𑌮𑍁𑌗𑍍𑌧𑌸𑍍𑌵𑌾𑌮𑌿𑌦𑍀𑌕𑍍𑌷𑌿𑌤𑌃

Sun, 24 Apr, 2011•ambarish•music

𑌦𑌕𑍍𑌷𑌿𑌣𑌭𑌾𑌰𑌤𑍀𑌯𑌶𑌾𑌸𑍍𑌤𑍍𑌰𑍀𑌯𑌸𑌙𑍍𑌗𑍀𑌤𑌲𑍋𑌕𑌃 𑌅𑌨𑍇𑌕𑍈𑌰𑍍𑌵𑌾𑌗𑍍𑌗𑍇𑌯𑌕𑌾𑌰𑍈𑌃 𑌸𑌮𑌲𑌙𑍍𑌕𑍃𑌤𑍋 𑌵𑌿𑌦𑍍𑌯𑌤𑍇 । 𑌤𑍇𑌷𑍁 𑌤𑍍𑌰𑌿𑌮𑍂𑌰𑍍𑌤𑌿𑌨𑌾𑌮𑌾𑌨𑍋 𑌵𑌿𑌖𑍍𑌯𑌾𑌤𑌾𑌃 । 𑌤𑍍𑌰𑌿𑌮𑍂𑌰𑍍𑌤𑌿𑌷𑍍𑌵𑌨𑍍𑌯𑌤𑌮𑌃 𑌕𑌵𑌿𑌃 𑌵𑍈𑌣𑌿𑌕𑍋 𑌗𑌾𑌯𑌕𑌶𑍍𑌚 𑌮𑍁𑌗𑍍𑌧𑌸𑍍𑌵𑌾𑌮𑌿𑌦𑍀𑌕𑍍𑌷𑌿𑌤𑌨𑌾𑌮𑌾 । 𑌤𑌦𑍍𑌰𑌚𑌨𑌾𑌲𑍋𑌕𑌨𑌾𑌯 𑌯𑌤𑍍𑌨𑍋𑌯𑌂 𑌕𑍃𑌤𑌃 ।

𑌜𑍀𑌵𑌿𑌤𑌮𑍍

𑌦𑍍𑌰𑌮𑌿𑌡𑌦𑍇𑌶𑌸𑍍𑌥𑌾 𑌕𑌾𑌵𑍇𑌰𑍀𑌤𑌟𑌸𑍍𑌥𑌿𑌤𑌾 𑌶𑍍𑌰𑍀𑌨𑌗𑌰𑍀 𑌦𑍀𑌕𑍍𑌷𑌿𑌤𑌸𑍍𑌯 𑌜𑌨𑍍𑌮𑌭𑍂𑌮𑌿𑌰𑍍𑌬𑌭𑍂𑌵 । 𑌵𑌿𑌪𑍍𑌰𑌕𑍁𑌲𑌜𑌃 𑌸 𑌵𑍇𑌦𑌾𑌗𑌮𑌶𑌾𑌸𑍍𑌤𑍍𑌰𑌪𑍁𑌰𑌾𑌣𑌾𑌧𑍍𑌯𑌯𑌨𑌂 𑌯𑌥𑌾𑌕𑍍𑌰𑌮𑌂 𑌵𑌿𑌧𑌾𑌯 𑌜𑍍𑌞𑌾𑌨𑌵𑌰𑍍𑌧𑌨𑌾𑌯 𑌪𑌿𑌤𑍍𑌰𑌾 𑌪𑍍𑌰𑍇𑌷𑌿𑌤𑌃 𑌕𑌾𑌶𑍀𑌂 𑌜𑌗𑌾𑌮 । 𑌤𑌸𑍍𑌮𑌾𑌜𑍍𑌜𑌾𑌤𑌃 𑌕𑍍𑌷𑍇𑌤𑍍𑌰𑌾𑌟𑌨𑌵𑍍𑌯𑌵𑌹𑌾𑌰𑌃 𑌆𑌜𑍀𑌵𑌂 𑌤𑍇𑌨 𑌪𑌾𑌲𑌿𑌤𑌃 𑌆𑌸𑍀𑌤𑍍 । 𑌦𑍍𑌰𑌮𑌿𑌡𑌦𑍇𑌶𑌂 𑌪𑍍𑌰𑌤𑍍𑌯𑌾𑌗𑌤𑍍𑌯 𑌤𑌣𑌿𑌕𑌾𑌨𑌗𑌰𑍇 𑌤𑌣𑌿𑌕𑍇𑌶𑍍𑌵𑌰𑌾𑌲𑌯𑍇 𑌸𑌙𑍍𑌗𑍀𑌤𑌰𑌚𑌨𑌾𑌂 𑌪𑍍𑌰𑌾𑌰𑍇𑌭𑍇 । 𑌤𑌸𑍍𑌮𑌾𑌤𑍍 𑌆𑌭𑌾𑌰𑌤𑌵𑌰𑍍𑌷𑌮𑌟𑌨𑍍 𑌪𑍍𑌰𑌤𑍍𑌯𑍇𑌕𑌸𑍍𑌮𑌿𑌨𑍍 𑌭𑌗𑌵𑌦𑍍𑌗𑍃𑌹𑍇 𑌸𑌂𑌸𑍍𑌕𑍃𑌤𑌯𑌾 𑌵𑌾𑌚𑌾 𑌕𑍃𑌤𑍀𑌃 𑌵𑌿𑌰𑌚𑌯𑌾𑌮𑌾𑌸 । 𑌗𑌾𑌨𑍇 𑌵𑌿𑌹𑌾𑌯 𑌵𑍀𑌣𑌾𑌯𑌾𑌮𑌪𑌿 𑌦𑍀𑌕𑍍𑌷𑌿𑌤𑌸𑍍𑌯 𑌨𑍈𑌪𑍁𑌣𑍍𑌯𑌮𑍍 𑌤𑌸𑍍𑌯𑍈𑌵 𑌗𑍀𑌤𑌾𑌦𑍍𑌵𑌿𑌜𑍍𑌞𑌾𑌯𑌤𑍇¹ ।

