𑌹𑌿𑌮𑌪𑌾𑌤𑌃

Sun, 09 Jan, 2011•ambarish

𑌨𑌵𑌵𑌰𑍍𑌷𑌦𑍇𑌶𑍀𑌯𑌃 𑌬𑌾𑌲𑌃 𑌆𑌸𑌮𑍍 । 𑌨𑌾𑌗𑌪𑌟𑍍𑌟𑌨𑌾𑌤𑍍 𑌧𑌰𑍍𑌮𑌪𑍁𑌰𑍀𑌂 𑌪𑍍𑌰𑌤𑌿 𑌵𑌾𑌸𑌂 𑌪𑌰𑌿𑌵𑍃𑌤𑍍𑌤𑌮𑍍 । 𑌪𑌞𑍍𑌚 𑌮𑌾𑌸𑌾𑌶𑍍𑌚 𑌅𑌤𑍀𑌤𑌾𑌃 । 𑌨𑌵𑍀𑌨𑍇 𑌸𑍍𑌥𑌾𑌨𑍇 𑌮𑌮 𑌮𑌿𑌤𑍍𑌰𑌾𑌣𑌿 𑌤𑍁 𑌦𑍍𑌵𑌿𑌤𑍍𑌰𑌾𑌣𑌿 ।

𑌮𑌧𑍍𑌯𑌾𑌹𑍍𑌨𑍇 𑌵𑌿𑌦𑍍𑌯𑌾𑌲𑌯𑍇 𑌇𑌤𑌿𑌹𑌾𑌸𑌪𑌾𑌠𑌸𑍍𑌯 𑌭𑌙𑍍𑌗𑌂 𑌕𑍁𑌰𑍍𑌵𑌤𑍀 𑌉𑌚𑍍𑌚𑌘𑍋𑌷𑌣𑌾 𑌆𑌕𑌰𑍍𑌣𑌿𑌤𑌾 । 𑌮𑌹𑌾𑌵𑍃𑌷𑍍𑌟𑍇𑌃 𑌸𑌮𑍍𑌭𑌾𑌵𑌨𑌾𑌤𑌃 𑌸𑌰𑍍𑌵𑍇 𑌛𑌾𑌤𑍍𑌰𑌾𑌃 𑌅𑌧𑍁𑌨𑌾 𑌗𑍃𑌹𑌂 𑌪𑍍𑌰𑌤𑌿𑌗𑌚𑍍𑌛𑍇𑌯𑍁𑌃 । 𑌸𑍍𑌵𑌾𑌲𑌯𑌂 𑌪𑍍𑌰𑌾𑌪𑍍𑌯 𑌕𑍍𑌰𑍀𑌡𑌨𑌕𑍇𑌨 𑌸𑌾𑌨𑌨𑍍𑌦𑌂 𑌕𑍍𑌰𑍀𑌡𑌿𑌤𑍁𑌮𑍍 𑌉𑌦𑍍𑌯𑌤𑍋𑌭𑌵𑌮𑍍 । 𑌅𑌕𑌸𑍍𑌮𑌾𑌤𑍍 𑌪𑌿𑌤𑍃𑌵𑌚𑌨𑌮𑍍 । 𑌅𑌹𑍋 𑌹𑌿𑌮𑌪𑌾𑌤𑌃 । 𑌅𑌮𑍍𑌬𑌰𑍀𑌷 𑌪𑌶𑍍𑌯 𑌪𑌶𑍍𑌯 । 𑌅𑌯𑌮𑍇𑌵 𑌤𑌦𑍍𑌦𑌿𑌨𑍇 𑌮𑌯𑌾 𑌵𑌰𑍍𑌣𑌿𑌤𑌃 । 𑌆𑌶𑍍𑌚𑌰𑍍𑌯𑌚𑌕𑌿𑌤𑌃 𑌸𑌨𑍍 𑌵𑌾𑌤𑌾𑌯𑌨𑌮𑍍 𑌉𑌪𑌸𑌰𑍍𑌪𑍍𑌯 𑌗𑌗𑌨𑌾𑌤𑍍 𑌪𑌤𑌤𑌃 𑌶𑍍𑌵𑍇𑌤𑌬𑌿𑌨𑍍𑌦𑍂𑌨𑍍 𑌅𑌵𑌾𑌲𑍋𑌕𑍇 ।

