𑌕𑌾𑌕𑌃 𑌗𑌰𑍁𑌡𑌾𑌯𑌤𑍇

Mon, 24 Jan, 2011•ambarish

𑌦𑌕𑍍𑌷𑌿𑌣𑌾𑌫𑍍𑌰𑌿𑌕𑌾𑌦𑍇𑌶𑌃 𑌅𑌤𑌿𑌸𑍁𑌨𑍍𑌦𑌰𑍈𑌃 𑌵𑌨𑍍𑌯𑌪𑍍𑌰𑌦𑍇𑌶𑍈𑌃 𑌅𑌲𑌙𑍍𑌕𑍃𑌤𑌃 𑌵𑌰𑍍𑌤𑌤𑍇 । 𑌤𑍇𑌷𑍁 𑌪𑍍𑌰𑌦𑍇𑌶𑍇𑌷𑍁 𑌨𑍈𑌕𑌾𑌨𑌿 𑌰𑌾𑌷𑍍𑌟𑍍𑌰𑌿𑌯𑍋𑌦𑍍𑌯𑌾𑌨𑌾𑌨𑌿 𑌅𑌨𑍍𑌤𑌰𑍍𑌗𑌤𑌾𑌨𑌿 𑌸𑌨𑍍𑌤𑌿 𑌯𑌤𑍍𑌰 𑌨𑌾𑌨𑌾𑌵𑌿𑌧𑌾𑌃 𑌵𑌿𑌚𑌿𑌤𑍍𑌰𑌾𑌃 𑌪𑍍𑌰𑌾𑌣𑌿𑌨𑌃 𑌵𑌿𑌰𑌾𑌜𑌨𑍍𑌤𑍇 । 𑌉𑌦𑍍𑌯𑌾𑌨𑌾𑌨𑌾𑌂 𑌬𑍃𑌹𑌤𑍍𑌤𑌮𑌂 𑌕𑍍𑌰𑍂𑌗𑌰𑍍 𑌉𑌦𑍍𑌯𑌾𑌨𑌂 𑌬𑌹𑍁𑌭𑍍𑌯𑌃 𑌵𑌰𑍍𑌷𑍇𑌭𑍍𑌯𑌃 𑌪𑍍𑌰𑌾𑌕𑍍 𑌸𑌰𑍍𑌵𑌕𑌾𑌰𑍇𑌣 𑌸𑌂𑌸𑍍𑌥𑌾𑌪𑌿𑌤𑌮𑍍 𑌆𑌸𑍀𑌤𑍍 । 𑌯𑌦𑍍𑌯𑌪𑌿 𑌵𑌿𑌰𑌲𑌤𑌰𑌾𑌃 𑌬𑌹𑌵𑌃 𑌵𑌨𑌸𑍍𑌪𑌤𑌯𑌃 𑌤𑌤𑍍𑌰 𑌶𑍋𑌭𑌨𑍍𑌤𑍇 । 𑌤𑌥𑌾𑌪𑌿 𑌉𑌦𑍍𑌯𑌾𑌨𑌂 𑌜𑌙𑍍𑌗𑌮𑌾𑌨𑌾𑌂 𑌕𑌾𑌰𑌣𑌾𑌦𑍇𑌵 𑌸𑍁𑌵𑌿𑌖𑍍𑌯𑌾𑌤𑌮𑍍 𑌅𑌸𑍍𑌤𑌿 । 𑌆𑌫𑍍𑌰𑌿𑌕𑌾𑌖𑌣𑍍𑌡𑌸𑍍𑌯 𑌬𑍃𑌹𑌤𑍍𑌪𑌞𑍍𑌚𑌕𑌾𑌃 𑌇𑌤𑍍𑌯𑌭𑌿𑌧𑍇𑌯𑌾𑌃 𑌸𑌿𑌂𑌹𑌗𑌜𑌮𑌹𑌿𑌷𑌚𑌿𑌤𑍍𑌰𑌕𑌗𑌣𑍍𑌡𑌾𑌃 𑌤𑌤𑍍𑌰 𑌦𑌰𑍍𑌶𑌨𑌾𑌰𑍍𑌹𑌾 𑌇𑌤𑌿 𑌉𑌦𑍍𑌯𑌾𑌨𑌸𑍍𑌯 𑌮𑌾𑌹𑌾𑌤𑍍𑌮𑍍𑌯𑌮𑍍 । 𑌤𑌤𑍍𑌰𑍈𑌵 𑌤𑍀𑌕𑍍𑌷𑍍𑌣𑌦𑌨𑍍𑌤𑌾𑌃 𑌮𑌕𑌰𑌾𑌶𑍍𑌚 𑌨𑌦𑍀𑌃 𑌪𑌰𑌿𑌰𑌕𑍍𑌷𑌨𑍍𑌤𑌿 𑌤𑍀𑌕𑍍𑌷𑍍𑌣𑌖𑌡𑍍𑌗𑌾𑌃 𑌰𑌕𑍍𑌷𑌕𑌾𑌃 𑌪𑍍𑌰𑌾𑌕𑌾𑌰𑌾𑌨𑍍 𑌇𑌵 ।

