௪௰௫𑌤𑌮𑌸𑍍𑌯 𑌅𑌹𑍋𑌬𑌿𑌲𑌮𑌠𑌾𑌧𑍀𑌶𑌸𑍍𑌯 𑌧𑍍𑌯𑌾𑌨𑌶𑍍𑌲𑍋𑌕𑌃

Sat, 16 Nov, 2013•ambarish•religion

𑌅𑌹𑍋𑌬𑌿𑌲𑌮𑌠𑌾𑌧𑍀𑌶𑌮𑍁𑌭𑌯𑍋𑌪𑌨𑌿𑌷𑌦𑍍𑌗𑍁𑌰𑍁𑌮𑍍 ।
𑌨𑌾𑌰𑌾𑌯𑌣𑌂 𑌮𑌦𑌾𑌚𑌾𑌰𑍍𑌯𑌂 𑌪𑍍𑌰𑌣𑌤𑍋𑌸𑍍𑌮𑌿 𑌮𑍁𑌹𑍁𑌰𑍍𑌮𑍁𑌹𑍁𑌃 ॥

𑌮𑌾𑌤𑌰𑌂 𑌪𑌿𑌤𑌰𑌂 𑌜𑍍𑌯𑍇𑌷𑍍𑌠𑌾𑌨𑍍𑌸𑌰𑍍𑌵𑌾𑌨𑍍𑌕𑍃𑌤𑍍𑌵𑌾 𑌹𑍃𑌦𑌿 𑌸𑍍𑌥𑌿𑌤𑌾𑌨𑍍 ।
𑌇𑌨𑍍𑌦𑌿𑌰𑌾𑌸𑌹𑌿𑌤𑌂 𑌵𑌿𑌷𑍍𑌣𑍁𑌂 𑌨𑌤𑍍𑌵𑌾 𑌲𑍇𑌖𑌮𑍁𑌪𑌕𑍍𑌰𑌮𑍇 ॥

𑌵𑌿𑌶𑌿𑌷𑍍𑌟𑌾𑌦𑍍𑌵𑍈𑌤𑌸𑌿𑌦𑍍𑌧𑌾𑌨𑍍𑌤𑌸𑍍𑌯 𑌶𑍍𑌰𑍀𑌵𑍈𑌷𑍍𑌣𑌵𑌸𑌮𑍍𑌪𑍍𑌰𑌦𑌾𑌯𑌸𑍍𑌯 𑌪𑍍𑌰𑌤𑌿𑌷𑍍𑌠𑌾𑌪𑌯𑌿𑌤𑍁𑌃 𑌶𑍍𑌰𑍀𑌮𑌦𑌹𑍋𑌬𑌿𑌲𑌮𑌠𑌸𑍍𑌯 𑌪𑍀𑌠𑌾𑌧𑌿𑌪𑌤𑌿𑌃 𑌵𑍈𑌕𑍁𑌣𑍍𑌠𑌵𑌾𑌸𑍀 𑌶𑍍𑌰𑍀𑌮𑌨𑍍𑌨𑌾𑌰𑌾𑌯𑌣𑌯𑌤𑍀𑌨𑍍𑌦𑍍𑌰𑌮𑌹𑌾𑌦𑍇𑌶𑌿𑌕𑌃 𑌆𑌸𑍀𑌤𑍍 । 𑌤𑌸𑍍𑌯𑍋𑌪𑌰𑌿 𑌧𑍍𑌯𑌾𑌨𑌶𑍍𑌲𑍋𑌕𑌮𑌿𑌮𑌂 𑌭𑌕𑍍𑌤𑌾𑌃 𑌪𑌾𑌪𑌠𑍍𑌯𑌨𑍍𑌤𑍇 । 𑌸𑍍𑌤𑍁𑌤𑌿𑌰𑌿𑌯𑌂 𑌵𑍍𑌯𑌾𑌖𑍍𑌯𑍇𑌯𑍇𑌤𑌿 𑌧𑌿𑌯𑌾 𑌪𑍍𑌰𑌯𑌤𑍍𑌨𑍇𑌸𑍍𑌮𑌿𑌨𑍍𑌨𑍁𑌦𑍍𑌯𑍁𑌕𑍍𑌤𑍋𑌸𑍍𑌮𑌿 ।