𑌤𑍍𑌰𑌿𑌮𑍂𑌰𑍍𑌤𑌿𑌸𑍍𑌥𑌾𑌨𑌮𑍍

𑌶𑍍𑌯𑌾𑌮𑌶𑌾𑌸𑍍𑌤𑍍𑌰𑍀 𑌤𑍍𑌯𑌾𑌗𑌰𑌾𑌜𑌃 𑌦𑍀𑌕𑍍𑌷𑌿𑌤𑌶𑍍𑌚𑍇𑌤𑌿 𑌵𑌾𑌗𑍍𑌗𑍇𑌯𑌕𑌾𑌰𑌾𑌃 𑌉𑌪𑌦𑍍𑌵𑌿𑌶𑌤𑌵𑌰𑍍𑌷𑍇𑌭𑍍𑌯𑌃 𑌪𑍍𑌰𑌾𑌕𑍍 𑌤𑌞𑍍𑌜𑌪𑍁𑌰𑍀𑌪𑌾𑌰𑍍𑌶𑍍𑌵𑍇 𑌪𑌞𑍍𑌚𑌨𑌦𑌕𑍍𑌷𑍇𑌤𑍍𑌰𑍇 𑌨𑍍𑌯𑍂𑌷𑍁𑌃 । 𑌯𑌦𑍍𑌯𑌪𑌿 𑌇𑌮𑍇 𑌤𑍍𑌰𑌯𑌃 𑌨𑌾𑌦𑌿𑌮𑌾𑌃 𑌕𑌵𑌯𑌿𑌤𑌾𑌰𑌃 𑌨 𑌵𑌾 𑌗𑌾𑌨𑌸𑌙𑍍𑌖𑍍𑌯𑌯𑌾 𑌬𑍃𑌹𑌾𑌨𑍍𑌤𑌃 । 𑌤𑌥𑌾𑌪𑌿 𑌤𑌦𑍍𑌰𑌚𑌨𑌾𑌨𑌾𑌂 𑌶𑍍𑌰𑍇𑌯𑍋 𑌗𑌾𑌮𑍍𑌭𑍀𑌰𑍍𑌯𑌮𑍍 𑌆𑌧𑍁𑌨𑌿𑌕𑌪𑍍𑌰𑌾𑌚𑍁𑌰𑍍𑌯𑌞𑍍𑌚 𑌮𑌨𑌸𑌿 𑌨𑌿𑌧𑌾𑌯 𑌸𑌮𑌕𑌾𑌲𑌿𑌕𑌾𑌸𑍍𑌤𑍇 𑌸𑌙𑍍𑌗𑍀𑌤𑌤𑍍𑌰𑌿𑌮𑍂𑌰𑍍𑌤𑌯 𑌇𑌤𑍍𑌯𑌭𑌿𑌧𑍀𑌯𑌨𑍍𑌤𑍇 ।

𑌪𑌰𑌨𑍍𑌤𑍁 𑌦𑍀𑌕𑍍𑌷𑌿𑌤𑌸𑍍𑌯 𑌕𑍃𑌤𑍀𑌨𑌾𑌂 𑌶𑍍𑌰𑍇𑌯𑌃 𑌕𑍀𑌦𑍃𑌕𑍍 । 𑌦𑍍𑌯𑍋𑌤𑌨𑍀𑌯𑌾𑌶𑍍𑌚𑌾𑌂𑌶𑌾𑌃 𑌕𑍇 । 𑌤𑌤𑍍𑌕𑍃𑌤𑌯𑌶𑍍𑌚 𑌅𑌨𑍍𑌯𑍇𑌷𑌾𑌂 𑌕𑍃𑌤𑌿𑌭𑌿𑌃 𑌕𑌥𑌂 𑌭𑌿𑌨𑍍𑌨𑌾𑌃 । 𑌅𑌦𑍍𑌯𑌤𑌨𑍇 𑌤𑌾𑌸𑌾𑌂 𑌪𑍍𑌰𑌚𑍁𑌰𑌤𑌾 𑌕𑍍𑌵 । 𑌇𑌤𑌿 𑌵𑌿𑌚𑌾𑌰𑌣𑍀𑌯𑌮𑍍 ।

𑌕𑍍𑌷𑍇𑌤𑍍𑌰𑌾𑌟𑌨𑌮𑍍

𑌦𑍀𑌕𑍍𑌷𑌿𑌤𑍋 𑌭𑌗𑌵𑌦𑍍𑌦𑌰𑍍𑌶𑌨𑌾𑌯𑌾𑌭𑌾𑌰𑌤𑌵𑌰𑍍𑌷𑌂 𑌪𑌰𑌿𑌭𑍍𑌰𑌮𑌤𑌿 𑌸𑍍𑌮 । 𑌮𑌨𑍍𑌦𑌿𑌰𑌂 𑌮𑌨𑍍𑌦𑌿𑌰𑌂 𑌗𑌤𑍍𑌵𑌾 𑌤𑌤𑍍𑌰𑌤𑍍𑌯𑌾𑌂 𑌦𑍇𑌵𑌤𑌾𑌮𑌾𑌧𑌾𑌰𑍀𑌭𑍂𑌤𑌾𑌃 𑌕𑍃𑌤𑍀 𑌰𑌚𑌯𑌤𑌿 𑌸𑍍𑌮 । 𑌪𑍍𑌰𑌤𑍍𑌯𑍇𑌕𑌂 𑌕𑍃𑌤𑍌 𑌕𑍍𑌷𑍇𑌤𑍍𑌰𑌵𑌰𑍍𑌣𑌨𑌂 𑌸𑍍𑌥𑌲𑌪𑍁𑌰𑌾𑌣𑌸𑌙𑍍𑌕𑍍𑌷𑍇𑌪𑌃 𑌶𑌿𑌲𑍍𑌪𑌵𑌰𑍍𑌣𑌨𑌾 𑌤𑌦𑍍𑌦𑍇𑌵𑌦𑌰𑍍𑌶𑌨𑌂 𑌪𑍍𑌰𑌾𑌪𑍍𑌤𑌾𑌨𑌾𑌂 𑌭𑌾𑌗𑌵𑌤𑌾𑌨𑌾𑌂 𑌨𑌾𑌮𑌾𑌵𑌲𑌿𑌃 𑌸𑍍𑌥𑌲𑌵𑍃𑌕𑍍𑌷𑌤𑌡𑌾𑌗𑌾𑌦𑍀𑌨𑌿 𑌵𑌿𑌶𑍇𑌷𑌪𑍂𑌜𑌾𑌵𑌿𑌧𑌯𑌃 𑌉𑌤𑍍𑌸𑌵𑌾𑌶𑍍𑌚𑍇𑌤𑌿 𑌬𑌹𑌵𑍋 𑌹𑍍𑌯𑌂𑌶𑌾 𑌦𑍍𑌯𑍋𑌤𑌿𑌤𑌾𑌃 । 𑌐𑌤𑌿𑌹𑌾𑌸𑌿𑌕𑌦𑍃𑌷𑍍𑌟𑍍𑌯𑌾 𑌦𑍀𑌕𑍍𑌷𑌿𑌤𑌸𑍍𑌯 𑌰𑌚𑌨𑌾𑌃 𑌅𑌮𑍂𑌲𑍍𑌯𑌾 𑌰𑌾𑌜𑌨𑍍𑌤𑍇 𑌯𑌦𑌰𑍍𑌥𑌂 𑌸𑌰𑍍𑌵𑍋 𑌲𑍋𑌕𑌃 𑌕𑍃𑌤𑌜𑍍𑌞𑍋 𑌭𑌵𑍇𑌤𑍍 ।

