑌮𑌾𑌤𑍍 𑌹𑌿𑌮𑌾𑌲𑌯𑌾𑌤𑍍 𑌆𑌮𑌹𑌾𑌰𑌾𑌷𑍍𑌟𑍍𑌰𑌂 𑌵𑌿𑌦𑍍𑌯𑌮𑌾𑌨𑌂 𑌰𑌿𑌵𑌤𑍍 𑌉𑌚𑍍𑌚𑌾𑌰𑌣𑌂 𑌵𑌾 𑌆𑌨𑍍𑌧𑍍𑌰𑌕𑌰𑍍𑌣𑌾𑌟𑌕𑌯𑍋𑌃 𑌦𑍇𑌶𑌯𑍋𑌃 𑌆𑌚𑌰𑍍𑌯𑌮𑌾𑌣𑌂 𑌰𑍁𑌵𑌤𑍍 𑌉𑌚𑍍𑌚𑌾𑌰𑌣𑌂 𑌵𑌾 𑌅𑌸𑌮𑍀𑌚𑍀𑌨 𑌇𑌤𑌿 ।⁵ 𑌤𑌰𑍍𑌹𑌿 𑌕𑌥𑌮𑍍 । 𑌸𑍍𑌵𑌰𑍇𑌸𑍍𑌮𑌿𑌨𑍍 𑌋𑌕𑌾𑌰𑍇 𑌰𑍇𑌫𑌶𑍍𑌰𑍁𑌤𑌿𑌰𑍍𑌵𑌿𑌹𑌿𑌤𑌾 𑌇𑌤𑍍𑌯𑌤𑍍𑌰 𑌶𑌿𑌕𑍍𑌷𑌾𑌶𑌾𑌸𑍍𑌤𑍍𑌰𑌂 𑌪𑍍𑌰𑌮𑌾𑌣𑌮𑍍 । 𑌤𑌚𑍍𑌛𑌾𑌸𑍍𑌤𑍍𑌰𑌾𑌦𑍇𑌵 𑌰𑍇𑌫𑌶𑍍𑌰𑍁𑌤𑍇𑌃 𑌪𑍂𑌵𑌪𑌰𑌯𑍋𑌃 𑌸𑍍𑌵𑌰𑍋 𑌵𑌿𑌹𑌿𑌤𑌃 । 𑌅𑌗𑍍𑌰𑍇 𑌅𑌵𑌗𑌨𑍍𑌤𑍁𑌂 𑌵𑍇𑌦𑌾𑌧𑍍𑌯𑌯𑌨𑌸𑍍𑌯 𑌶𑍍𑌰𑍁𑌤𑌿𑌪𑌰𑌮𑍍𑌪𑌰𑌾 𑌆𑌶𑍍𑌰𑌯𑌣𑍀𑌯𑌾 । 𑌵𑍇𑌦𑌵𑌿𑌦𑍍𑌭𑌿𑌃 𑌵𑍇𑌦𑌸𑍍𑌥𑌸𑍍𑌯 𑌋𑌕𑌾𑌰𑌸𑍍𑌯 𑌉𑌚𑍍𑌚𑌾𑌰𑌣𑌂 𑌶𑍍𑌰𑌾𑌵𑍍𑌯𑌮𑍍 । 𑌉𑌕𑌾𑌰𑌵𑌤𑍍 𑌪𑌰𑌨𑍍𑌤𑍁 𑌅𑌗𑍋𑌲𑍀𑌕𑍃𑌤𑌾𑌤𑍍 𑌮𑍁𑌖𑌦𑍍𑌵𑌾𑌰𑌾𑌤𑍍 𑌕𑌶𑍍𑌚𑌨 𑌧𑍍𑌵𑌨𑌿𑌃 (closed central unrounded vowel) 𑌏𑌵 𑌵𑍇𑌦𑌵𑌿𑌦𑍁𑌷𑌾𑌮𑍍 𑌉𑌚𑍍𑌚𑌾𑌰𑌣𑌾𑌤𑌃 𑌸𑌮𑍍𑌪𑌨𑍍𑌨𑌃 𑌭𑌵𑌤𑌿 । 𑌦𑍀𑌰𑍍𑌘𑌸𑍍𑌵𑌰 𑍠𑌕𑌾𑌰𑌶𑍍𑌚 𑌋𑌕𑌾𑌰𑌸𑍍𑌯 𑌦𑍀𑌰𑍍𑌘𑍀𑌕𑌰𑌣𑌮𑍇𑌵 । 𑌰𑍀𑌵𑌤𑍍 𑌰𑍂𑌵𑌤𑍍 𑌅𑌨𑍍𑌯𑌵𑌿𑌧𑌾 𑌵𑌾 𑌉𑌚𑍍𑌚𑌾𑌰𑌣𑌾 𑌤𑍍𑌯𑌾𑌜𑍍𑌯𑌾 ।