𑌤𑌾𑌰𑌣𑌸𑌂𑌵𑌤𑍍𑌸𑌰𑌸𑍍𑌯 𑌵𑌰𑍍𑌷𑌰𑍍𑌤𑍌 𑌤𑌤𑍍𑌰𑌤𑍍𑌯𑌾 𑌕𑌾𑌚𑌿𑌤𑍍 𑌘𑌟𑌨𑌾 𑌜𑌾𑌤𑌾 । 𑌸𑍌𑌭𑌾𑌗𑍍𑌯𑌂 𑌯𑌤𑍍 𑌅𑌦𑍍𑌭𑍁𑌤𑌸𑍍𑌯𑌾𑌸𑍍𑌯 𑌸𑌮𑍍𑌭𑌵𑌸𑍍𑌯 𑌚𑌲𑌚𑍍𑌚𑌿𑌤𑍍𑌰𑌂 𑌕𑍈𑌶𑍍𑌚𑌨 𑌪𑌰𑍍𑌯𑌟𑌕𑍈𑌃 𑌪𑌰𑌿𑌰𑌕𑍍𑌷𑌿𑌤𑌮𑍍 ।

𑌜𑌲𑌬𑌨𑍍𑌧𑌕𑌾𑌤𑍍 𑌜𑌾𑌤𑌸𑍍𑌯 𑌤𑌡𑌾𑌗𑌸𑍍𑌯 𑌤𑍀𑌰𑍇 𑌮𑌹𑌿𑌷𑌾𑌃 𑌤𑍃𑌷𑍍𑌣𑌾𑌂 𑌪𑍍𑌰𑌶𑌾𑌨𑍍𑌤𑍁𑌮𑍍 𑌆𑌯𑌾𑌤𑌾𑌃 । 𑌪𑌾𑌰𑍍𑌶𑍍𑌵𑌸𑍍𑌥𑌾𑌃 𑌸𑌿𑌂𑌹𑍍𑌯𑌃 𑌤𑌦𑍍𑌵𑍀𑌕𑍍𑌷𑌮𑌾𑌣𑌾𑌃 𑌕𑌲𑍍𑌪𑌿𑌤𑌾𑌹𑌾𑌰𑌾𑌃 𑌸𑌤𑍍𑌯𑌃 𑌆𑌕𑍍𑌰𑌾𑌨𑍍𑌤𑍁𑌂 𑌸𑌿𑌦𑍍𑌧𑌾 𑌅𑌭𑌵𑌨𑍍 ।