𑌶𑍍𑌰𑍀𑌮𑌦𑍍𑌰𑌙𑍍𑌗𑌶𑌠𑌾𑌰𑌿𑌸𑌂𑌯𑌮𑌿𑌵𑌰𑌾𑌲𑍍𑌲𑌬𑍍𑌧𑌾𑌗𑌮𑌾𑌨𑍍𑌤𑌦𑍍𑌵𑌯𑌂 𑌶𑍍𑌰𑍀𑌮𑌦𑍍𑌵𑍀𑌰𑌰𑌘𑍂𑌦𑍍𑌵𑌹𑌾𑌦𑍍𑌯𑌶𑌠𑌜𑌿𑌤𑍍𑌪𑌾𑌦𑌾𑌰𑌵𑌿𑌨𑍍𑌦𑌾𑌶𑍍𑌰𑌯𑌮𑍍 ।
𑌶𑍍𑌰𑍀𑌮𑌦𑍍𑌵𑍇𑌦𑌵𑌤𑌂𑌸𑌦𑍇𑌶𑌿𑌕𑌯𑌤𑍇𑌃 𑌕𑌾𑌰𑍁𑌣𑍍𑌯𑌵𑍀𑌕𑍍𑌷𑌾𑌸𑍍𑌪𑌦𑌂 𑌸𑍇𑌵𑍇 𑌰𑌙𑍍𑌗𑌧𑍁𑌰𑍀𑌣𑌶𑌾𑌸𑌨𑌵𑌶𑌂 𑌨𑌾𑌰𑌾𑌯𑌣𑌂 𑌯𑍋𑌗𑌿𑌨𑌮𑍍 ॥

𑌶𑍍𑌰𑍀𑌮𑌦𑍍𑌰𑌙𑍍𑌗𑌶𑌠𑌾𑌰𑌿𑌸𑌂𑌯𑌮𑌿𑌵𑌰𑌾𑌤𑍍 𑌲𑌬𑍍𑌧𑌾𑌗𑌮𑌾𑌨𑍍𑌤𑌦𑍍𑌵𑌯𑌂 𑌶𑍍𑌰𑍀𑌮𑌦𑍍𑌵𑍀𑌰𑌰𑌘𑍂𑌦𑍍𑌵𑌹𑌾𑌦𑍍𑌯𑌶𑌠𑌜𑌿𑌤𑍍𑌪𑌾𑌦𑌾𑌰𑌵𑌿𑌨𑍍𑌦𑌾𑌶𑍍𑌰𑌯𑌂 𑌶𑍍𑌰𑍀𑌮𑌦𑍍𑌵𑍇𑌦𑌵𑌤𑌂𑌸𑌦𑍇𑌶𑌿𑌕𑌯𑌤𑍇𑌃 𑌕𑌾𑌰𑍁𑌣𑍍𑌯𑌵𑍀𑌕𑍍𑌷𑌾𑌸𑍍𑌪𑌦𑌂 𑌰𑌙𑍍𑌗𑌧𑍁𑌰𑍀𑌣𑌶𑌾𑌸𑌨𑌵𑌶𑌂 𑌨𑌾𑌰𑌾𑌯𑌣𑌂 𑌯𑍋𑌗𑌿𑌨𑌂 𑌸𑍇𑌵𑍇 । 𑌶𑌾𑌰𑍍𑌦𑍂𑌲𑌵𑌿𑌕𑍍𑌰𑍀𑌡𑌿𑌤𑌮𑍍 ।

𑌅𑌥 𑌶𑍍𑌰𑍀𑌮𑌦𑍍𑌰𑌙𑍍𑌗𑌶𑌠𑌾𑌰𑌿𑌸𑌂𑌯𑌮𑌿𑌵𑌰𑌾𑌤𑍍 । 𑌶𑍍𑌰𑍀𑌮𑌾𑌨𑍍 𑌮𑌙𑍍𑌗𑌲𑌵𑌾𑌨𑍍 𑌅𑌸𑍍𑌯𑌾𑌸𑍍𑌤𑍀𑌤𑌿 𑌮𑌤𑍁𑌪𑍍 । 𑌰𑌙𑍍𑌗𑌂 𑌶𑍍𑌰𑍀𑌰𑌙𑍍𑌗𑌨𑌗𑌰𑌮𑍍 । 𑌶𑌠𑌾𑌰𑌿𑌃 𑌶𑌠𑌸𑍍𑌯𑌾𑌰𑌿𑌃 𑌸𑌂𑌸𑌾𑌰𑌬𑌨𑍍𑌧𑌕𑌶𑌠𑌵𑌾𑌯𑍋𑌃 𑌜𑌨𑍍𑌮𑌨𑌾 𑌶𑌤𑍍𑌰𑍁𑌤𑍍𑌵𑌾𑌤𑍍 𑌭𑌵𑌵𑌿𑌮𑍁𑌕𑍍𑌤𑌤𑍍𑌵𑌾𑌤𑍍 𑌶𑌠𑌕𑍋𑌪𑌮𑍁𑌨𑌿𑌦𑍍𑌯𑍋𑌤𑌕𑌂 𑌨𑌾𑌮𑌧𑍇𑌯𑌮𑍍 । 