𑌸𑌂𑌸𑍍𑌕𑍃𑌤𑌕𑍌𑌶𑌲𑌮𑍍

𑌚𑌿𑌰𑌕𑌾𑌲𑌸𑍍𑌯 𑌪𑌰𑌿𑌣𑌾𑌮𑌾𑌤𑍍 𑌨𑌾𑌨𑌾𑌵𑌿𑌧𑌦𑍇𑌶𑍇𑌷𑍁 𑌪𑍍𑌰𑌯𑍋𑌗𑌾𑌚𑍍𑌚 𑌨𑍈𑌕𑍇 𑌭𑍇𑌦𑌾𑌃 𑌸𑌂𑌸𑍍𑌕𑍃𑌤𑌭𑌾𑌷𑌾𑌯𑌾𑌂 𑌸𑌞𑍍𑌜𑌾𑌤𑌾𑌃 𑌸𑌨𑍍𑌤𑌿 । 𑌶𑌬𑍍𑌦𑌭𑌾𑌣𑍍𑌡𑌾𑌰𑌵𑍈𑌪𑍁𑌲𑍍𑌯𑌾𑌤𑍍 𑌵𑍍𑌯𑌾𑌕𑌰𑌣𑌸𑌮𑍍𑌬𑌦𑍍𑌧𑌨𑌿𑌯𑌮𑌸𑍌𑌕𑍍𑌷𑍍𑌮𑍍𑌯𑌾𑌤𑍍 𑌲𑍋𑌕𑍇 𑌵𑍍𑌯𑌵𑌹𑌾𑌰𑌵𑍈𑌰𑌲𑍍𑌯𑌾𑌚𑍍𑌚 𑌤𑌤𑍍𑌪𑍍𑌰𑌾𑌵𑍀𑌣𑍍𑌯𑌮𑍍 𑌅𑌤𑍀𑌵 𑌦𑍁𑌷𑍍𑌕𑌰𑌂 । 𑌦𑍁𑌰𑍍𑌲𑌭𑌯𑌾 𑌤𑌯𑌾 𑌭𑌾𑌷𑌯𑌾 𑌚𑌤𑍁𑌃𑌶𑌤𑌾𑌧𑌿𑌕𑌾𑌃 𑌕𑍃𑌤𑌯𑍋 𑌰𑌚𑌿𑌤𑌾 𑌇𑌤𑌿 𑌨 𑌸𑍍𑌵𑌲𑍍𑌪𑍋 𑌯𑌤𑍍𑌨𑌃 । 𑌨𑌨𑍁 𑌨𑌾𑌨𑌾𑌪𑍍𑌰𑌕𑌾𑌰𑍈𑌃 𑌕𑌾𑌵𑍍𑌯𑌲𑌕𑍍𑌷𑌣𑍈𑌃 𑌦𑍍𑌵𑌿𑌤𑍀𑌯𑌾𑌕𑍍𑌷𑌰𑌪𑍍𑌰𑌾𑌸𑍇𑌨 𑌅𑌨𑍍𑌤𑍍𑌯𑌪𑍍𑌰𑌾𑌸𑍇𑌨 𑌗𑍋𑌪𑍁𑌚𑍍𑌛𑌶𑍍𑌰𑍋𑌤𑍋𑌵𑌹𑌾𑌦𑌿𑌯𑌤𑌿𑌭𑌿𑌃 𑌸𑌪𑍍𑌤𑌭𑌿𑌶𑍍𑌚 𑌵𑌿𑌭𑌕𑍍𑌤𑌿𑌭𑌿𑌰𑌲𑌙𑍍𑌕𑍃𑌤𑌾 𑌇𑌮𑌾𑌃 𑌕𑍃𑌤𑌯𑌃 । 𑌆𑌗𑌮𑌶𑌾𑌸𑍍𑌤𑍍𑌰𑌾𑌦𑌿𑌨𑌾𑌂 𑌚 𑌸𑍁𑌜𑍍𑌞𑌾𑌨𑌾𑌤𑍍 𑌬𑍀𑌜𑌾𑌕𑍍𑌷𑌰𑍈𑌰𑌿𑌤𑌰𑌮𑌨𑍍𑌤𑍍𑌰𑍈𑌃 𑌪𑍍𑌰𑍋𑌕𑍍𑌷𑌿𑌤𑌾𑌃 𑌤𑌾𑌃 𑌶𑍋𑌭𑌨𑍍𑌤𑍇 ।

𑌕𑌿𑌨𑍍𑌤𑍁 𑌮𑌹𑌤𑌿 𑌤𑌤𑍍𑌪𑍍𑌰𑌯𑌤𑍍𑌨𑍇𑌪𑌿 𑌵𑍍𑌯𑌾𑌕𑌰𑌣𑌦𑍋𑌷𑌾𑌃 𑌕𑍍𑌵𑌚𑌿𑌤𑍍 𑌦𑍃𑌶𑍍𑌯𑌨𑍍𑌤 𑌇𑌤𑍍𑌯𑌪𑌿 𑌵𑌾𑌚𑍍𑌯𑌮𑍍 । 𑌮𑌨𑍋𑌲𑍍𑌲𑌾𑌸𑌕𑌰𑌂² 𑌮𑌨𑍋𑌲𑍍𑌲𑌾𑌸𑌿𑌨𑍀𑌂³ 𑌚𑍇𑌤𑌿 𑌅𑌪𑌪𑌦𑍇⁴ । 𑌮𑌨 𑌉𑌲𑍍𑌲𑌾𑌸𑌕𑌰𑌂 𑌮𑌨 𑌉𑌲𑍍𑌲𑌾𑌸𑌿𑌨𑍀𑌮𑍍 𑌚𑍇𑌤𑌿 𑌭𑌵𑍇𑌤𑌾𑌮𑍍 । 𑌅𑌖𑌿𑌲𑌭𑍁𑌵𑌨𑌸𑌾𑌕𑍍𑌷𑌿 𑌕𑌟𑌾𑌕𑍍𑌷𑌿⁵ 𑌇𑌤𑍍𑌯𑌤𑍍𑌰 𑌦𑍋𑌷𑌦𑍍𑌵𑌯𑌮𑍍⁶ 𑌆𑌪𑌨𑍍𑌨𑌮𑍍 । 𑌅𑌖𑌿𑌲𑌭𑍁𑌵𑌨𑌸𑌾𑌕𑍍𑌷𑌿𑌣𑌿 𑌕𑌟𑌾𑌕𑍍𑌷𑌿𑌣𑌿 𑌇𑌤𑍍𑌯𑍇𑌵 𑌭𑌵𑍇𑌤𑌾𑌮𑍍 । 𑌰𑌙𑍍𑌗𑌨𑌾𑌯𑌕𑍀𑌸𑌮𑍇𑌤𑌂⁷ 𑌇𑌤𑍍𑌯𑌤𑍍𑌰 𑌦𑍇𑌵𑍍𑌯𑌾 𑌨𑌾𑌮𑍍𑌨𑌿 𑌙𑍀 𑌦𑍁𑌷𑍍𑌯𑌤𑌿 𑌣𑍍𑌵𑍁𑌲𑍋 𑌵𑌿𑌹𑌿𑌤𑌤𑍍𑌵𑌾𑌤𑍍 । 𑌰𑌙𑍍𑌗𑌨𑌾𑌯𑌿𑌕𑌾𑌸𑌮𑍇𑌤𑌂 𑌇𑌤𑌿 𑌸𑍍𑌯𑌾𑌤𑍍 ।