𑌸𑍂𑌕𑍍𑌷𑍍𑌮𑌤𑌰𑌾𑌃 𑌭𑍍𑌰𑌮𑌾𑌃

• 𑌌𑌕𑌾𑌰𑌲𑍃𑌕𑌾𑌰𑍌 । 𑌸𑍍𑌵𑌰𑍇𑌷𑍁 𑌋𑌕𑌾𑌰𑌲𑍍𑌕𑌾𑌰𑌯𑍋𑌃 𑌅𑌤𑍍𑌯𑌨𑍍𑌤𑌸𑌮𑍍𑌬𑌨𑍍𑌧𑌃 𑌕𑍍𑌵𑌚𑌿𑌤𑍍 𑌸𑌵𑌰𑍍𑌣𑌤𑍍𑌵𑌮𑌪𑌿 । 𑌭𑍇𑌦 𑌋𑌕𑌾𑌰𑌸𑍍𑌯 𑌮𑍂𑌰𑍍𑌧𑌨𑍍𑌯𑌤𑍍𑌵𑌂 𑌌𑌕𑌾𑌰𑌸𑍍𑌯 𑌦𑌨𑍍𑌤𑍍𑌯𑌤𑍈𑌵 । 𑌸𑍍𑌮𑌰𑍍𑌤𑌵𑍍𑌯𑌮𑍍 𑌌𑌕𑌾𑌰𑍋𑌯𑌂 𑌕𑍇𑌵𑌲𑌦𑌨𑍍𑌤𑍍𑌯 𑌇𑌤𑌿 । 𑌕𑌣𑍍𑌠𑌤𑌾𑌲𑌵𑍍𑌯𑍌 𑌕𑌣𑍍𑌠𑍋𑌷𑍍𑌟𑍍𑌯𑍌 𑌦𑌨𑍍𑌤𑍍𑌯𑍋𑌷𑍍𑌟𑍍𑌯𑍌 𑌖𑌲𑍁 𑌵𑌿𑌦𑍍𑌯𑌨𑍍𑌤𑍇 𑌪𑌰𑌨𑍍𑌤𑍁 𑌌𑌕𑌾𑌰𑌃 𑌕𑌶𑍍𑌚𑌿𑌤𑍍 𑌦𑌨𑍍𑌤𑍍𑌯𑌮𑍂𑌰𑍍𑌧𑌨𑍍𑌯 𑌇𑌤𑌿 𑌨𑌾𑌭𑌿𑌹𑌿𑌤𑌃 । 𑌅𑌨𑍇𑌨 𑌸𑌮𑌭𑌿𑌜𑍍𑌞𑌾𑌯𑌤𑍇 𑌯𑌦𑍢𑌕𑌾𑌰𑍇 𑌰𑍇𑌫𑌶𑍍𑌰𑌵𑌣𑌂 𑌮𑌾 𑌭𑍂𑌤𑍍⁶ । 𑌅𑌨𑍍𑌯𑌵𑌿𑌧𑌾𑌃 𑌸𑍍𑌵𑌰𑌨𑌿𑌮𑌿𑌤𑍍𑌤𑌾 𑌨𑌿𑌯𑌮𑌾𑌃 𑌗𑌤𑍇 𑌋𑌕𑌾𑌰𑌾𑌧𑍍𑌯𑌾𑌯𑍇 𑌅𑌵𑌲𑍋𑌕𑌨𑍀𑌯𑌾𑌃 । 𑌇𑌦𑌂𑌸𑌮𑍍𑌬𑌦𑍍𑌧𑌮𑍍 𑌅𑌕𑍍𑌷𑌰𑌾𑌨𑍍𑌤𑌰𑌂 𑌲𑍃 𑌇𑌤𑌿 । 𑌤𑌚𑍍𑌚 𑌸𑍍𑌯𑌾𑌤𑍍 𑌪𑌰𑍇𑌣 𑌋𑌕𑌾𑌰𑍇𑌣 𑌸𑌹𑌿𑌤𑍋 𑌲𑌕𑌾𑌰𑌃 𑌯𑌤𑍍𑌰 𑌋𑌕𑌾𑌰𑌾𑌦𑍁𑌤𑍍𑌪𑌨𑍍𑌨𑌾 𑌰𑍇𑌫𑌶𑍍𑌰𑍁𑌤𑌿𑌃 𑌭𑌵𑍇𑌦𑍇𑌵 । 𑌪𑍍𑌰𑌾𑌯𑌃 𑌅𑌕𑍍𑌷𑌰𑌮𑌿𑌦𑌂 𑌵𑍍𑌯𑌾𑌕𑌰𑌣𑍇 𑌏𑌵 𑌵𑌿𑌶𑍍𑌰𑍁𑌤𑌃 𑌦𑌶𑌸𑍁 𑌲𑌕𑌾𑌰𑍇𑌷𑍁 𑌅𑌨𑍍𑌯𑌤𑌮𑌯𑍋𑌃 𑌲𑍃𑌟𑍍𑌲𑍃𑌙𑍋𑌃 । 𑌅𑌭𑌿𑌜𑍍𑌞𑌾𑌤𑌵𑍍𑌯𑌂 𑌯𑌤𑍍 𑌅𑌨𑌯𑍋 𑌌𑌲𑍍𑌰𑍋𑌃 𑌪𑍍𑌰𑌮𑌾𑌦𑌕𑌾𑌰𑍀 𑌰𑍂𑌪𑌸𑌮𑍍𑌬𑌨𑍍𑌧𑍋𑌪𑌿 𑌦𑍇𑌵𑌨𑌾𑌗𑌰𑍀𑌲𑌿𑌪𑌿𑌸𑍍𑌥𑌃 । 𑌗𑍍𑌰𑌨𑍍𑌥𑌾𑌦𑌿𑌲𑌿𑌪𑌿𑌷𑍁 𑌰𑍂𑌪𑌯𑍋𑌰𑌨𑌯𑍋𑌃 𑌸𑍍𑌵𑌲𑍍𑌪𑍋𑌪𑌿 𑌸𑌮𑍍𑌬𑌨𑍍𑌧𑍋 𑌨𑌾𑌸𑍍𑌤𑌿⁷ ।