𑌅𑌲𑌬𑍍𑌧𑌾𑌨𑍁𑌮𑌤𑌿𑌰𑌪𑌿 𑌵𑌿𑌨𑌾 𑌚𑌿𑌨𑍍𑌤𑌨𑌂 𑌬𑌹𑌿𑌰𑌗𑌚𑍍𑌛𑌮𑍍 । 𑌏𑌕𑍈𑌕𑌂 𑌪𑌤𑌨𑍍𑌤𑌂 𑌕𑌣𑌂 𑌕𑌰𑌤𑌲𑍇𑌨 𑌗𑍃𑌹𑍍𑌣𑌾𑌮𑌿 𑌯𑌾𑌵𑌤𑍍 𑌦𑍇𑌹𑍌𑌷𑍍𑌣𑍍𑌯𑍇𑌨 𑌤𑍁𑌷𑌾𑌰𑌃 𑌜𑌲𑍀𑌭𑍂𑌯 𑌹𑌸𑍍𑌤𑌾𑌤𑍍 𑌦𑍍𑌰𑍁𑌤𑌃 । 𑌪𑍁𑌨𑌃 𑌪𑌿𑌤𑍃𑌵𑌚𑌨𑌮𑍍 । 𑌅𑌮𑍍𑌬𑌰𑍀𑌷 𑌕𑌿𑌂 𑌕𑌰𑍋𑌷𑌿 𑌬𑌹𑌿𑌃 𑌶𑍈𑌤𑍍𑌯𑍇 । 𑌅𑌨𑍍𑌤𑌰𑌾𑌗𑌚𑍍𑌛 । 𑌝𑌟𑌿𑌤𑌿 । 𑌨𑍋 𑌚𑍇𑌤𑍍 𑌪𑍀𑌨𑌸𑍇𑌨 𑌬𑌾𑌧𑌿𑌷𑍍𑌯𑌸𑍇 । 𑌤𑌥𑍈𑌵 𑌅𑌨𑍁𑌸𑍃𑌤𑌮𑍍 । 𑌆𑌸𑌾𑌯𑌂 𑌕𑍍𑌰𑍀𑌡𑌾𑌨𑌕𑌾𑌦𑌿𑌕𑌂 𑌤𑍍𑌯𑌕𑍍𑌤𑌂 । 𑌪𑍍𑌰𑌕𑍋𑌷𑍍𑌠𑍇 𑌉𑌪𑌵𑌿𑌷𑍍𑌟𑌂 । 𑌨𑍇𑌤𑍍𑌰𑌦𑍍𑌵𑌯𑌂 𑌚 𑌹𑌿𑌮𑌵𑌤𑌃 𑌜𑌾𑌲𑍇𑌨 𑌬𑌦𑍍𑌧𑌮𑍍 ।

𑌯𑌾𑌵𑌤𑍍 𑌹𑍇𑌮𑌨𑍍𑌤𑌶𑌿𑌶𑌿𑌰𑍌 𑌸𑌮𑌾𑌪𑍍𑌤𑍌 𑌤𑌾𑌵𑌤𑍍 𑌮𑌾𑌤𑍁𑌃 𑌉𑌦𑍍𑌯𑍋𑌗𑌪𑌰𑌿𑌵𑌰𑍍𑌤𑌨𑍇𑌨 𑌨𑌿𑌵𑌾𑌸𑍋𑌪𑌿 𑌪𑌰𑌿𑌵𑌰𑍍𑌤𑌿𑌤𑌃 । 𑌭𑌾𑌵𑌨𑌗𑌰𑍇 𑌹𑌿𑌮𑌪𑌾𑌤𑍋 𑌨𑌾𑌸𑍍𑌤𑌿 𑌇𑌤𑌿 𑌬𑌾𑌲𑌕𑍇𑌨 𑌮𑌯𑌾 𑌨 𑌅𑌪𑍇𑌕𑍍𑌷𑌿𑌤𑌮𑍍 ।