𑌰𑌙𑍍𑌗𑌂 𑌤𑌦𑍇𑌵 𑌶𑌠𑌾𑌰𑍀 𑌰𑌙𑍍𑌗𑌶𑌠𑌾𑌰𑌿𑌃 । 𑌸𑌂𑌯𑌮𑍀 । 𑌵𑌿𑌯𑌾𑌮𑍋 𑌵𑌿𑌯𑌮𑍋 𑌯𑌾𑌮𑍋 𑌯𑌮𑍋 𑌸𑌂𑌯𑌾𑌮𑌸𑌂𑌯𑌮𑍌 𑌇𑌤𑍍𑌯𑌮𑌰𑌃 । 𑌅𑌸𑍍𑌯𑌾𑌸𑍍𑌤𑍀𑌤𑌿 𑌇𑌨𑍍 । 𑌸𑌂𑌯𑌮𑍀 𑌯𑌤𑌿𑌃 𑌸𑌨𑍍𑌨𑍍𑌯𑌾𑌸𑍀 । 𑌰𑌙𑍍𑌗𑌶𑌠𑌾𑌰𑌿𑌃 𑌸 𑌏𑌵 𑌸𑌂𑌯𑌮𑍀 𑌰𑌙𑍍𑌗𑌶𑌠𑌾𑌰𑌿𑌸𑌂𑌯𑌮𑍀 । 𑌦𑍍𑌵𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌯 𑌪𑌟𑍍𑌟𑌧𑌾𑌰𑌿𑌣𑍋𑌹𑍋𑌬𑌿𑌲𑌮𑌠𑌾𑌧𑍀𑌶𑌸𑍍𑌯 𑌶𑍍𑌰𑍀𑌰𑌙𑍍𑌗𑌶𑌠𑌕𑍋𑌪𑌯𑌤𑍀𑌨𑍍𑌦𑍍𑌰𑌮𑌹𑌾𑌦𑍇𑌶𑌿𑌕𑌸𑍍𑌯 𑌦𑍍𑌯𑍋𑌤𑌕𑌮𑍍 । 𑌶𑍍𑌰𑍀𑌮𑌾𑌨𑌸𑌾𑌵𑍇𑌵 𑌰𑌙𑍍𑌗𑌶𑌠𑌾𑌰𑌿𑌸𑌂𑌯𑌮𑍀 𑌶𑍍𑌰𑍀𑌮𑌦𑍍𑌰𑌙𑍍𑌗𑌶𑌠𑌾𑌰𑌿𑌸𑌂𑌯𑌮𑍀 । 𑌤𑌦𑍍𑌵𑌰𑌃 𑌷𑌷𑍍𑌠𑍀𑌤𑌤𑍍𑌪𑍁𑌰𑍁𑌷𑌃 । 𑌨𑌲𑍋𑌪𑌃 𑌪𑍍𑌰𑌾𑌤𑌿𑌪𑌦𑌿𑌕𑌾𑌨𑍍𑌤𑌸𑍍𑌯𑍇𑌤𑌿 𑌶𑍍𑌰𑍀𑌮𑌦𑍍𑌰𑌙𑍍𑌗𑌶𑌠𑌾𑌰𑌿𑌸𑌂𑌯𑌮𑌿𑌵𑌰𑌃 । 𑌤𑌸𑍍𑌮𑌾𑌤𑍍 । 𑌵𑌿𑌭𑌾𑌷𑌾 𑌗𑍁𑌣𑍋𑌸𑍍𑌤𑍍𑌰𑌿𑌯𑌾𑌮𑍍 𑌇𑌤𑌿 𑌪𑌞𑍍𑌚𑌮𑍀 । 