𑌮𑌹𑌿𑌷𑌸𑌮𑍂𑌹𑍇 𑌤𑍀𑌰𑌮𑍍 𑌉𑌪𑌗𑌤𑍇 𑌸𑌿𑌂𑌹𑍍𑌯𑌃 𑌆𑌕𑍍𑌰𑌮𑌣𑌂 𑌪𑍍𑌰𑌾𑌰𑌭𑌨𑍍𑌤 । 𑌭𑌯𑌤𑍍𑌰𑌸𑍍𑌤𑌮𑌨𑌸𑌃 𑌮𑌹𑌿𑌷𑌾 𑌇𑌤𑌸𑍍𑌤𑌤𑌃 𑌪𑌰𑌿𑌧𑌾𑌵𑌨𑍍𑌤𑌃 𑌕𑍍𑌷𑍇𑌮𑍋𑌪𑌾𑌯𑌾𑌨𑍍𑌵𑍇𑌷𑌣𑌤𑌤𑍍𑌪𑌰𑌾𑌃 । 𑌸𑌿𑌂𑌹𑍍𑌯𑌸𑍍𑌤𑍁 𑌦𑍁𑌰𑍍𑌬𑌲𑌾𑌨𑍍 𑌨𑌿𑌷𑍍𑌕𑌪𑌟𑌾𑌨𑍍 𑌵𑌤𑍍𑌸𑌾𑌨𑍍 𑌏𑌵 𑌵𑌧𑍍𑌯𑌾𑌨𑍍 𑌅𑌮𑌨𑍍𑌯𑌨𑍍𑌤 । 𑌤𑌦𑌰𑍍𑌥𑌂 𑌗𑌵𑌲𑌸𑌮𑍂𑌹𑌮𑍍 𑌇𑌤𑌸𑍍𑌤𑌤𑌃 𑌵𑌿𑌦𑍍𑌰𑍁𑌤𑍍𑌯 𑌏𑌕𑌾𑌕𑌿𑌨𑌂 𑌵𑌤𑍍𑌸𑌂 𑌪𑌦𑍇 𑌕𑍃𑌤𑍍𑌵𑌾 𑌜𑌲𑍇 𑌅𑌪𑌾𑌤𑌯𑌨𑍍 । 𑌯𑌾𑌵𑌤𑌾 𑌸 𑌵𑌤𑍍𑌸𑌃 𑌭𑍀𑌤𑍍𑌯𑍁𑌨𑍍𑌮𑌤𑍍𑌤𑌃 𑌪𑌦𑍈𑌃 𑌜𑌲𑌮𑍍 𑌅𑌤𑌾𑌡𑌯𑌤𑍍 𑌜𑌲𑌵𑌾𑌸𑍀 𑌮𑌕𑌰𑌃 𑌅𑌕𑌸𑍍𑌮𑌾𑌤𑍍 𑌉𑌦𑍍𑌭𑍂𑌤𑌃 𑌗𑌭𑍀𑌰𑌜𑌲𑌂 𑌪𑍍𑌰𑌤𑌿 𑌵𑌤𑍍𑌸𑌮𑍍 𑌆𑌕𑌰𑍍𑌷𑌯𑌤𑍍 । 𑌪𑍍𑌰𑌚𑌲𑌿𑌤𑍇 𑌮𑌕𑌰𑌸𑌿𑌂𑌹𑍀𑌨𑌾𑌂 𑌯𑍁𑌦𑍍𑌧𑍇 𑌵𑌿𑌜𑌿𑌤𑌵𑌤𑍍𑌯𑌃 𑌸𑌿𑌂𑌹𑍍𑌯𑌃 𑌮𑌾𑌂𑌸𑌂 𑌭𑍋𑌕𑍍𑌤𑍁𑌂 𑌯𑌾𑌵𑌤𑍍 𑌉𑌦𑍍𑌯𑌤𑌾𑌃 𑌤𑌾𑌵𑌤𑍍 𑌤𑌾𑌃 𑌮𑌹𑌿𑌷𑍈𑌃 𑌪𑍁𑌨𑌰𑍇𑌕𑍀𑌭𑍂𑌯 𑌉𑌪𑌸𑍃𑌪𑍍𑌤𑌾𑌃 ।

𑌤𑌥𑌾𑌪𑌿 𑌸𑌿𑌂𑌹𑍀𑌨𑌾𑌂 𑌭𑍋𑌜𑌨𑌂 𑌪𑍍𑌰𑌵𑌰𑍍𑌤𑌮𑌾𑌨𑌮𑍍 𑌏𑌵 । 𑌪𑌰𑍍𑌯𑌟𑌕𑌾𑌨𑌾𑌂 𑌧𑍍𑌵𑌨𑌿𑌮𑍁𑌦𑍍𑌰𑌿𑌤𑌂 𑌮𑌤𑌂 𑌯𑌤𑍍 𑌸 𑌵𑌤𑍍𑌸𑌃 𑌮𑍃𑌤𑌪𑍍𑌰𑌾𑌯𑌃 𑌇𑌤𑌿 । 𑌪𑌰𑌨𑍍𑌤𑍁 𑌝𑌟𑌿𑌤𑌿 𑌏𑌕𑌃 𑌮𑌹𑌿𑌷𑌃 𑌸𑌿𑌂𑌹𑍀𑌭𑍍𑌯𑌃 𑌦𑍁𑌰𑍍𑌬𑌲𑌤𑌮𑌃 𑌸𑌨𑍍𑌨𑌪𑌿 𑌤𑌾𑌃 𑌉𑌪𑍇𑌤𑍍𑌯 𑌪𑌦𑍍𑌭𑌿𑌃 𑌪𑍍𑌰𑌹𑌰𑍍𑌤𑍁𑌮𑍍 𑌆𑌰𑌭𑌤 । 𑌕𑌾𑌕𑍋 𑌗𑌰𑍁𑌡𑌾𑌯𑌤𑍇 𑌸𑍍𑌮 ।