𑌉𑌚𑌿𑌤𑍇 𑌤𑌾𑌪𑍇 𑌉𑌚𑌿𑌤𑍇 𑌚 𑌵𑌾𑌯𑍁𑌬𑌲𑍇 𑌮𑍇𑌘𑌸𑍍𑌥𑌂 𑌵𑌾𑌰𑌿 𑌸𑍍𑌵𑌭𑌾𑌰𑍇𑌣 𑌭𑍂𑌮𑌿𑌂 𑌪𑍍𑌰𑌤𑌿 𑌪𑌤𑌤𑍀𑌤𑌿 𑌵𑌿𑌜𑍍𑌞𑌾𑌨𑌮𑍍 । 𑌶𑍈𑌤𑍍𑌯𑌕𑌾𑌲𑍇𑌷𑍁 𑌤𑌦𑍇𑌵 𑌜𑌲𑌂 𑌶𑌿𑌲𑍀𑌭𑍂𑌯 𑌹𑌿𑌮𑌪𑌾𑌤𑌃 𑌸𑌮𑍍𑌪𑌦𑍍𑌯𑌤𑍇 । 𑌤𑌾𑌦𑍃𑌶𑌾 𑌹𑌿𑌮𑌪𑌾𑌤𑍇𑌨 𑌭𑍂𑌗𑍋𑌲𑌸𑍍𑌯 𑌧𑍍𑌰𑍁𑌵𑍀𑌯𑌾𑌃 𑌪𑍍𑌰𑌾𑌨𑍍𑌤𑌾𑌃 𑌮𑌹𑌾𑌪𑌰𑍍𑌵𑌤𑌶𑌿𑌖𑌾𑌶𑍍𑌚 𑌸𑌾𑌰𑍍𑌵𑌕𑌾𑌲𑌿𑌕𑌹𑌿𑌮𑍇𑌨 𑌆𑌚𑍍𑌛𑌨𑍍𑌨𑌾 𑌵𑌿𑌦𑍍𑌯𑌨𑍍𑌤𑍇 । 𑌭𑍂𑌮𑌧𑍍𑌯𑌰𑍇𑌖𑌾𑌸𑌮𑍀𑌪𑌾𑌃 𑌦𑍇𑌶𑌾𑌸𑍍𑌤𑍁 𑌹𑌿𑌮𑌪𑌾𑌤𑌮𑍇𑌵 𑌨 𑌜𑌾𑌨𑌤𑍇 ।

𑌅𑌥 𑌘𑌨𑍋 𑌜𑌲𑌪𑌾𑌤𑍋𑌪𑌿 𑌦𑌶𑌾𑌧𑌿𑌕𑍈𑌃 𑌪𑍍𑌰𑌕𑌾𑌰𑍈𑌃 𑌲𑌕𑍍𑌷𑌿𑌤𑌃 । 𑌕𑍍𑌵𑌚𑌿𑌤𑍍 𑌸 𑌕𑌣𑌰𑍂𑌪𑍇𑌣 𑌕𑍍𑌵𑌚𑌿𑌤𑍍 𑌶𑌿𑌲𑌾𑌖𑌣𑍍𑌡𑌰𑍂𑌪𑍇𑌣 । 𑌕𑍍𑌵𑌚𑌿𑌤𑍍 𑌸 𑌧𑌾𑌰𑌾𑌵𑌾𑌹𑍀 𑌕𑍍𑌵𑌚𑌿𑌤𑍍 𑌶𑍀𑌕𑌰𑌾 𑌇𑌵 । 𑌜𑌲𑌂 𑌕𑍁𑌤𑍍𑌰 𑌘𑌨𑍀𑌭𑌵𑌤𑌿 𑌇𑌤𑍍𑌯𑌸𑍍𑌯𑌾𑌪𑌿 𑌪𑍍𑌰𑌶𑍍𑌨𑌸𑍍𑌯 𑌵𑌿𑌭𑌿𑌨𑍍𑌨𑌾𑌨𑌿 𑌉𑌤𑍍𑌤𑌰𑌾𑌣𑌿 𑌲𑌭𑍍𑌯𑌨𑍍𑌤𑍇 । 𑌸𑍍𑌵𑌕𑍀𑌯𑍇 𑌮𑍇𑌘𑍇 𑌵𑌾 𑌵𑌾𑌯𑍁𑌨𑌾 𑌉𑌪𑌰𑌿 𑌗𑌤𑍍𑌵𑌾 𑌶𑍀𑌤𑌤𑌰𑍇 𑌮𑍇𑌘𑌾𑌨𑍍𑌤𑌰𑍇 𑌵𑌾 𑌭𑍂𑌮𑌿𑌂 𑌪𑌤𑌤𑍍 𑌶𑍀𑌤𑌵𑌾𑌯𑍁𑌪𑍍𑌰𑌭𑍂𑌤𑌂 𑌵𑌾 𑌶𑍈𑌲𑌤𑍍𑌵𑌂 𑌯𑌾𑌤𑌿 । 𑌅𑌮𑌰𑌃 𑌪𑍍𑌰𑌾𑌹