𑌅𑌪𑌿 𑌚 𑌅𑌨𑍍𑌯𑍇 𑌸𑌂𑌸𑍍𑌕𑍃𑌤𑌨𑌿𑌪𑍁𑌣𑌾𑌃 𑌕𑍃𑌤𑌿𑌵𑌰𑍍𑌣𑌗𑍀𑌤𑌕𑍀𑌰𑍍𑌤𑌨𑌾𑌦𑍀𑌨𑌿 𑌸𑌂𑌸𑍍𑌕𑍃𑌤𑍇𑌨 𑌰𑌚𑌿𑌤𑌵𑌨𑍍𑌤 𑌏𑌵 । 𑌸𑍍𑌵𑌾𑌤𑌿𑌨𑌕𑍍𑌷𑌤𑍍𑌰𑌜𑌾𑌤𑍋 𑌮𑌹𑌾𑌰𑌾𑌜𑌃 𑌶𑍍𑌰𑍀𑌰𑌾𑌮𑌵𑌰𑍍𑌮𑌾 𑌸𑍁𑌨𑍍𑌦𑌰𑍀𑌤𑌮𑌾𑌃 𑌪𑍍𑌰𑌸𑌿𑌦𑍍𑌧𑌾𑌶𑍍𑌚 𑌕𑍃𑌤𑍀𑌃 𑌸𑌸𑍃𑌜 । 𑌸𑌂𑌸𑍍𑌕𑍃𑌤𑌸𑌾𑌹𑌿𑌤𑍍𑌯𑌸𑍌𑌨𑍍𑌦𑌰𑍍𑌯𑌂 𑌦𑍀𑌕𑍍𑌷𑌿𑌤𑍇𑌨𑍇𑌵 𑌶𑍍𑌰𑍀𑌰𑌾𑌮𑌵𑌰𑍍𑌮𑌣𑌾𑌪𑌿 𑌦𑌰𑍍𑌶𑌯𑌾𑌮𑌾𑌸𑍇 । 𑌯𑌥𑌾 𑌰𑌾𑌜𑌾 𑌤𑌥𑍈𑌵 𑌪𑍍𑌰𑌜𑌾𑌃 𑌤𑌤𑍍𑌸𑌦𑌸𑍍𑌯𑌾𑌃 𑌤𑌞𑍍𑌜𑌪𑍁𑌰𑍀𑌚𑌤𑍁𑌷𑍍𑌕𑌨𑌾𑌮𑌕𑌾𑌃 ।

𑌸𑌂𑌸𑍍𑌕𑍃𑌤𑍇𑌤𑌰𑌕𑌵𑌯𑍋𑌪𑌿 𑌸𑌂𑌸𑍍𑌕𑍃𑌤𑌪𑌦𑌾𑌨𑍍𑌯𑍁𑌪𑌯𑍁𑌜𑍍𑌯 𑌵𑌿𑌶𑍇𑌷𑌤𑌯𑌾 𑌅𑌪𑍍𑌰𑌚𑍁𑌰𑌾𑌣𑌿 𑌤𑌤𑍍𑌸𑌮𑌾𑌨𑌿 𑌪𑌦𑌾𑌨𑍍𑌯𑍁𑌪𑌯𑍁𑌜𑍍𑌯 𑌨𑍈𑌕𑌾𑌃 𑌕𑍃𑌤𑍀 𑌰𑌚𑌯𑌾𑌮𑌾𑌸𑍁𑌃 । 𑌤𑍍𑌯𑌾𑌗𑌰𑌾𑌜𑌸𑍍𑌯 𑌕𑍃𑌤𑌯𑌃 𑌮𑍁𑌖𑍍𑌯𑌤𑌯𑌾 𑌆𑌨𑍍𑌧𑍍𑌰𑌭𑌾𑌷𑌯𑍈𑌵 𑌪𑌰𑌂 𑌤𑌦𑍍𑌭𑌾𑌷𑌾𑌯𑌾𑌂 𑌸𑌂𑌸𑍍𑌕𑍃𑌤𑌪𑍍𑌰𑌭𑌾𑌵𑌾𑌤𑍍 𑌸𑌂𑌸𑍍𑌕𑍃𑌤𑌪𑌦𑌾𑌨𑌿 𑌬𑌹𑍁𑌤𑍍𑌰 𑌵𑌿𑌦𑍍𑌯𑌨𑍍𑌤𑍇 । 𑌸𑌮𑌸𑍍𑌤𑌪𑌦𑌪𑍍𑌰𑌯𑍋𑌗𑌾𑌤𑍍 𑌶𑍍𑌲𑍇𑌷𑌾𑌦𑍍𑌯𑌲𑌙𑍍𑌕𑌾𑌰𑍇𑌭𑍍𑌯𑌃 𑌪𑍍𑌰𑌾𑌸𑌾𑌦𑌿𑌲𑌕𑍍𑌷𑌣𑍋𑌪𑌯𑍋𑌗𑌾𑌚𑍍𑌚 𑌤𑍍𑌯𑌾𑌗𑌰𑌾𑌜𑌸𑍍𑌯 𑌸𑍁𑌮𑌹𑌤𑍍 𑌸𑌂𑌸𑍍𑌕𑍃𑌤𑌜𑍍𑌞𑌾𑌨𑌂 𑌪𑍍𑌰𑌤𑍍𑌯𑌕𑍍𑌷𑌮𑍍 𑌅𑌸𑍍𑌤𑌿 ।

𑌉𑌦𑌾𑌹𑌰𑍍𑌤𑍁𑌂 𑌗𑍀𑌤𑌾𑌰𑍍𑌥𑌮𑌿𑌤𑍍𑌯𑌾𑌰𑌭𑌮𑌾𑌣𑌾𑌯𑌾𑌃 𑌕𑍃𑌤𑍇𑌃 𑌏𑌕𑌸𑍍𑌮𑌿𑌨𑍍𑌨𑍇𑌵 𑌚𑌰𑌣𑍇 𑌹𑌰𑌿𑌪𑌦𑌂 𑌤𑍍𑌰𑌿𑌭𑌿𑌰𑌰𑍍𑌥𑍈𑌃 𑌪𑍍𑌰𑌯𑍁𑌯𑍁𑌜𑍇 । 𑌯𑌥𑌾 𑌨𑌾𑌰𑌾𑌯𑌣𑌾𑌰𑍍𑌥𑍇 𑌹𑌰𑌿𑌹𑌰𑌭𑌾𑌸𑍍𑌕𑌰𑌕𑌾𑌲𑌾𑌦𑌿𑌪𑌦𑍇 𑌕𑌪𑍍𑌯𑌰𑍍𑌥𑍇 𑌹𑌰𑌿𑌵𑌰𑌰𑍂𑌪𑌪𑌦𑍇⁸ 𑌸𑍍𑌵𑌰𑍍𑌣𑌾𑌰𑍍𑌥𑍇 𑌹𑌰𑌿𑌹𑌯𑌪𑌦𑍇⁹ 𑌚𑍇𑌤𑌿 ।