• 𑌲𑌾𑌘𑌵𑌗𑍌𑌰𑌵𑍇 । 𑌹𑍍𑌰𑌸𑍍𑌵𑌂 𑌲𑌘𑍁 𑌸𑌂𑌯𑍋𑌗𑍇 𑌗𑍁𑌰𑍁 𑌦𑍀𑌰𑍍𑌘𑌞𑍍𑌚 𑌇𑌤𑌿 𑌸𑍂𑌤𑍍𑌰𑌾𑌣𑌿 । 𑌯𑌦𑍍𑌯𑌪𑌿 𑌋𑌕𑌾𑌰𑍇 𑌰𑍇𑌫𑌶𑍍𑌰𑍁𑌤𑌿𑌃 𑌤𑌥𑌾𑌪𑌿 𑌸𑍍𑌵𑌰 𑌏𑌵 𑌸𑌃 । 𑌕𑍃𑌖𑍃𑌗𑍍𑌰𑌾𑌦𑌯𑌃 𑌸𑌂𑌯𑍁𑌕𑍍𑌤𑌾𑌃 𑌨 । 𑌤𑌾𑌦𑍃𑌗𑍍𑌭𑍍𑌯𑌃 𑌅𑌕𑍍𑌷𑍇𑌰𑍇𑌭𑍍𑌯𑌃 𑌪𑍍𑌰𑌾𑌕𑍍 𑌵𑌿𑌦𑍍𑌯𑌮𑌾𑌨𑌾 𑌇𑌤𑌰𑍇 𑌹𑍍𑌰𑌸𑍍𑌵𑌵𑌰𑍍𑌣𑌾𑌃 𑌲𑌘𑌵𑌃 𑌏𑌵 𑌸𑌂𑌯𑍋𑌗𑍇 𑌗𑍁𑌰𑍁 𑌇𑌤𑍍𑌯𑌸𑍍𑌯 𑌅𑌵𑌿𑌹𑌿𑌤𑌤𑍍𑌵𑌾𑌤𑍍 । 𑌉𑌦𑌾𑌹𑌰𑌣𑍇𑌨 𑌵𑌿𑌕𑍃𑌤𑌿𑌶𑌬𑍍𑌦𑌸𑍍𑌯 𑌪𑍍𑌰𑌥𑌮𑌾𑌕𑍍𑌷𑌰𑌂 𑌹𑍍𑌰𑌸𑍍𑌵𑌂 𑌲𑌘𑍁 𑌅𑌤𑌃 𑌸 𑌶𑌬𑍍𑌦𑌃 𑌵𑌿𑌕𑍍𑌕𑍃𑌤𑍀𑌤𑌿 𑌨𑍈𑌵 𑌉𑌚𑍍𑌚𑌾𑌰𑍍𑌯𑌃 । 𑌤𑌥𑍈𑌵 𑌡𑍁𑌕𑍃𑌞𑍍 𑌨 𑌡𑍁𑌕𑍍𑌕𑍃𑌞𑍍 । 𑌵𑌿𑌵𑍃𑌣𑍋𑌤𑌿 𑌨 𑌵𑌿𑌵𑍍𑌵𑍃𑌣𑍋𑌤𑌿 । 𑌚𑌤𑌸𑍃𑌣𑌾𑌂 𑌨 𑌚𑌤𑌸𑍍𑌸𑍃𑌣𑌾𑌂 । 𑌶𑌤𑍃 𑌨 𑌶𑌤𑍍𑌤𑍃 𑌶𑌤𑍍𑌰𑍁 𑌵𑌾 । 𑌨𑌿𑌰𑍃𑌤𑌿𑌪𑌦𑌮𑍍 𑌅𑌸𑍍𑌪𑌷𑍍𑌟𑌤𑌰𑌂 𑌯𑌤𑌃 𑌕𑌦𑌾𑌚𑌿𑌤𑍍 𑌋𑌕𑌾𑌰𑌸𑍍𑌵𑌰𑍂𑌪𑌸𑌹𑌿𑌤𑌂 𑌲𑌿𑌖𑍍𑌯𑌤𑍇 । 𑌤𑌲𑍍𑌲𑍇𑌖𑌨𑌂 𑌨𑌿𑌰𑍍𑌰𑍃𑌤𑌿𑌵𑌦𑍁𑌚𑍍𑌚𑌾𑌰𑌣𑌮𑍍 𑌉𑌭𑍇𑌪𑌿 𑌤𑍍𑌯𑌕𑍍𑌤𑌵𑍍𑌯𑍇 ।
• 𑌅𑌕𑌾𑌰𑌸𑍍𑌯 𑌸𑌂𑌵𑍃𑌤𑌤𑍍𑌵𑌮𑍍 । 𑌸𑍍𑌵𑌰𑍇𑌷𑍁 𑌪𑍍𑌰𑌾𑌯𑌃 𑌆𑌦𑌿𑌮𑌸𑍍𑌯 𑌅𑌕𑌾𑌰𑌸𑍍𑌯 𑌏𑌵 𑌉𑌚𑍍𑌚𑌾𑌰𑌣𑌶𑍈𑌲𑍀 𑌆𑌭𑌾𑌰𑌤𑌂 𑌸𑍁𑌤𑌰𑌾𑌂 𑌭𑌿𑌨𑍍𑌨𑌾 । 𑌅𑌷𑍍𑌟𑌾𑌧𑍍𑌯𑌾𑌯𑌾𑌃 𑌅 𑌅 𑌇𑌤𑍍𑌯𑌨𑍍𑌤𑌿𑌮𑌸𑍂𑌤𑍍𑌰𑌮𑍍 𑌅𑌕𑌾𑌰𑌸𑍍𑌯 𑌸𑌂𑌵𑍃𑌤𑌤𑍍𑌵𑌂 𑌵𑌿𑌧𑌤𑍍𑌤𑍇 𑌇𑌤𑍍𑌯𑌾𑌚𑌾𑌰𑍍𑌯𑌬𑍋𑌧𑌃 । 𑌤𑌨𑍍𑌨𑌾𑌮 𑌕𑌿𑌮𑍍 । 𑌸𑌂𑌵𑍃𑌤𑌤𑍍𑌵𑌂 𑌤𑌦𑍍𑌵𑌿𑌪𑌰𑍀𑌤𑌂 𑌵𑌿𑌵𑍃𑌤𑌤𑍍𑌵𑌂 𑌚 𑌕𑌣𑍍𑌠𑌦𑍍𑌵𑌾𑌰𑌸𑍍𑌯 𑌕𑍇𑌚𑌨 𑌸𑍍𑌥𑌿𑌤𑍀 । 𑌕𑌣𑍍𑌠𑍇 𑌵𑌿𑌵𑍃𑌤𑍇 𑌕𑌣𑍍𑌠𑌦𑍍𑌵𑌾𑌰𑌮𑍍 𑌗𑍁𑌰𑍁 𑌭𑌵𑍇𑌤𑍍 । 𑌸𑌂𑌵𑍃𑌤𑌕𑌣𑍍𑌠𑍇 𑌤𑌦𑍍𑌦𑍍𑌵𑌾𑌰𑌸𑍍𑌯 𑌲𑌾𑌘𑌵𑌮𑍍 । 