𑌤𑌦𑍍𑌗𑌰𑍁𑌡𑍇𑌨 𑌪𑍍𑌰𑍇𑌰𑌿𑌤𑌾𑌃 𑌇𑌤𑌰𑍇 𑌕𑌾𑌕𑌾𑌃 𑌅𑌪𑌿 𑌆𑌕𑍍𑌰𑌾𑌨𑍍𑌤𑍁𑌕𑌾𑌮𑌾𑌃 𑌸𑌿𑌂𑌹𑍀𑌭𑌯𑌹𑍇𑌤𑌵𑌃 𑌪𑌰𑌿𑌵𑌰𑍍𑌤𑌿𑌤𑌾𑌃 । 𑌸𑌿𑌂𑌹𑍍𑌯𑌾𑌃 𑌉𑌤𑍍𑌕𑍍𑌷𑍇𑌪𑍇𑌣 𑌸𑌂𑌗𑍍𑌰𑌾𑌮𑌃 𑌸𑌮𑌾𑌰𑌬𑍍𑌧𑌃 । 𑌰𑌣𑌭𑍂𑌮𑍍𑌯𑌾𑌂 𑌭𑍂𑌯𑌾𑌨𑍍 𑌰𑌕𑍍𑌤𑌪𑍍𑌰𑌵𑌾𑌹𑌃 𑌦𑍃𑌷𑍍𑌟𑌃 ।

𑌪𑍍𑌰𑌵𑌰𑍍𑌤𑌮𑌾𑌨𑍇 𑌯𑍁𑌦𑍍𑌧𑍇 𑌸 𑌵𑌤𑍍𑌸𑌃 𑌰𑍁𑌧𑌿𑌰𑌮𑌯𑌚𑌰𑍍𑌮𑌾 𑌆𑌤𑍍𑌮𑌾𑌨𑌂 𑌪𑍍𑌰𑌾𑌪𑍍𑌤𑌜𑍀𑌵𑌨𑌂 𑌮𑌤𑍍𑌵𑌾 𑌸𑍍𑌵𑌸𑌮𑍂𑌹𑌮𑌧𑍍𑌯𑌮𑍍 𑌅𑌗𑌚𑍍𑌛𑌤𑍍 । 𑌤𑌸𑍍𑌯 𑌪𑍁𑌨𑌰𑍍𑌜𑍀𑌵𑌨𑌂 𑌕𑍁𑌟𑍁𑌮𑍍𑌬𑍇 𑌪𑍁𑌨𑌸𑍍𑌸𑌾𑌹𑌸𑌮𑍍 𑌅𑌜𑌨𑌯𑌤𑍍 । 𑌮𑌹𑌿𑌷𑍈𑌃 𑌕𑍃𑌤𑌾𑌤𑍍 𑌅𑌨𑍍𑌤𑌿𑌮𑌾𑌤𑍍 𑌆𑌕𑍍𑌰𑌮𑌣𑌾𑌤𑍍 𑌸𑌿𑌂𑌹𑍍𑌯𑌃 𑌪𑌲𑌾𑌯𑌨𑍍𑌤 ।

𑌚𑌿𑌤𑍍𑌰𑌮𑌿𑌦𑌂 𑌜𑌾𑌲𑌪𑍁𑌟𑌾𑌤𑍍 𑌲𑌬𑍍𑌧𑍁𑌂 𑌶𑌕𑍍𑌯𑌤𑍇 । 𑌅𑌵𑌶𑍍𑌯𑌂 𑌪𑌶𑍍𑌯𑌤 ।