𑌤𑍍𑌯𑌾𑌗𑌰𑌾𑌜𑌸𑍍𑌯𑍈𑌵 𑌤𑍍𑌰𑌿𑌚𑌤𑍁𑌰𑌾𑌣𑌿 𑌗𑌾𑌨𑌾𑌨𑌿 𑌸𑌂𑌸𑍍𑌕𑍃𑌤𑍇𑌨 𑌵𑌿𑌦𑍍𑌯𑌨𑍍𑌤𑍇 । 𑌪𑌞𑍍𑌚𑌰𑌤𑍍𑌨𑌕𑍃𑌤𑌿𑌷𑍁 𑌪𑍍𑌰𑌥𑌮𑌾 𑌜𑌗𑌦𑌾𑌨𑌨𑍍𑌦𑌕𑌾𑌰𑌕𑍇𑌤𑍍𑌯𑌾𑌰𑌭𑌮𑌾𑌣𑌾 𑌸𑌂𑌸𑍍𑌕𑍃𑌤𑍈𑌃 𑌦𑌶𑌭𑌿𑌶𑍍𑌚𑌰𑌣𑍈𑌃 𑌭𑍂𑌷𑌿𑌤𑌾 𑌵𑌿𑌰𑌾𑌜𑌤𑍇 । 𑌪𑍁𑌰𑌨𑍍𑌦𑌰𑌦𑌾𑌸𑌸𑍍𑌯 𑌵𑍍𑌯𑌾𑌸𑌰𑌾𑌜𑌸𑍍𑌯 𑌪𑌤𑍍𑌤𑌨𑌵𑌾𑌸𑌿𑌨𑌃 𑌸𑍁𑌬𑍍𑌰𑌹𑍍𑌮𑌣𑍍𑌯𑌾𑌰𑍍𑌯𑌸𑍍𑌯 𑌮𑌹𑌾𑌵𑍈𑌦𑍍𑌯𑌨𑌾𑌥𑌶𑌿𑌵𑌸𑍍𑌯 𑌰𑌾𑌮𑌨𑌾𑌥𑌪𑍁𑌰𑌜𑌾𑌤𑌸𑍍𑌯 𑌶𑍍𑌰𑍀𑌨𑌿𑌵𑌾𑌸𑌾𑌰𑍍𑌯𑌸𑍍𑌯 𑌮𑌹𑌿𑌷𑌪𑍁𑌰𑌨𑌿𑌵𑌾𑌸𑌿𑌨𑌃 𑌵𑌾𑌸𑍁𑌦𑍇𑌵𑌾𑌚𑌾𑌰𑍍𑌯𑌸𑍍𑌯 𑌹𑌰𑌿𑌕𑍇𑌶𑌪𑍁𑌰𑌜𑌾𑌤𑌸𑍍𑌯 𑌮𑍁𑌗𑍍𑌧𑌾𑌰𑍍𑌯𑌭𑌾𑌗𑌵𑌤𑌸𑍍𑌯 𑌚 𑌕𑍃𑌤𑌿𑌷𑍁 𑌸𑌂𑌸𑍍𑌕𑍃𑌤𑌕𑍌𑌶𑌲𑌂 𑌮𑍇𑌧𑌾𑌵𑌿𑌲𑌾𑌸𑌶𑍍𑌚 𑌸𑍍𑌪𑌷𑍍𑌟𑍌 𑌦𑍃𑌶𑍍𑌯𑍇𑌤𑍇 ।

𑌅𑌥 𑌶𑌙𑍍𑌕𑍋𑌦𑍇𑌤𑌿 𑌸𑌂𑌸𑍍𑌕𑍃𑌤𑌲𑍋𑌕𑍇 𑌦𑍀𑌕𑍍𑌷𑌿𑌤𑌕𑍃𑌤𑍀𑌨𑌾𑌂 𑌕𑌿𑌂 𑌸𑍍𑌥𑌾𑌨𑌮𑍍 । 𑌗𑌣𑌯𑌿𑌤𑍁𑌂 𑌸𑌮𑌕𑌾𑌲𑍀𑌨𑌾𑌨𑌿 𑌕𑌾𑌵𑍍𑌯𑌾𑌨𑌿 𑌚𑍇𑌤𑌵𑍍𑌯𑌾𑌨𑌿 𑌕𑌾𑌵𑍍𑌯𑌶𑍈𑌲𑍍𑌯𑌾𑌃 𑌕𑌾𑌲𑌕𑍍𑌰𑌮𑌪𑌰𑌿𑌵𑌰𑍍𑌤𑌨𑌸𑍍𑌯 𑌅𑌪𑌰𑌿𑌗𑌣𑍍𑌯𑌤𑍍𑌵𑌾𑌤𑍍 । 𑌤𑌸𑍍𑌮𑌿𑌨𑍍𑌨𑍇𑌵𑌾𑌵𑌧𑍌 𑌲𑌭𑍍𑌯𑌨𑍍𑌤𑍇 𑌬𑌹𑍂𑌨𑌿 𑌕𑌾𑌵𑍍𑌯𑌾𑌨𑌿 𑌵𑌿𑌵𑌿𑌧𑌾𑌨𑍍 𑌅𑌂𑌶𑌾𑌨𑍍 𑌅𑌧𑌿𑌕𑍃𑌤𑌾𑌨𑌿 । 𑌯𑌥𑌾 𑌵𑌙𑍍𑌗𑌵𑌾𑌸𑌿𑌨𑍋 𑌭𑌰𑌤𑌚𑌨𑍍𑌦𑍍𑌰𑌸𑍍𑌯 𑌗𑌙𑍍𑌗𑌾𑌷𑍍𑌟𑌕𑌂 𑌵𑍇𑌙𑍍𑌕𑌟𑌾𑌧𑍍𑌵𑌰𑌿𑌣𑍋 𑌲𑌕𑍍𑌷𑍍𑌮𑍀𑌸𑌹𑌸𑍍𑌰𑌂 𑌗𑌙𑍍𑌗𑌾𑌦𑍇𑌵𑍍𑌯𑌾 𑌮𑌧𑍁𑌰𑌾𑌵𑌿𑌜𑌯𑌂 𑌵𑌿𑌶𑍍𑌵𑍇𑌶𑍍𑌵𑌰𑌪𑌾𑌣𑍍𑌡𑍇𑌯𑌸𑍍𑌯 𑌰𑍋𑌮𑌵𑌲𑍍𑌲𑍀𑌶𑌤𑌕𑌂 𑌜𑌗𑌨𑍍𑌨𑌾𑌥𑌸𑍍𑌯 𑌰𑌸𑌗𑌙𑍍𑌗𑌾𑌧𑌰𑌂 𑌚𑍇𑌤𑌿 । 𑌤𑍇𑌷𑌾𑌮𑍍 𑌅𑌨𑍁𑌸𑌨𑍍𑌧𑌾𑌨𑌾𑌤𑍍 𑌦𑍀𑌕𑍍𑌷𑌿𑌤𑌕𑍃𑌤𑍀𑌨𑌾𑌂 𑌮𑌧𑍍𑌯𑌮𑌸𑍍𑌤𑌰𑌂 𑌸𑍍𑌪𑌷𑍍𑌟𑌮𑍍 । 𑌕𑌿𑌮𑍁𑌤 𑌕𑌵𑌿𑌶𑍍𑌰𑍇𑌷𑍍𑌠𑌾𑌨𑌾𑌂 𑌵𑍇𑌦𑌾𑌨𑍍𑌤𑌦𑍇𑌶𑌿𑌕𑌾𑌪𑍍𑌪𑌯𑍍𑌯𑌦𑍀𑌕𑍍𑌷𑌿𑌤𑌾𑌦𑍀𑌨𑌾𑌂 𑌕𑌾𑌵𑍍𑌯𑌾𑌨𑌿 ।