𑌅𑌕𑌾𑌰𑌨𑌿𑌮𑌿𑌤𑍍𑌤𑌂 𑌸𑌂𑌵𑍃𑌤𑌤𑍍𑌵𑌂 𑌸𑌾𑌂𑌸𑍍𑌕𑍃𑌤𑌿𑌕𑌂 𑌪𑌰𑌂 𑌨 𑌤𑍁 𑌦𑍍𑌰𑌾𑌵𑌿𑌡𑍀𑌯𑌭𑌾𑌷𑌾𑌸𑍁 𑌵𑌿𑌹𑌿𑌤𑌂 । 𑌅𑌤𑌃 𑌦𑍍𑌰𑌾𑌵𑌿𑌡𑍀𑌯𑌭𑌾𑌷𑌾𑌭𑌿𑌃 𑌵𑌕𑍍𑌤𑌾𑌰𑌃 𑌸𑌂𑌸𑍍𑌕𑍃𑌤𑌨𑌿𑌮𑌿𑌤𑍍𑌤𑌮𑍍 𑌅𑌕𑌾𑌰𑌮𑍍 𑌉𑌚𑍍𑌚𑌾𑌰𑌯𑌨𑍍𑌤𑌃 𑌸𑌾𑌵𑌧𑌾𑌨𑍇𑌨 𑌸𑌂𑌵𑍃𑌤𑌕𑌣𑍍𑌠𑌂 𑌕𑍁𑌰𑍍𑌯𑍁𑌃 । 𑌉𑌤𑍍𑌤𑌰𑌭𑌾𑌰𑌤𑍀𑌯𑌾𑌸𑍁 𑌕𑌾𑌸𑍁𑌚𑌿𑌦𑍍𑌭𑌾𑌷𑌾𑌸𑍁 𑌫𑌾𑌰𑌸𑍀𑌯𑌭𑌾𑌷𑌾𑌯𑌾𑌃 𑌪𑍍𑌰𑌭𑌾𑌵𑍇𑌨 𑌅𑌕𑌾𑌰𑌃 𑌕𑌾𑌦𑌾𑌚𑌿𑌤𑍍𑌕𑍇𑌨 𑌉𑌚𑍍𑌚𑌾𑌰𑍍𑌯𑌤𑍇 । 𑌸𑌾𑌪𑌿 𑌪𑍍𑌰𑌕𑍍𑌰𑌿𑌯𑌾 𑌸𑌂𑌸𑍍𑌕𑍃𑌤𑍇 𑌨𑌾𑌨𑍁𑌸𑌰𑌣𑍀𑌯𑌾 ।
• 𑌦𑌨𑍍𑌤𑌾𑌃 𑌨 𑌦𑌨𑍍𑌤𑌕𑍃𑌪𑌿𑌕𑌾𑌨𑌿𑌮𑌿𑌤𑍍𑌤𑌾𑌃 । 𑌪𑍍𑌰𑌾𑌚𑍀𑌨𑌾𑌯𑌾𑌃 𑌦𑍍𑌰𑌾𑌵𑌿𑌡𑍍𑌯𑌾𑌃 𑌤𑌤𑍋 𑌜𑌾𑌤𑌾𑌨𑌾𑌂 𑌮𑌲𑌯𑌾𑌲𑌾𑌦𑌿𑌭𑌾𑌷𑌾𑌣𑌾𑌂 𑌕𑌿𑌞𑍍𑌚𑌨 𑌵𑍈𑌶𑌿𑌷𑍍𑌟𑍍𑌯𑌂 𑌯𑌤𑍍 𑌦𑌨𑍍𑌤𑍍𑌯𑌮𑍂𑌰𑍍𑌧𑌨𑍍𑌯𑌵𑍍𑌯𑌞𑍍𑌜𑌨𑌾𑌨𑍍 𑌵𑌿𑌹𑌾𑌯 𑌦𑌨𑍍𑌤𑌕𑍃𑌪𑌿𑌕𑌾𑌤𑌃 𑌸𑍃𑌷𑍍𑌟𑌾𑌨𑌿⁸ 𑌅𑌕𑍍𑌷𑌰𑌾𑌣𑍍𑌯𑌪𑌿 𑌸𑌨𑍍𑌤𑌿⁹ । 𑌸𑌂𑌸𑍍𑌕𑍃𑌤𑍇 𑌤𑍁 𑌦𑌨𑍍𑌤𑍍𑌯𑌾𑌃 𑌏𑌵 𑌨 𑌕𑍃𑌪𑌿𑌕𑌾𑌜𑌾𑌃 । 𑌦𑌨𑍍𑌤𑍍𑌯𑌾𑌕𑍍𑌷𑌰𑍇𑌷𑍁 𑌉𑌚𑍍𑌚𑌾𑌰𑍍𑌯𑌮𑌾𑌣𑍇𑌷𑍁 𑌜𑌿𑌹𑍍𑌵𑌾 𑌦𑌨𑍍𑌤𑌾𑌵𑌲𑍀𑌭𑍍𑌯𑌾𑌂 𑌬𑌦𑍍𑌧𑌾 𑌭𑌵𑍇𑌤𑍍 𑌨𑍍𑌯𑍂𑌨𑌾𑌤𑌿𑌨𑍍𑌯𑍂𑌨𑌂 𑌦𑌨𑍍𑌤𑌾𑌨𑍍 𑌸𑍍𑌪𑍃𑌶𑍇𑌤𑍍 । 𑌤𑌦𑍍𑌦𑌨𑍍𑌤𑍍𑌯𑌤𑍍𑌵𑌂 𑌤𑌥𑌦𑌧𑌾𑌨𑌾𑌂 𑌯𑌾𑌵𑌤𑍍 𑌅𑌨𑍁𑌷𑍍𑌠𑍀𑌯𑌤𑍇 𑌤𑌾𑌵𑌤𑍍 𑌨𑌕𑌾𑌰𑌸𑍍𑌯 𑌨 𑌇𑌤𑌿 𑌭𑌾𑌤𑌿 । 𑌮𑌹𑌾𑌰𑌾𑌷𑍍𑌟𑍍𑌰𑍀𑌯𑌾𑌃 𑌏𑌵 𑌨𑌕𑌾𑌰𑌮𑍇𑌵𑌂 𑌸𑌮𑍁𑌚𑍍𑌚𑌾𑌰𑌯𑌨𑍍𑌤𑌿 𑌇𑌤𑍍𑌯𑌨𑍁𑌭𑌵𑌃 । 𑌲𑌕𑌾𑌰𑌸𑍍𑌯𑌾𑌪𑌿 𑌇𑌯𑌮𑍇𑌵 𑌸𑍍𑌥𑌿𑌤𑌿𑌃 ।