𑌅𑌵𑌶𑍍𑌯𑌾𑌯𑌸𑍍𑌤𑍁 𑌨𑍀𑌹𑌾𑌰𑌸𑍍𑌤𑍁𑌷𑌾𑌰𑌸𑍍𑌤𑍁𑌹𑌿𑌨𑌂 𑌹𑌿𑌮𑌮𑍍 ।
𑌪𑍍𑌰𑌾𑌲𑍇𑌯𑌂 𑌮𑌿𑌹𑌿𑌕𑌾 𑌚𑌾𑌥 𑌹𑌿𑌮𑌾𑌨𑍀 𑌹𑌿𑌮𑌸𑌂𑌹𑌤𑌿𑌃 ॥

𑌪𑍍𑌰𑌾𑌯𑌶𑌃 𑌶𑍍𑌲𑍋𑌕𑌸𑍍𑌥𑌾𑌨𑌿 𑌭𑌿𑌨𑍍𑌨𑌾𑌨𑌿 𑌪𑌦𑌾𑌨𑌿 𑌭𑌿𑌨𑍍𑌨𑌪𑍍𑌰𑌕𑌾𑌰𑌾𑌨𑍍 𑌹𑌿𑌮𑌪𑌾𑌤𑌾𑌨𑍍 𑌸𑍂𑌚𑌿𑌤𑌵𑌨𑍍𑌤𑌃 𑌸𑍍𑌯𑍁𑌃 । 𑌪𑌰𑌨𑍍𑌤𑍁 𑌅𑌦𑍍𑌯 𑌪𑍍𑌰𑌤𑍍𑌯𑍇𑌕𑌂 𑌪𑌦𑌸𑍍𑌯 𑌸𑍍𑌪𑌷𑍍𑌟𑌾𑌰𑍍𑌥𑌃 𑌨𑌾𑌭𑌿𑌜𑍍𑌞𑌾𑌯𑌤𑍇 ।