𑌕𑍃𑌤𑍀𑌨𑌾𑌂 𑌕𑌰𑍍𑌣𑌰𑌞𑍍𑌜𑌕𑌤𑍍𑌵𑌮𑍍

𑌸𑌙𑍍𑌗𑍀𑌤𑌸𑍍𑌯 𑌸𑌰𑍍𑌵𑌪𑍍𑌰𑌥𑌮𑌂 𑌲𑌕𑍍𑌷𑍍𑌯𑌮𑍍 𑌅𑌸𑍍𑌤𑌿 𑌰𑌸𑌿𑌕𑍇𑌷𑍁 𑌶𑍍𑌰𑍋𑌤𑍍𑌰𑌦𑍍𑌵𑌾𑌰𑌾 𑌰𑌞𑍍𑌜𑌨𑌭𑌾𑌵𑌸𑍍𑌯 𑌵𑍍𑌯𑍁𑌤𑍍𑌪𑌤𑍍𑌤𑌿𑌃 𑌤𑌤𑌶𑍍𑌚 𑌮𑌨𑌸𑌾𑌮𑍍 𑌆𑌕𑌰𑍍𑌷𑌣𑌮𑍍 । 𑌅𑌤𑌃 𑌦𑍀𑌕𑍍𑌷𑌿𑌤𑌸𑍍𑌯 𑌗𑌾𑌨𑌾𑌨𑌿 𑌕𑌿𑌯𑌨𑍍𑌤𑌿 𑌮𑌨𑍋𑌹𑌾𑌰𑍀𑌣𑍀𑌤𑌿 𑌪𑍍𑌰𑌶𑍍𑌨 𑌉𑌦𑍍𑌭𑌵𑌤𑌿 । 𑌵𑌿𑌵𑌿𑌧𑍈𑌃 𑌯𑌤𑌿𑌪𑍍𑌰𑌾𑌸𑌾𑌦𑌿𑌭𑌿𑌃 𑌸𑌙𑍍𑌗𑍀𑌤𑌲𑌕𑍍𑌷𑌣𑍈𑌃 𑌸𑌮𑍍𑌪𑌨𑍍𑌨𑌾𑌨𑌿 𑌸𑌨𑍍𑌤𑍍𑌯𑌪𑌿 𑌲𑌕𑍍𑌷𑍍𑌯𑍇𑌣𑌾𑌪𑍂𑌰𑍍𑌣𑌾𑌨𑌿 । 𑌕𑍍𑌵𑍇𑌤𑌿 𑌵𑌿𑌚𑌾𑌰𑍍𑌯𑌮𑌾𑌣𑍇 𑌦𑍍𑌵𑌿𑌤𑍍𑌰𑌾𑌣𑌿 𑌕𑌾𑌰𑌣𑌾𑌨𑌿 𑌸𑍍𑌫𑍁𑌰𑌨𑍍𑌤𑌿 ।

𑌲𑌯𑌃

𑌦𑍀𑌕𑍍𑌷𑌿𑌤𑌸𑍍𑌯 𑌕𑍃𑌤𑌿𑌷𑍁 𑌲𑌯𑌵𑌿𑌶𑍇𑌷𑌾 𑌵𑌿𑌰𑌲𑌾𑌃 । 𑌬𑌹𑍍𑌵𑍍𑌯𑌃 𑌕𑍃𑌤𑌯𑌃 𑌸𑌮𑌕𑌾𑌲𑌤𑌾𑌲𑍇𑌨𑌾𑌰𑌭𑌨𑍍𑌤𑍇 𑌯𑌰𑍍𑌹𑌿 𑌤𑍍𑌯𑌾𑌗𑌰𑌾𑌜𑌸𑍍𑌯 𑌤𑌦𑌨𑍍𑌵𑌿𑌤𑌾𑌨𑌾𑌂 𑌵𑌾 𑌕𑍃𑌤𑌯𑌃 𑌅𑌤𑍀𑌤𑌤𑌾𑌲𑍇𑌨 𑌉𑌤𑍍𑌪𑌨𑍍𑌨𑌾 𑌵𑌰𑍍𑌤𑌨𑍍𑌤𑍇 । 𑌤𑌦𑌤𑍀𑌤𑌤𑌾𑌲𑍈𑌃 𑌆𑌰𑌮𑍍𑌭𑌾𑌤𑍍 𑌕𑌾𑌚𑌿𑌤𑍍 𑌗𑌤𑌿𑌃 𑌕𑌶𑍍𑌚𑌿𑌤𑍍 𑌵𑍇𑌗𑌃 𑌤𑌤𑌃 𑌕𑌶𑍍𑌚𑌨 𑌮𑌨𑍋𑌭𑌾𑌵𑌶𑍍𑌚 𑌉𑌤𑍍𑌪𑌦𑍍𑌯𑌨𑍍𑌤𑍇 । 𑌵𑌿𑌲𑌮𑍍𑌬𑌕𑌾𑌲𑌾𑌸𑍍𑌵𑌪𑌿 𑌤𑍍𑌯𑌾𑌗𑌰𑌾𑌜𑍀𑌯𑌾𑌸𑍁 𑌕𑍃𑌤𑌿𑌷𑍁 𑌸𑌾𑌹𑌿𑌤𑍍𑌯𑌂 𑌤𑌾𑌲𑌾𑌯 𑌕𑌲𑍍𑌪𑌤𑍇 𑌇𑌤𑌿 𑌵𑌿𑌶𑍇𑌷𑌃 । 𑌪𑍁𑌨𑌶𑍍𑌚 𑌅𑌸𑍍𑌮𑌿𑌨𑍍𑌨𑌪𑌿 𑌕𑍍𑌷𑍇𑌤𑍍𑌰𑍇 𑌲𑌕𑍍𑌷𑌣𑌤𑍍𑌵𑍇𑌨 𑌦𑍀𑌕𑍍𑌷𑌿𑌤𑌸𑍍𑌯 𑌗𑍀𑌤𑌾𑌨𑍍𑌯𑍁𑌤𑍍𑌤𑌮𑌾𑌨𑌿 । 𑌶𑍂𑌲𑌾𑌦𑌿𑌸𑌪𑍍𑌤𑌤𑌾𑌲𑍈 𑌰𑌚𑌿𑌤𑌾𑌨𑌿 𑌤𑌦𑍀𑌯𑌾𑌨𑍇𑌵 𑌨𑌾𑌨𑍍𑌯𑌸𑍍𑌯 । 𑌪𑌰𑌨𑍍𑌤𑍁 𑌤𑌤𑍍𑌕𑍃𑌤𑌿𑌷𑍁 𑌸𑌾𑌹𑌿𑌤𑍍𑌯𑌂 𑌤𑌥𑌾 𑌵𑍍𑌯𑌵𑌸𑍍𑌥𑌾𑌪𑌿𑌤𑌂 𑌯𑌥𑌾 𑌕𑌾𑌚𑌿𑌤𑍍 𑌜𑌾𑌮𑌿𑌤𑍋𑌦𑍍𑌭𑌵𑌤𑌿 𑌲𑌯𑌲𑌕𑍍𑌷𑌣𑌞𑍍𑌚 𑌹𑍀𑌨𑌤𑍍𑌵𑌮𑌿𑌤𑌂 𑌹𑌵𑌤𑌿 ।

𑌉𑌤𑍍𑌤𑌰𑌭𑌾𑌰𑌤𑍀𑌯𑌸𑍍𑌯 𑌶𑌾𑌸𑍍𑌤𑍍𑌰𑍀𑌯𑌸𑌙𑍍𑌗𑍀𑌤𑌸𑍍𑌯 𑌪𑍍𑌰𑌭𑌾𑌵𑌶𑍍𑌚𑌾𑌤𑍍𑌰 𑌕𑌾𑌰𑌣𑌾𑌨𑍍𑌤𑌰𑌂 𑌸𑍍𑌯𑌾𑌤𑍍 । 𑌕𑌾𑌶𑍍𑌯𑌾𑌮𑍁𑌤𑍍𑌤𑌰𑌭𑌾𑌰𑌤𑍀𑌯𑌂 𑌸𑌙𑍍𑌗𑍀𑌤𑌂 𑌦𑍀𑌕𑍍𑌷𑌿𑌤𑍇𑌨 𑌸𑌮𑌧𑍀𑌯𑍇 । 𑌤𑌸𑍍𑌮𑌾𑌦𑌧𑍀𑌤𑌾𑌨𑌿 𑌲𑌕𑍍𑌷𑌣𑌾𑌨𑌿 𑌕𑍃𑌤𑍀𑌃 𑌪𑍍𑌰𑌵𑌿𑌷𑍍𑌟𑌾𑌨𑌿 𑌸𑍍𑌯𑍁𑌃 । 𑌉𑌤𑍍𑌤𑌰𑌭𑌾𑌰𑌤𑍀𑌯𑍇 𑌸𑌙𑍍𑌗𑍀𑌤𑍇 𑌤𑌾𑌲𑌪𑍍𑌰𑌕𑌰𑌣𑌂 𑌸𑌰𑌲𑌤𑌰𑌂 𑌸𑌤𑍍 𑌤𑌤𑍍𑌸𑌙𑍍𑌗𑍀𑌤𑌸𑍍𑌯 𑌮𑍁𑌖𑍍𑌯𑌾𑌂𑌶𑌤𑍍𑌵𑍇𑌨 𑌨 𑌚 𑌪𑌰𑌿𑌗𑌣𑍍𑌯𑌤𑍇 ।