𑌅𑌸𑌮𑌾𑌹𑌿𑌤𑌾𑌃 𑌪𑍍𑌰𑌶𑍍𑌨𑌾𑌃

• 𑌳𑌕𑌾𑌰𑌃 । 𑌳𑌡𑌯𑍋𑌃 𑌕𑌶𑍍𑌚𑌿𑌤𑍍 𑌸𑌮𑍍𑌬𑌨𑍍𑌧𑌃 𑌛𑌾𑌨𑍍𑌦𑌸𑌃 । 𑌤𑌨𑍍𑌨𑌿𑌮𑌿𑌤𑍍𑌤𑌾 𑌨𑌿𑌯𑌮𑌾𑌃 𑌕𑍇 । 𑌕𑌿𑌮𑌰𑍍𑌥𑌂 𑌅𑌸𑍌 𑌳𑌕𑌾𑌰𑍋𑌨𑍍𑌯𑌤𑍍𑌰 𑌸𑌂𑌸𑍍𑌕𑍃𑌤𑌵𑍍𑌯𑌾𑌕𑌰𑌣𑍇 𑌨 𑌦𑍃𑌶𑍍𑌯𑌤𑍇 । 𑌦𑌕𑍍𑌷𑌿𑌣𑌭𑌾𑌰𑌤𑍀𑌯𑌭𑌾𑌷𑌾𑌣𑌾𑌂 𑌮𑌙𑍍𑌗𑌳𑌾𑌦𑌿𑌶𑌬𑍍𑌦𑍇𑌷𑍁 𑌳𑌕𑌾𑌰𑌪𑍍𑌰𑌯𑍁𑌕𑍍𑌤𑌿𑌃 𑌅𑌸𑌂𑌸𑍍𑌕𑍃𑌤𑌾 𑌵𑌾 ।
• 𑌵𑌕𑌾𑌰𑌃 । 𑌯𑌥𑌾 𑌅𑌕𑍍𑌷𑍁 𑌨𑌾𑌮 𑌅𑌕𑌾𑌰𑌃 𑌇𑌕𑌾𑌰𑌃 𑌉𑌕𑌾𑌰𑌃 𑌋𑌕𑌾𑌰𑌃 𑌌𑌕𑌾𑌰𑌶𑍍𑌚 𑌏𑌷𑍁 𑌪𑍍𑌰𑌤𑍍𑌯𑍇𑌕𑌮𑍍 𑌉𑌚𑍍𑌚𑌾𑌰𑌣𑌸𑍍𑌥𑌾𑌨𑌸𑍍𑌯 𑌪𑍍𑌰𑌤𑌿𑌨𑌿𑌧𑌯𑌃 𑌅𑌨𑍍𑌤𑌰𑍍𑌭𑍂𑌤𑌾𑌃 𑌸𑌨𑍍𑌤𑌿 । 𑌤𑌥𑍈𑌵 𑌯𑌰𑌲𑌵𑍇𑌷𑍍𑌵𑌪𑌿 𑌚𑌤𑍁𑌰𑍍𑌣𑌾𑌮𑍍 𑌉𑌚𑍍𑌚𑌾𑌰𑌣𑌸𑍍𑌥𑌾𑌨𑌾𑌨𑌾𑌂 𑌪𑍍𑌰𑌤𑌿𑌨𑌿𑌧𑌯𑌃 𑌵𑌿𑌦𑍍𑌯𑌨𑍍𑌤𑍇 । 𑌇𑌯𑌮𑍍 𑌅𑌵𑌸𑍍𑌥𑌾 𑌸𑌂𑌸𑍍𑌕𑍃𑌤𑌵𑌰𑍍𑌣𑌮𑌾𑌲𑌾𑌯𑌾𑌃 𑌸𑍌𑌨𑍍𑌦𑌰𑍍𑌯𑌮𑍍 । 𑌕𑌿𑌨𑍍𑌤𑍁 𑌅𑌪𑌵𑌾𑌦𑌃 𑌕𑌶𑍍𑌚𑌿𑌤𑍍 𑌅𑌤𑍍𑌰𑌤𑍍𑌯𑌃 । 𑌵𑌕𑌾𑌰𑌃 𑌕𑍇𑌵𑌲𑍋𑌷𑍍𑌟𑍍𑌯𑍋 𑌨 । 𑌪𑍍𑌰𑌤𑍍𑌯𑍁𑌤 𑌦𑌨𑍍𑌤𑍋𑌷𑍍𑌟𑍍𑌯𑌃 । 𑌕𑌿𑌮𑌰𑍍𑌥𑌮𑍍 𑌅𑌪𑌵𑌾𑌦𑌃 । 𑌸𑌂𑌸𑍍𑌕𑍃𑌤𑌸𑌮𑍍𑌬𑌦𑍍𑌧𑌾𑌸𑍁 𑌇𑌤𑌰𑌭𑌾𑌷𑌾𑌸𑍁 𑌯𑌵𑌨𑌾𑌦𑌿𑌷𑍁 𑌕𑍇𑌵𑌲𑍋𑌷𑍍𑌟𑍍𑌯𑌮𑍍 𑌅𑌨𑍍𑌤𑌃𑌸𑍍𑌥𑌮𑍍 𑌅𑌕𑍍𑌷𑌰𑌂 (w) 𑌵𑌿𑌦𑍍𑌯𑌤𑍇 । 𑌕𑌿𑌂 𑌤𑌦𑍇𑌵 𑌸𑌂𑌸𑍍𑌕𑍃𑌤𑍇𑌪𑌿 𑌕𑍇𑌵𑌲𑍋𑌷𑍍𑌟𑍍𑌯𑌮𑍍 𑌆𑌸𑍀𑌤𑍍 । 𑌕𑌾𑌲𑌕𑍍𑌰𑌮𑍇𑌣 𑌕𑌿𑌂 𑌪𑌾𑌣𑌿𑌨𑍇𑌃 𑌪𑍍𑌰𑌾𑌗𑍇𑌵 𑌦𑌨𑍍𑌤𑍋𑌷𑍍𑌟𑍍𑌯𑌂 𑌸𑌞𑍍𑌜𑌾𑌤𑌮𑍍 ।
• 𑌅𑌨𑍁𑌨𑌾𑌸𑌿𑌕𑍇𑌭𑍍𑌯𑌃 𑌹𑌕𑌾𑌰𑌃 । 𑌧𑌾𑌰𑌾𑌵𑌾𑌹𑌿𑌨𑌾 𑌅𑌕𑍍𑌷𑌰𑍋𑌚𑍍𑌚𑌾𑌰𑌣𑍇𑌨 𑌶𑌬𑍍𑌦𑍋𑌚𑍍𑌚𑌾𑌰𑌣𑌂 𑌸𑌿𑌧𑍍𑌯𑌤𑌿 । 𑌵𑍍𑌯𑌵𑌹𑌾𑌰𑍇 𑌤𑍁 𑌏𑌕𑌾𑌕𑍀 𑌅𑌤𑍍𑌰 𑌅𑌪𑌵𑌾𑌦𑌃 𑌅𑌨𑍁𑌨𑌾𑌸𑌿𑌕𑌵𑍍𑌯𑌞𑍍𑌜𑌨𑌾𑌤𑍍 𑌪𑍂𑌰𑍍𑌵𑌸𑍍𑌥𑌃 𑌹𑌕𑌾𑌰𑌃 । 𑌏𑌕𑍇 𑌹𑌕𑌾𑌰𑌂 𑌤𑍍𑌯𑌜𑌨𑍍𑌤𑌃 𑌪𑌰𑌸𑍍𑌯 𑌅𑌕𑍍𑌷𑌰𑌸𑍍𑌯 𑌦𑍍𑌵𑌿𑌤𑍍𑌵𑌂 𑌸𑌾𑌧𑌯𑌨𑍍𑌤𑌿 । 𑌅𑌪𑌰𑍇 𑌪𑍂𑌰𑍍𑌵𑌸𑍍𑌥𑌂 𑌹𑌕𑌾𑌰𑌂 𑌪𑌰𑌂 𑌕𑌲𑍍𑌪𑌯𑌨𑍍𑌤𑌿 𑌚𑌿𑌹𑍍𑌨𑌪𑌦𑌂 𑌚𑌿𑌨𑍍𑌹𑌵𑌤𑍍 𑌬𑍍𑌰𑌹𑍍𑌮 𑌬𑍍𑌰𑌮𑍍𑌹𑌵𑌤𑍍 𑌉𑌚𑍍𑌚𑌾𑌰𑌯𑌨𑍍𑌤𑌃 । 