𑌲𑌬𑍍𑌧𑌾𑌗𑌮𑌾𑌨𑍍𑌤𑌦𑍍𑌵𑌯𑌮𑍍 । 𑌆𑌗𑌮𑌾𑌨𑍍𑌤𑍋 𑌵𑍇𑌦𑌾𑌨𑍍𑌤 𑌉𑌪𑌨𑌿𑌷𑌦𑌃 । 𑌤𑌦𑍍𑌦𑍍𑌵𑌯𑌂 𑌦𑍇𑌵𑌭𑌾𑌷𑍋𑌪𑌨𑌿𑌷𑌦𑍋 𑌦𑍍𑌰𑌮𑌿𑌡𑍋𑌪𑌨𑌿𑌷𑌦𑌶𑍍𑌚 । 𑌦𑍍𑌰𑌮𑌿𑌡𑍋𑌪𑌨𑌿𑌷𑌦𑌸𑍍𑌤𑍁 𑌦𑌿𑌵𑍍𑌯𑌸𑍂𑌰𑌿𑌭𑍀 𑌰𑌚𑌿𑌤𑌾𑌃 𑌚𑌤𑍁𑌃𑌸𑌹𑌸𑍍𑌰𑌾𑌣𑌿 𑌦𑌿𑌵𑍍𑌯𑌪𑍍𑌰𑌬𑌨𑍍𑌧𑌾𑌃 𑌵𑍇𑌦𑌵𑌨𑍍𑌮𑍁𑌖𑍍𑌯𑌤𑍍𑌵𑌾𑌤𑍍 𑌉𑌪𑌨𑌿𑌷𑌦𑍍𑌵𑌨𑍍𑌮𑌨𑍍𑌯𑌮𑌾𑌨𑌤𑍍𑌵𑌾𑌤𑍍 𑌤𑌥𑌾𑌭𑌿𑌹𑌿𑌤𑌾𑌃 । 𑌲𑌬𑍍𑌧𑌮𑌾𑌗𑌮𑌾𑌨𑍍𑌤𑌦𑍍𑌵𑌯𑌂 𑌯𑍇𑌨 𑌸𑌃 𑌲𑌬𑍍𑌧𑌾𑌗𑌮𑌾𑌨𑍍𑌤𑌦𑍍𑌵𑌯𑌃 । 𑌤𑌮𑍍 । 𑌶𑍍𑌰𑍀𑌰𑌙𑍍𑌗𑌶𑌠𑌕𑍋𑌪𑌯𑌤𑍀𑌨𑍍𑌦𑍍𑌰𑌮𑌹𑌾𑌦𑍇𑌶𑌿𑌕𑌾𑌤𑍍 𑌕𑌾𑌲𑌕𑍍𑌷𑍇𑌪𑍇𑌣 𑌨𑌾𑌰𑌾𑌯𑌣𑌯𑌤𑍀𑌨𑍍𑌦𑍍𑌰𑌮𑌹𑌾𑌦𑍇𑌶𑌿𑌕𑌃 𑌉𑌭𑌯𑌵𑍇𑌦𑌾𑌨𑍍𑌤𑌸𑌾𑌰𑌮𑍍 𑌅𑌧𑍍𑌯𑍈𑌤 𑌤𑍇𑌨 𑌸𑌮𑌾𑌶𑍍𑌰𑌯𑌣𑌂 𑌚 𑌵𑍍𑌯𑌦𑌧𑌾𑌤𑍍 𑌇𑌤𑌿 𑌸𑍍𑌮𑌾𑌰𑌕𑌃 𑌪𑌾𑌦𑌃 ।

𑌶𑍍𑌰𑍀𑌮𑌦𑍍𑌵𑍀𑌰𑌰𑌘𑍂𑌦𑍍𑌵𑌹𑌾𑌦𑍍𑌯𑌶𑌠𑌜𑌿𑌤𑍍𑌪𑌾𑌦𑌾𑌰𑌵𑌿𑌨𑍍𑌦𑌾𑌶𑍍𑌰𑌯𑌮𑍍 । 𑌰𑌘𑍂𑌦𑍍𑌵𑌹𑌾𑌃 𑌰𑌘𑍁𑌕𑍁𑌲𑍋𑌦𑍍𑌭𑌵𑌾𑌃 𑌤𑍇𑌷𑍍𑌵𑌾𑌦𑍍𑌯𑌃 𑌰𑌘𑍂𑌦𑍍𑌵𑌹𑌾𑌦𑍍𑌯𑍋 𑌰𑌾𑌘𑌵𑌃 । 