𑌸𑌙𑍍𑌗𑌤𑍍𑌯𑌭𑌾𑌵𑌃

𑌅𑌨𑍍𑌯𑌶𑍍𑌚 𑌹𑍇𑌤𑍁𑌃 𑌕𑍃𑌤𑌿𑌷𑍍𑌵𑌵𑌿𑌦𑍍𑌯𑌮𑌾𑌨𑌾𑌃 𑌸𑌙𑍍𑌗𑌤𑌯𑌃 । 𑌸𑌙𑍍𑌗𑌤𑌿𑌰𑍍𑌨𑌾𑌮 𑌏𑌕𑌸𑍍𑌯𑌾 𑌏𑌵 𑌸𑌾𑌹𑌿𑌤𑍍𑌯𑌪𑌙𑍍𑌕𑍍𑌤𑍇𑌃 𑌪𑍂𑌰𑍍𑌵𑌕𑌲𑍍𑌪𑌿𑌤𑌂 𑌬𑌹𑍁𑌵𑌿𑌧𑌗𑌾𑌨𑌮𑍍 । 𑌪𑍍𑌰𑌾𑌯𑍇𑌣 𑌤𑍍𑌯𑌾𑌗𑌰𑌾𑌜𑌾𑌦𑍀𑌨𑌾𑌂 𑌕𑍃𑌤𑌿𑌷𑍁 𑌸𑌙𑍍𑌗𑌤𑌯𑌃 𑌵𑌾𑌗𑍍𑌗𑍇𑌯𑌕𑌾𑌰𑍇𑌣 𑌸𑍍𑌵𑌯𑌮𑍇𑌵 𑌕𑌲𑍍𑌪𑌿𑌤𑌮𑍍 𑌉𑌤 𑌤𑌚𑍍𑌛𑌿𑌷𑍍𑌯𑍇𑌣 𑌇𑌤𑌿 𑌵𑌿𑌵𑌾𑌦𑌾𑌰𑍍𑌹𑌮𑍍 । 𑌕𑌥𑌂 𑌵𑌾 𑌦𑍀𑌕𑍍𑌷𑌿𑌤𑌸𑍍𑌯 𑌶𑌿𑌷𑍍𑌯𑌾𑌵𑌲𑍍𑌯𑌾 𑌅𑌭𑌾𑌵𑌾𑌦𑍍𑌵𑌾 𑌕𑌾𑌰𑌣𑌾𑌨𑍍𑌤𑌰𑌾𑌦𑍍𑌵𑌾 𑌸𑌙𑍍𑌗𑌤𑌯𑍋 𑌵𑌿𑌰𑌲𑌾𑌃 ।

𑌪𑍍𑌰𑌵𑌰𑌾𑌨𑍍𑌵𑌿𑌤𑌾𑌨𑌾𑌂 𑌸𑌂𑌸𑍍𑌕𑌰𑌣𑌮𑍍

𑌕𑌸𑍍𑌯𑌚𑌿𑌤𑍍 𑌰𑌚𑌨𑌾 𑌭𑍂𑌯𑍋 𑌭𑍂𑌯𑍋 𑌗𑍀𑌯𑌮𑌾𑌨𑌤𑍍𑌵𑍇𑌨 𑌶𑍋𑌭𑌾𑌂 𑌪𑍍𑌰𑌾𑌪𑍍𑌨𑍋𑌤𑌿 𑌤𑌲𑍍𑌲𑌾𑌵𑌣𑍍𑌯𑌂 𑌚 𑌵𑌰𑍍𑌧𑌤𑍇 । 𑌪𑍍𑌰𑌤𑍍𑌯𑍇𑌕𑌂 𑌗𑌾𑌯𑌕𑌃 𑌸𑍍𑌵𑌕𑌲𑍍𑌪𑌨𑌯𑌾 𑌰𑌚𑌨𑌾𑌂 𑌸𑌂𑌸𑍍𑌕𑌰𑌤𑌿 𑌭𑍂𑌷𑌯𑌤𑌿 𑌶𑍋𑌭𑌯𑌤𑍇 𑌚 । 𑌦𑍀𑌕𑍍𑌷𑌿𑌤𑌾𑌨𑍍𑌵𑌿𑌤𑌾𑌨𑌾𑌮𑍍 𑌅𑌸𑌤𑍍𑌤𑌯𑌾 𑌤𑌸𑍍𑌯 𑌰𑌚𑌨𑌾 𑌯𑌦𑍍𑌯𑌪𑌿 𑌅𑌦𑍍𑌯𑌤𑌨𑍇𑌨 𑌪𑍁𑌨𑌃𑌪𑍁𑌨𑌰𑍍𑌗𑌾𑌨𑍇𑌨 𑌶𑍍𑌵𑌃 𑌶𑍋𑌭𑌨𑌤𑌾𑌂 𑌗𑌚𑍍𑌛𑍇𑌯𑍁𑌃 𑌤𑌥𑌾𑌪𑌿 𑌅𑌦𑍍𑌯 𑌅𑌪𑌕𑍍𑌵𑌾 𑌭𑌾𑌸𑌨𑍍𑌤𑍇 ।