𑌈𑌦𑍃𑌕𑍍 𑌪𑌦𑌸𑍍𑌯 𑌅𑌨𑍍𑌤𑌃𑌸𑍍𑌥𑌂 𑌪𑍍𑌰𑌾𑌣𑌪𑌰𑍍𑌯𑌟𑌨𑌂 𑌅𑌨𑍍𑌯𑌤𑍍𑌰𑌾𑌪𑌿 𑌦𑍃𑌶𑍍𑌯𑌤𑍇 𑌲𑌬𑍍𑌧𑌂 𑌧𑍋𑌕𑍍𑌷𑌿 𑌇𑌤𑍍𑌯𑌾𑌦𑌿𑌷𑍁 । 𑌕𑌿𑌨𑍍𑌤𑍁 𑌤𑌾𑌨𑌿 𑌪𑌰𑌿𑌵𑌰𑍍𑌤𑌨𑌾𑌨𑌿 𑌸𑍂𑌤𑍍𑌰𑌬𑌲𑌾𑌤𑍍¹⁰ 𑌸𑌿𑌦𑍍𑌧𑌾𑌨𑌿 । 𑌤𑌾𑌦𑍃𑌶𑌃 𑌸𑍂𑌤𑍍𑌰𑌸𑍍𑌯 𑌅𑌭𑌾𑌵𑌾𑌤𑍍 𑌹𑌕𑌾𑌰𑌸𑍍𑌯 𑌇𑌦𑌂 𑌪𑍍𑌰𑌯𑌾𑌣𑌂 𑌕𑌥𑌂 𑌸𑌾𑌧𑍍𑌯𑌮𑌿𑌤𑌿 𑌪𑍍𑌰𑌶𑍍𑌨𑌃 𑌸𑌮𑍍𑌪𑌦𑍍𑌯𑌤𑍇 ।
• 𑌅𑌨𑍁𑌸𑍍𑌵𑌾𑌰𑌃 । 𑌅𑌗𑍍𑌰𑌿𑌮𑌾𑌤𑍍 𑌅𑌕𑍍𑌷𑌰𑌾𑌤𑍍 𑌅𑌨𑍁𑌸𑍍𑌵𑌾𑌰𑌃 𑌚𑍇𑌤𑍍 𑌪𑌰𑌿𑌵𑌰𑍍𑌤𑍇𑌤 𑌤𑌥𑌾𑌭𑍂𑌤𑌸𑍍𑌯𑌾𑌨𑍁𑌸𑍍𑌵𑌾𑌰𑌸𑍍𑌯 𑌉𑌚𑍍𑌚𑌾𑌰𑌣𑌂 𑌸𑍁𑌕𑌰𑌮𑍍 𑌨𑌾𑌸𑌿𑌕𑍍𑌯𑌵𑌤𑍍 । 𑌅𑌨𑍍𑌯𑌤𑍍𑌰 𑌤𑌸𑍍𑌯 𑌉𑌚𑍍𑌚𑌾𑌰𑌣𑌂 𑌪𑍍𑌰𑌤𑌿𑌦𑍇𑌶𑌂 𑌭𑌿𑌦𑍍𑌯𑌤𑍇 । 𑌸𑍁𑌷𑍍𑌠𑍁 𑌉𑌚𑍍𑌚𑌾𑌰𑌣𑌵𑌿𑌧𑌿𑌃 𑌅𑌨𑍍𑌵𑍇𑌷𑌣𑍀𑌯𑌃 ।
• 𑌵𑌿𑌸𑌰𑍍𑌗𑌃 । 𑌦𑌕𑍍𑌷𑌿𑌣𑌭𑌾𑌰𑌤𑍇 𑌤𑌤𑍍𑌪𑍍𑌰𑌭𑌾𑌵𑌾𑌤𑍍 𑌉𑌤𑍍𑌤𑌰𑍇𑌪𑌿 𑌵𑌿𑌸𑌰𑍍𑌗𑍋 𑌸𑍍𑌵𑌰𑌸𑌹𑌿𑌤𑌹𑌕𑌾𑌰𑌵𑌤𑍍 𑌉𑌚𑍍𑌚𑌾𑌰𑍍𑌯𑌤𑍇 । 𑌸 𑌚 𑌸𑍍𑌵𑌰𑌃 𑌪𑍂𑌰𑍍𑌵𑌤𑌨𑌸𑍍𑌯 𑌸𑍍𑌵𑌰𑌸𑍍𑌯 𑌅𑌨𑍁𑌗𑍁𑌣𑌂 𑌚𑍀𑌯𑌤𑍇 । 𑌰𑌾𑌮𑌃 𑌰𑌾𑌮𑌹𑌵𑌤𑍍 𑌹𑌰𑍇𑌃 𑌹𑌰𑍇𑌹𑍇𑌵𑌤𑍍 𑌗𑍌𑌃 𑌗𑍌𑌹𑍁𑌵𑌚𑍍𑌚 । 𑌏𑌷𑌾 𑌪𑌰𑌮𑍍𑌪𑌰𑌾 𑌸𑍁𑌤𑌰𑌾𑌮𑍍 𑌅𑌶𑍁𑌦𑍍𑌧𑌾 । 𑌵𑌿𑌸𑌰𑍍𑌗𑌃 𑌅𑌰𑍍𑌧𑌮𑌾𑌤𑍍𑌰𑌃 𑌨 𑌤𑍁 𑌸𑌮𑌮𑌾𑌤𑍍𑌰𑌃 । 𑌪𑌾𑌣𑌿𑌨𑍀𑌯𑌶𑌿𑌕𑍍𑌷𑌾𑌯𑌾𑌃 𑌵𑍃𑌦𑍍𑌧𑌪𑌾𑌠 𑌆𑌹 𑌯𑌤𑍍 𑌵𑌿𑌸𑌰𑍍𑌜𑌨𑍀𑌯𑌃 𑌵𑌿𑌵𑍃𑌤𑌕𑌣𑍍𑌠𑌃 𑌶𑍍𑌵𑌾𑌸𑌾𑌨𑍁𑌪𑍍𑌰𑌦𑌾𑌨𑌃 𑌅𑌘𑍋𑌷𑌃 । 𑌹𑌕𑌾𑌰𑌃 𑌸𑌂𑌵𑍃𑌤𑌕𑌣𑍍𑌠𑌃 𑌨𑌾𑌦𑌾𑌨𑍁𑌪𑍍𑌰𑌦𑌾𑌨𑌃 𑌘𑌾𑌷𑌵𑌾𑌂𑌶𑍍𑌚 । 𑌵𑌿𑌸𑌰𑍍𑌗𑌃 𑌕𑌥𑌮𑍍 𑌉𑌚𑍍𑌚𑌾𑌰𑍍𑌯𑌃 𑌇𑌤𑌿 𑌆𑌲𑍋𑌚𑌨𑍀𑌯𑌮𑍍 ।
• 𑌸𑍍𑌵𑌰𑌾𑌃 । 𑌸𑍍𑌵𑌰𑌾𑌃 𑌤𑍍𑌰𑍇𑌧𑌾 𑌉𑌕𑍍𑌤𑌾𑌃 𑌉𑌦𑌾𑌤𑍍𑌤𑌾𑌨𑍁𑌦𑌾𑌤𑍍𑌤𑌸𑍍𑌵𑌰𑌿𑌤𑌾 𑌇𑌤𑌿 । 𑌅𑌦𑍍𑌯 𑌵𑍇𑌦𑌮𑌾𑌤𑍍𑌰𑌪𑍍𑌰𑌭𑌾𑌵𑌾𑌃 𑌪𑌰𑌨𑍍𑌤𑍁 𑌤𑌤𑍍𑌪𑍍𑌰𑌯𑍋𑌗𑌃 𑌸𑌾𑌰𑍍𑌵𑌤𑍍𑌰𑌿𑌕𑌃 𑌆𑌸𑍀𑌤𑍍 𑌇𑌤𑌿 𑌤𑍁 𑌸𑍍𑌪𑌷𑍍𑌟𑌮𑍍 । 𑌤𑍇𑌷𑌾𑌂 𑌸𑌾𑌧𑍂𑌪𑌯𑍋𑌗𑍇𑌨 𑌸𑌮𑌾𑌸𑌾𑌦𑌿𑌕𑌮𑌪𑌿 𑌅𑌸𑌨𑍍𑌦𑌿𑌗𑍍𑌧𑌂 𑌭𑌵𑍇𑌤𑍍 । 𑌪𑍁𑌨𑌶𑍍𑌚 𑌤𑍇 𑌵𑍍𑌯𑌵𑌹𑌾𑌰𑌮𑍍 𑌆𑌨𑍇𑌤𑌵𑍍𑌯𑌾𑌃 𑌕𑌿𑌞𑍍𑌚 𑌕𑌥𑌮𑍍 ।