𑌧𑌰𑍍𑌮𑌪𑍁𑌰𑍍𑌯𑌾𑌂 𑌵𑌿𑌦𑍍𑌯𑌾𑌭𑍍𑌯𑌾𑌸𑌂 𑌸𑌮𑌾𑌪𑍍𑌯 𑌅𑌮𑍇𑌰𑌿𑌕𑌾𑌵𑌰𑍍𑌤𑌿𑌨𑌂 𑌮𑌹𑌾𑌵𑌿𑌦𑍍𑌯𑌾𑌲𑌯𑌮𑍍 𑌅𑌨𑍁𑌸𑌂𑌧𑌾𑌨𑌾𑌯 𑌪𑍍𑌰𑌾𑌪𑍍𑌨𑌵𑌮𑍍 । 𑌦𑍇𑌶𑌸𑍍𑌯 𑌮𑌧𑍍𑌯𑌭𑌾𑌗𑍇 𑌨𑌿𑌰𑍍𑌜𑌨𑍇 𑌕𑍁𑌗𑍍𑌰𑌾𑌮𑍇 𑌮𑌹𑌾𑌵𑌿𑌦𑍍𑌯𑌾𑌲𑌯𑌃 𑌶𑌤𑌾𑌬𑍍𑌦𑍍𑌯𑌾𑌃 𑌪𑍍𑌰𑌾𑌕𑍍 𑌪𑍍𑌰𑌤𑌿𑌷𑍍𑌠𑌾𑌪𑌿𑌤𑌃 । 𑌮𑌿𑌤𑍍𑌰𑌾𑌭𑌾𑌵𑌾𑌤𑍍 𑌸𑌪𑍍𑌤𑌾𑌹𑌾𑌨𑍍𑌤𑍇𑌷𑍁 𑌕𑌿𑌙𑍍𑌕𑌰𑍍𑌤𑌵𑍍𑌯𑌤𑌾𑌵𑌿𑌮𑍂𑌢𑌃 𑌚𑌲𑌚𑍍𑌚𑌿𑌤𑍍𑌰𑌕𑍍𑌰𑍀𑌡𑌾𑌦𑍍𑌵𑌾𑌰𑌾 𑌕𑌾𑌲𑌂 𑌨𑌯𑌾𑌮𑌿 𑌸𑍍𑌮 । 𑌕𑌦𑌾𑌚𑌿𑌤𑍍 𑌸𑍂𑌰𑍍𑌯𑌾𑌸𑍍𑌤𑌮𑌨𑌵𑍇𑌲𑌾𑌯𑌾𑌂 𑌸𑌹𑌸𑌾 𑌦𑍇𑌵𑍋 𑌵𑍃𑌷𑍍𑌟𑌃 । 𑌪𑌾𑌰𑌦𑌪𑌾𑌤𑌃 𑌜𑌲𑌪𑌾𑌤𑌂 𑌹𑌿𑌮𑌪𑌾𑌤𑌮𑍍 𑌅𑌕𑌾𑌰𑌯𑌤𑍍 । 𑌪𑍁𑌨𑌃 𑌸 𑌏𑌵 𑌨𑌿𑌷𑍍𑌕𑌪𑌟𑌃 𑌵𑌿𑌸𑍍𑌮𑌯𑌃 𑌬𑌾𑌲𑍍𑌯𑍇 𑌅𑌨𑍁𑌭𑍂𑌤𑌃 𑌮𑌾𑌂 𑌪𑍍𑌰𑌵𑌿𑌷𑍍𑌟𑌃 । 𑌵𑌿𑌨𑌾 𑌚𑌿𑌨𑍍𑌤𑌨𑌂 𑌬𑌹𑌿𑌰𑌗𑌚𑍍𑌛𑌮𑍍 । 𑌏𑌕𑍈𑌕𑌂 𑌪𑌤𑌨𑍍𑌤𑌂 𑌕𑌣𑌂 𑌕𑌰𑌤𑌲𑍇𑌨 𑌗𑍃𑌹𑍍𑌣𑌾𑌮𑌿 । 𑌯𑌾𑌵𑌤𑍍 𑌦𑍇𑌹𑍌𑌷𑍍𑌣𑍍𑌯𑍇𑌨 𑌤𑍁𑌷𑌾𑌰𑌃 𑌜𑌲𑍀𑌭𑍂𑌯 𑌹𑌸𑍍𑌤𑌾𑌤𑍍 𑌦𑍍𑌰𑍁𑌤𑌃 । 𑌹𑌿𑌮𑌬𑌿𑌨𑍍𑌦𑌵𑌃 𑌮𑌮 𑌮𑌿𑌤𑍍𑌰𑌾𑌣𑌿 𑌸𑌞𑍍𑌜𑌾𑌤𑌾𑌃 ॥