𑌅𑌥 𑌸𑌙𑍍𑌗𑍀𑌤𑌕𑌾𑌰𑍇𑌷𑍁 𑌸𑌰𑍍𑌵𑍋𑌤𑍍𑌤𑌮𑌃 𑌸𑌂𑌸𑍍𑌕𑍃𑌤𑌜𑍍𑌞𑍋 𑌦𑍀𑌕𑍍𑌷𑌿𑌤𑌃 𑌸𑍍𑌯𑌾𑌤𑍍 𑌆𑌧𑍁𑌨𑌿𑌕𑍇𑌷𑍁 𑌸𑌂𑌸𑍍𑌕𑍃𑌤𑌕𑌵𑌿𑌷𑍁 𑌸𑌙𑍍𑌗𑍀𑌤𑌜𑍍𑌞𑌾𑌨𑌿𑌤𑌮𑌶𑍍𑌚 । 𑌪𑌰𑌨𑍍𑌤𑍁 𑌸𑌂𑌸𑍍𑌕𑍃𑌤𑌦𑌰𑍍𑌶𑌨𑍇𑌨 𑌤𑌸𑍍𑌯 𑌪𑌦𑍍𑌯𑌾𑌨𑌿 𑌮𑌧𑍍𑌯𑌮𑌾𑌨𑍍𑌯𑍇𑌵 । 𑌤𑌥𑍈𑌵 𑌮𑌨𑌸𑌃 𑌆𑌕𑌰𑍍𑌷𑌣𑌶𑌕𑍍𑌤𑌿𑌃 𑌤𑌸𑍍𑌯 𑌕𑍃𑌤𑌿𑌷𑍁 𑌮𑌧𑍍𑌯𑌮𑍈𑌵 । 𑌬𑍍𑌰𑌹𑍍𑌮𑌵𑌿𑌷𑍍𑌣𑍁𑌮𑌹𑍇𑌶𑌾𑌃 𑌤𑍍𑌰𑌿𑌮𑍂𑌰𑍍𑌤𑌿𑌸𑍍𑌥𑌾𑌨𑌂 𑌭𑌜𑌨𑍍𑌤𑍇 𑌇𑌤𑌿 𑌲𑍋𑌕𑌃 𑌕𑍍𑌷𑍇𑌤𑍍𑌰𑍇 𑌕𑍍𑌷𑍇𑌤𑍍𑌰𑍇 𑌮𑍂𑌰𑍍𑌤𑌿𑌤𑍍𑌰𑌯𑌮𑍍 𑌅𑌨𑍍𑌵𑌿𑌷𑍍𑌯𑌤𑌿 । 𑌤𑌦𑌜𑍍𑌞𑌾𑌨𑌮𑍍 𑌅𑌪𑌾𑌕𑍃𑌤𑍍𑌯 𑌪𑍍𑌰𑌤𑍍𑌯𑍇𑌕𑌂 𑌵𑌾𑌗𑍍𑌗𑍇𑌯𑌕𑌾𑌰𑌂 𑌪𑍃𑌥𑌕𑍍 𑌸𑌂𑌦𑍃𑌶𑍍𑌯 𑌤𑌤𑍍𑌕𑍃𑌤𑍀𑌃 𑌆𑌲𑍋𑌚𑍍𑌯 𑌤𑌤𑍍𑌸𑍍𑌥𑌾𑌨𑌂 𑌮𑌾𑌯𑌾𑌮 ।

---

1. http://sahityam.net/wiki/Bala_Gopala ↩

2. http://sahityam.net/wiki/Neelachala_Natham ↩

3. http://sahityam.net/wiki/SrI_Sulinim ↩

4. 𑌭𑍋𑌭𑌗𑍋𑌅𑌘𑍋𑌅𑌪𑍂𑌰𑍍𑌵𑌸𑍍𑌯 𑌯𑍋𑌶𑌿 𑌲𑍋𑌪𑌃 𑌶𑌾𑌕𑌲𑍍𑌯𑌸𑍍𑌯 𑌇𑌤𑌿 𑌸𑍂𑌤𑍍𑌰𑌾𑌭𑍍𑌯𑌾𑌂 𑌵𑌿𑌸𑌰𑍍𑌗𑌲𑍋𑌪𑌃 𑌸𑌿𑌧𑍍𑌯𑌤𑌿 । 𑌤𑍍𑌰𑌿𑌪𑌦𑍍𑌯𑌾𑌂 𑌪𑍍𑌰𑌵𑌿𑌷𑍍𑌟𑌾𑌯𑌾𑌂 𑌸𑌤𑍍𑌯𑌾𑌂 𑌪𑍂𑌰𑍍𑌵𑌸𑍍𑌯 𑌅𑌸𑌿𑌦𑍍𑌧𑌤𑍍𑌵𑌾𑌤𑍍 𑌗𑍁𑌣𑌸𑌨𑍍𑌧𑌿𑌃 𑌨𑌿𑌷𑌿𑌦𑍍𑌧𑌃 । ↩

5. http://sahityam.net/wiki/Annapoorne_Vishalakshi ↩

6. 𑌕𑌟𑌾𑌕𑍍𑌷𑌃 𑌅𑌸𑍍𑌯 𑌅𑌸𑍍𑌤𑍀𑌤𑌿 𑌇𑌨𑍍𑌨𑌨𑍍𑌤𑌂 𑌕𑌟𑌾𑌕𑍍𑌷𑍀 । 𑌸𑌮𑍍𑌬𑍁𑌦𑍍𑌧𑍌 𑌨 𑌙𑌿𑌸𑌮𑍍𑌬𑍁𑌦𑍍𑌧𑍌 𑌇𑌤𑍍𑌯𑌨𑍇𑌨 𑌕𑌟𑌾𑌕𑍍𑌷𑌿𑌨𑍍 । 𑌦𑍇𑌵𑍍𑌯𑌾𑌃 𑌸𑍍𑌤𑍍𑌰𑍀𑌤𑍍𑌵𑌾𑌤𑍍 𑌋𑌨𑍍𑌨𑍇𑌭𑍍𑌯𑍋 𑌙𑍀𑌪𑍍 𑌇𑌤𑍍𑌯𑌤𑌃 𑌣𑌤𑍍𑌵𑌾𑌚𑍍𑌚 𑌕𑌟𑌾𑌕𑍍𑌷𑌿𑌣𑍀 𑌸𑌮𑍍𑌬𑍁𑌦𑍍𑌧𑍌 𑌏𑌙𑍍𑌹𑍍𑌰𑌸𑍍𑌵𑌾𑌤𑍍𑌸𑌮𑍍𑌬𑍁𑌦𑍍𑌧𑍇𑌃 𑌇𑌤𑌿 𑌹𑍍𑌰𑌸𑍍𑌵𑍇𑌕𑌾𑌰𑍋 𑌵𑌿𑌹𑌿𑌤𑌃 𑌤𑌤𑌃 𑌕𑌟𑌾𑌕𑍍𑌷𑌿𑌣𑌿 𑌇𑌤𑌿 𑌵𑌾𑌚𑍍𑌯𑌮𑍍 । 𑌤𑌥𑍈𑌵 𑌸𑌾𑌕𑍍𑌷𑌿𑌣𑌿 । ↩

7. http://sahityam.net/wiki/Ranga_Nayakam_Bhavaye ↩

8. 𑌹𑌰𑌿𑌵𑌰𑌰𑍂𑌪𑌃 𑌹𑌰𑌿𑌵𑌰𑌸𑍍𑌯 𑌰𑍂𑌪𑌂 𑌯𑌸𑍍𑌯 𑌸𑌃 । 𑌹𑌰𑌿𑌵𑌰𑌃 𑌹𑌰𑍀𑌣𑌾𑌂 𑌵𑌰𑌃 𑌕𑌪𑍀𑌨𑌾𑌂 𑌶𑍍𑌰𑍇𑌷𑍍𑌠𑌃 । 𑌤𑌸𑍍𑌯 𑌕𑌪𑌿𑌶𑍍𑌰𑍇𑌷𑍍𑌠𑌸𑍍𑌯 𑌰𑍂𑌪𑌂 𑌯𑌸𑍍𑌯 𑌸𑌃 𑌹𑌨𑍁𑌮𑌾𑌨𑍍 । ↩

9. 𑌹𑌰𑌿𑌹𑌯𑌃 𑌹𑌰𑌿𑌃 𑌹𑌯𑌃 𑌯𑌸𑍍𑌯 𑌸𑌃 । 𑌹𑌰𑌿𑌃 𑌸𑍍𑌵𑌰𑍍𑌣𑌃 𑌹𑌯𑌃 𑌅𑌶𑍍𑌵𑌃 𑌯𑌸𑍍𑌯 𑌸𑌃 । 𑌸𑍍𑌵𑌰𑍍𑌣𑌾𑌶𑍍𑌵𑌃 𑌦𑍇𑌵𑍇𑌨𑍍𑌦𑍍𑌰𑌃 । ↩