॥ 𑌇𑌤𑌿 𑌶𑌮𑍍 ॥

---

1. 𑌪𑍍𑌰𑌾𑌰𑍍𑌥𑌨𑌾𑌮𑌿𑌮𑌾𑌮𑍍 𑌅𑌙𑍍𑌗𑍀𑌕𑍃𑌤𑍍𑌯 𑌆𑌤𑍍𑌰𑍇𑌯𑌃 𑌰𑌙𑍍𑌗𑌨𑌾𑌥𑌃 𑌪𑍍𑌰𑌤𑌿𑌸𑍍𑌪𑌨𑍍𑌦𑌨𑌪𑍍𑌰𑍇𑌷𑌣𑍇𑌨 𑌲𑍇𑌖𑌮𑍍 𑌉𑌤𑍍𑌕𑌰𑍍𑌷𑌿𑌤𑌵𑌾𑌨𑍍 𑌇𑌤𑌿 𑌕𑌾𑌰𑍍𑌤𑌜𑍍𑌞𑍍𑌯𑌸𑍍𑌯 𑌸𑍍𑌥𑌾𑌨𑌮𑍍 । ↩

2. 𑌯𑌦𑍍𑌯𑌪𑌿 𑌦𑍍𑌰𑌾𑌵𑌿𑌡𑍍𑌯𑌾𑌂 𑌸𑌕𑌾𑌰𑍋 𑌨 𑌜𑍍𑌞𑌾𑌯𑌤𑍇 𑌤𑌥𑌾𑌪𑌿 𑌅𑌦𑍍𑌯𑌤𑍍𑌵𑍇 𑌸𑌕𑌾𑌰𑌨𑌿𑌮𑌿𑌤𑍍𑌤𑌃 𑌕𑍍𑌲𑍇𑌶𑍋 𑌨 𑌵𑌿𑌦𑍍𑌯𑌤𑍇 । ↩

3. English Wikipedia on places of articulation ↩

4. 𑌸𑌂𑌸𑍍𑌕𑍃𑌤𑌮𑍍 𑌅𑌬𑍍𑌰𑌾𑌹𑍍𑌮𑍍𑌯𑌲𑌿𑌪𑌿𑌦𑍍𑌵𑌾𑌰𑌾 (non-Indic scripts) 𑌲𑍇𑌖𑌿𑌤𑍁𑌂 𑌬𑌹𑍍𑌵𑍍𑌯𑌃 𑌪𑌰𑌿𑌵𑌰𑍍𑌤𑌨𑌯𑍋𑌜𑌨𑌾𑌃 (transliteration schemes) 𑌪𑍍𑌰𑌾𑌪𑍍𑌯𑌨𑍍𑌤𑍇 । 𑌤𑌾𑌸𑍍𑌵𑌨𑍍𑌯𑌤𑌮𑌾 𑌪𑍍𑌰𑌚𑍁𑌰𑌾 ITrans𑌨𑌾𑌮𑍍𑌨𑍀 । 𑌦𑍌𑌰𑍍𑌭𑌾𑌗𑍍𑌯𑌾𑌤𑍍 𑌶𑌿𑌕𑍍𑌷𑌾𑌮𑍍 𑌅𑌜𑍍𑌞𑌾𑌤𑌵𑌦𑍍𑌭𑌿𑌃 𑌰𑌚𑌿𑌤𑌾𑌯𑌾𑌮𑌸𑍍𑌯𑌾𑌂 𑌜𑍍𑌞𑌕𑌾𑌰𑌂 𑌸𑍂𑌚𑌯𑌿𑌤𑍁𑌂 ‘gy’ 𑌇𑌤𑌿 𑌮𑌾𑌰𑍍𑌗𑌾𑌨𑍍𑌤𑌰𑌮𑍍 । 𑌈𑌦𑍃𑌶𑌾𑌮𑍍 𑌦𑍁𑌷𑍍𑌪𑍍𑌰𑌯𑍋𑌗𑌾𑌣𑌾𑌂 𑌬𑌾𑌹𑍁𑌲𑍍𑌯𑌾𑌦𑍇𑌵 ITrans 𑌇𑌤𑍍𑌯𑌸𑍍𑌯𑌾𑌃 𑌅𑌪𑍇𑌕𑍍𑌷𑌯𑌾 𑌯𑍋𑌜𑌨𑌾𑌨𑍍𑌤𑌰𑌂 𑌪𑍍𑌰𑌯𑍁𑌜𑍍𑌯𑌤𑌾𑌮𑍍 । ISO-15919 𑌇𑌤𑌿 𑌅𑌨𑍍𑌤𑌾𑌰𑌾𑌷𑍍𑌟𑍍𑌰𑌿𑌯𑌃 𑌨𑍍𑌯𑌾𑌯𑌃 𑌵𑌰𑍍𑌤𑌤𑍇 𑌯𑌃 𑌬𑌹𑍁𑌷𑍁 𑌪𑍁𑌸𑍍𑌤𑌕𑌾𑌦𑌿𑌷𑍁 𑌚𑌿𑌰𑌕𑌾𑌲𑌾𑌤𑍍 𑌉𑌪𑌯𑍁𑌜𑍍𑌯𑌤𑍇 । 𑌸 𑌚 𑌸𑌙𑍍𑌗𑌣𑌕𑌪𑍍𑌰𑌯𑍋𑌗𑍇𑌪𑌿 𑌭𑌵𑌤𑍁 । ↩