𑌶𑌠𑌂 𑌜𑌯𑌤𑍀𑌤𑌿 𑌶𑌠𑌜𑌿𑌤𑍍 𑌹𑍍𑌰𑌸𑍍𑌵𑌸𑍍𑌯 𑌪𑌿𑌤𑌿 𑌕𑍃𑌤𑌿 𑌤𑍁𑌗𑌿𑌤𑌿 𑌤𑌕𑌾𑌰𑌾𑌗𑌮𑌃 । 𑌶𑍍𑌰𑍀𑌮𑌾𑌨𑍍 𑌵𑍀𑌰𑌃 𑌰𑌘𑍂𑌦𑍍𑌵𑌹𑌾𑌦𑍍𑌯𑌃 𑌸 𑌏𑌵 𑌶𑌠𑌜𑌿𑌤𑍍 𑌶𑍍𑌰𑍀𑌮𑌦𑍍𑌵𑍀𑌰𑌰𑌘𑍂𑌦𑍍𑌵𑌹𑌾𑌦𑍍𑌯𑌶𑌠𑌜𑌿𑌤𑍍 𑌤𑍍𑌰𑌿𑌚𑌤𑍍𑌵𑌾𑌰𑌿𑌂𑌶𑌂 𑌅𑌹𑍋𑌬𑌿𑌲𑌮𑌠𑌾𑌧𑌿𑌪𑌤𑌿𑌂 𑌵𑍀𑌰𑌰𑌾𑌘𑌵𑌯𑌤𑍀𑌨𑍍𑌦𑍍𑌰𑌮𑌹𑌾𑌦𑍇𑌶𑌿𑌕𑌂 𑌦𑍍𑌯𑍋𑌤𑌯𑌤𑌿 । 𑌪𑌾𑌦𑌾𑌵𑍇𑌵 𑌅𑌰𑌵𑌿𑌨𑍍𑌦𑍇 𑌪𑌾𑌦𑌾𑌰𑌵𑌿𑌨𑍍𑌦𑍇 । 𑌶𑍍𑌰𑍀𑌮𑌦𑍍𑌵𑍀𑌰𑌰𑌘𑍂𑌦𑍍𑌵𑌹𑌾𑌦𑍍𑌯𑌶𑌠𑌜𑌿𑌤𑌃 𑌪𑌾𑌦𑌾𑌰𑌵𑌿𑌨𑍍𑌦𑍇 𑌶𑍍𑌰𑍀𑌮𑌦𑍍𑌵𑍀𑌰𑌰𑌘𑍂𑌦𑍍𑌵𑌹𑌾𑌦𑍍𑌯𑌶𑌠𑌜𑌿𑌤𑍍𑌪𑌾𑌦𑌾𑌰𑌵𑌿𑌨𑍍𑌦𑍇 । 𑌤𑍇 𑌆𑌶𑍍𑌰𑌯𑍋 𑌯𑌸𑍍𑌯 𑌸 𑌶𑍍𑌰𑍀𑌮𑌦𑍍𑌵𑍀𑌰𑌰𑌘𑍂𑌦𑍍𑌵𑌹𑌾𑌦𑍍𑌯𑌶𑌠𑌜𑌿𑌤𑍍𑌪𑌾𑌦𑌾𑌰𑌵𑌿𑌨𑍍𑌦𑌾𑌶𑍍𑌰𑌯𑌃 । 𑌤𑌮𑍍 । 𑌵𑍀𑌰𑌰𑌾𑌘𑌵𑌯𑌤𑍀𑌨𑍍𑌦𑍍𑌰𑌮𑌹𑌾𑌦𑍇𑌶𑌿𑌕𑍇𑌨 𑌨𑌾𑌰𑌾𑌯𑌣𑌯𑌤𑍀𑌨𑍍𑌦𑍍𑌰𑌮𑌹𑌾𑌦𑍇𑌶𑌿𑌕𑌃 𑌯𑌥𑌾𑌵𑌿𑌧𑌿 𑌭𑌰𑌂 𑌸𑌮𑌰𑍍𑌪𑍍𑌯 𑌪𑍍𑌰𑌪𑌨𑍍𑌨𑌤𑍍𑌵𑌂 𑌪𑍍𑌰𑌾𑌪𑍇𑌤𑌿 𑌜𑍍𑌞𑌾𑌪𑌕𑌂 𑌪𑌦𑌮𑍍 ।