5. 𑌅𑌸𑍍𑌮𑌾𑌤𑍍 𑌰𑌿𑌵𑌦𑍁𑌚𑍍𑌚𑌾𑌰𑌾𑌤𑍍 𑌜𑌾𑌤𑍇𑌷𑍁 𑌪𑍍𑌰𑌮𑌾𑌦𑍇𑌷𑍁 𑌅𑌨𑍍𑌯𑌤𑌮𑌃 𑌯𑌤𑍍 𑌸𑌙𑍍𑌗𑍀𑌤𑌸𑍍𑌯 𑌦𑍍𑌵𑌿𑌤𑍀𑌯𑌸𑍍𑌵𑌰𑌸𑍍𑌯 𑌰𑌿𑌵𑌤𑍍 𑌰𑍇𑌵𑌤𑍍 𑌵𑌾 𑌉𑌚𑍍𑌚𑌾𑌰𑌣𑌮𑍍 । 𑌤𑌤𑍍𑌸𑍍𑌵𑌰𑌸𑍍𑌯 𑌸𑌮𑍍𑌪𑍂𑌰𑍍𑌣𑌂 𑌨𑌾𑌮 𑌋𑌷𑌭 𑌇𑌤𑌿 । ↩

6. 𑌌𑌕𑌾𑌰𑌤𑌤𑍍𑌤𑍍𑌵𑌂 𑌨𑌿𑌹𑌿𑌤𑌂 𑌗𑍁𑌹𑌾𑌯𑌾𑌮𑍍 ↩

7. 𑌪𑍍𑌰𑌶𑍍𑌨 𑌉𑌤𑍍𑌪𑌦𑍍𑌯𑌤𑍇 𑌯𑌤𑍍 𑌅𑌯𑌂 𑌭𑍍𑌰𑌮𑌃 𑌤𑌨𑍍𑌨𑌿𑌮𑌿𑌤 𑌌𑌕𑌾𑌰𑍇 𑌰𑍇𑌫𑌶𑌬𑍍𑌦𑌶𑍍𑌚 𑌕𑍁𑌤𑍋 𑌵𑌾 𑌸𑌮𑍍𑌪𑌨𑍍𑌨𑌾𑌵𑌿𑌤𑌿 । 𑌸𑌮𑌾𑌧𑌾𑌨𑌦𑍍𑌵𑌯𑌂 𑌸𑍍𑌫𑍁𑌰𑌤𑌿 । 𑌯𑌤𑍍 𑌌𑌕𑌾𑌰𑌸𑍍𑌯 𑌵𑍈𑌰𑌲𑍍𑌯𑌾𑌤𑍍 𑌸 𑌚 𑌲𑍃𑌕𑌾𑌰 𑌏𑌵𑍇𑌤𑌿 𑌚𑌿𑌨𑍍𑌤𑌨𑌂 । 𑌤𑌤𑌃 𑌶𑌬𑍍𑌦𑌭𑍍𑌰𑌮𑌸𑍍𑌯 𑌕𑌥𑌮𑌪𑌿 𑌜𑌨𑍍𑌮 । 𑌕𑌾𑌲𑌕𑍍𑌰𑌮𑍇𑌣 𑌌𑌕𑌾𑌰𑌸𑍍𑌯 𑌕𑍍𑌵𑌾𑌚𑌿𑌤𑍍𑌕𑌤𑍍𑌵𑌾𑌤𑍍 𑌨𑍂𑌤𑌨𑌰𑍂𑌪𑌂 𑌨𑌿𑌰𑍍𑌮𑌾𑌤𑌵𑍍𑌯𑌮𑍍 𑌆𑌸𑍀𑌤𑍍 𑌯𑌦𑍍𑌰𑍂𑌪𑌂 𑌲𑍃𑌕𑌾𑌰𑌸𑌮𑍍𑌬𑌦𑍍𑌧𑌮𑍍 𑌅𑌭𑌵𑌤𑍍 । 𑌇𑌦𑌾𑌨𑍀𑌮𑌪𑌿 𑌬𑌹𑍁𑌷𑍁 𑌉𑌤𑍍𑌤𑌰𑌭𑌾𑌰𑌤𑍇 𑌦𑍇𑌵𑌨𑌾𑌗𑌰𑍍𑌯𑌾 𑌪𑍍𑌰𑌕𑌾𑌶𑌿𑌤𑍇𑌷𑍁 𑌪𑍁𑌸𑍍𑌤𑌕𑍇𑌷𑍁 𑌌𑌕𑌾𑌰𑌲𑍃𑌕𑌾𑌰𑌯𑍋𑌃 𑌰𑍂𑌪𑌸𑌮𑌾𑌨𑌤𑌾 𑌦𑍃𑌶𑍍𑌯𑌤𑍇 𑌯𑌤𑍍𑌰 𑌯𑌤𑍍𑌰 𑌨𑌵𑍀𑌨𑌂 𑌚𑌿𑌹𑍍𑌨𑌂 𑌪𑍍𑌰𑌾𑌯𑍇𑌣 𑌅𑌨𑌿𑌰𑍍𑌮𑌿𑌤𑌮𑍍 । 𑌪𑌕𑍍𑌷𑌾𑌨𑍍𑌤𑌰𑌂 𑌯𑌤𑍍 𑌦𑍇𑌵𑌨𑌾𑌗𑌰𑍍𑌯𑌾𑌂 𑌲𑌿𑌪𑌿𑌸𑌮𑍍𑌬𑌨𑍍𑌧 𑌏𑌵 𑌪𑍍𑌰𑌥𑌮𑌃 𑌯𑍇𑌨 𑌜𑌨𑌿𑌤𑌃 𑌌𑌕𑌾𑌰𑍇 𑌰𑍇𑌫𑌶𑍍𑌰𑍁𑌤𑌿𑌪𑍍𑌰𑌮𑌾𑌦𑌃 । 𑌅𑌨𑌯𑍋𑌃 𑌤𑌥𑍍𑌯𑌮𑍍 𑌅𑌨𑍍𑌵𑍇𑌷𑍍𑌯𑌮𑍍 । ↩

8. English Wikipedia on alveolar consonants ↩

9. 𑌭𑌾𑌰𑌤𑍀𑌯𑌾𑌃 𑌦𑍍𑌰𑌮𑌿𑌡𑌾𑌃 𑌅𑌦𑍍𑌯𑌤𑍍𑌵𑍇 𑌕𑍃𑌪𑌿𑌕𑌾𑌦𑌨𑍍𑌤𑍍𑌯𑌭𑍇𑌦𑌂 𑌨 𑌪𑌾𑌲𑌯𑌨𑍍𑌤𑌿 𑌪𑌰𑌨𑍍𑌤𑍁 𑌲𑌙𑍍𑌕𑌾𑌸𑍍𑌥𑍈𑌃 𑌦𑍍𑌰𑌮𑌿𑌡𑍈𑌃 𑌸 𑌭𑍇𑌦𑌃 𑌸𑌂𑌰𑌕𑍍𑌷𑌿𑌤𑍋 𑌰𑌾𑌜𑌤𑍇 । ↩

10. 𑌏𑌕𑌾𑌚𑍋 𑌬𑌶𑍋 𑌭𑌷𑍍 𑌝𑌷𑌨𑍍𑌤𑌸𑍍𑌯 𑌸𑍍𑌧𑍍𑌵𑍋𑌃 । 𑌝𑌷𑌸𑍍𑌤𑌥𑍋𑌰𑍍𑌧𑍋𑌧𑌃 । ↩