𑌶𑍍𑌰𑍀𑌮𑌦𑍍𑌵𑍇𑌦𑌵𑌤𑌂𑌸𑌦𑍇𑌶𑌿𑌕𑌯𑌤𑍇𑌃 । 𑌵𑌤𑌂𑌸𑍋𑌵𑌤𑌂𑌸𑌃 𑌶𑍇𑌖𑌰𑌃 । 𑌪𑍁𑌂𑌸𑍍𑌯𑍁𑌤𑍍𑌤𑌂𑌸𑌾𑌵𑌤𑌂𑌸𑍌 𑌦𑍍𑌵𑍌 𑌕𑌰𑍍𑌣𑌪𑍂𑌰𑍇𑌪𑌿 𑌶𑍇𑌖𑌰𑍇 𑌇𑌤𑍍𑌯𑌮𑌰𑌃 । 𑌅𑌕𑌾𑌰𑍋 𑌲𑍁𑌮𑍍𑌪𑌤𑌿 𑌭𑌾𑌗𑍁𑌰𑌿𑌮𑌤𑌾𑌤𑍍 । 𑌵𑌷𑍍𑌟𑌿 𑌭𑌾𑌗𑍁𑌰𑌿𑌰𑌲𑍍𑌲𑍋𑌪𑌮𑌵𑌾𑌪𑍍𑌯𑍋𑌰𑍁𑌪𑌸𑌰𑍍𑌗𑌯𑍋𑌃 । 𑌵𑍇𑌦𑌵𑌤𑌂𑌸𑍋 𑌵𑍇𑌦𑌾𑌨𑌾𑌂 𑌵𑌤𑌂𑌸𑌃 𑌵𑍇𑌦𑌶𑌿𑌖𑌰𑍋 𑌵𑍇𑌦𑌾𑌨𑍍𑌤𑌃 । 𑌵𑍇𑌦𑌵𑌤𑌮𑍍𑌸𑌦𑍇𑌶𑌿𑌕𑍋 𑌵𑍇𑌦𑌵𑌤𑌂𑌸𑌸𑍍𑌯 𑌦𑍇𑌶𑌿𑌕𑍋 𑌵𑍇𑌦𑌾𑌨𑍍𑌤𑌦𑍇𑌶𑌿𑌕𑌃 । 𑌶𑍍𑌰𑍀𑌮𑌾𑌨𑍍 𑌵𑍇𑌦𑌵𑌤𑌂𑌸𑌦𑍇𑌶𑌿𑌕𑌃 𑌸 𑌏𑌵 𑌯𑌤𑌿𑌃 𑌶𑍍𑌰𑍀𑌮𑌦𑍍𑌵𑍇𑌦𑌵𑌤𑌂𑌸𑌦𑍇𑌶𑌿𑌕𑌯𑌤𑌿𑌃 𑌚𑌤𑍁𑌶𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌯 𑌮𑌠𑌾𑌧𑌿𑌪𑌤𑍇𑌃 𑌵𑍇𑌦𑌾𑌨𑍍𑌤𑌦𑍇𑌶𑌿𑌕𑌯𑌤𑍀𑌨𑍍𑌦𑍍𑌰𑌮𑌹𑌾𑌦𑍇𑌶𑌿𑌕𑌸𑍍𑌯𑌾𑌭𑌿𑌧𑌾 । 𑌕𑌾𑌰𑍁𑌣𑍍𑌯𑌵𑍀𑌕𑍍𑌷𑌾𑌸𑍍𑌪𑌦𑌮𑍍 । 𑌕𑌰𑍁𑌣𑍈𑌵 𑌕𑌾𑌰𑍁𑌣𑍍𑌯𑌂 𑌸𑍍𑌵𑌾𑌰𑍍𑌥𑍇 𑌷𑍍𑌯𑌞𑍍 । 𑌵𑍀𑌕𑍍𑌷𑌾 𑌦𑍃𑌷𑍍𑌟𑌿𑌃 । 𑌕𑌾𑌰𑍁𑌣𑍍𑌯𑌸𑍍𑌯 𑌵𑍀𑌕𑍍𑌷𑌾 𑌕𑌾𑌰𑍁𑌣𑍍𑌯𑌵𑍀𑌕𑍍𑌷𑌾 । 𑌕𑌾𑌰𑍁𑌣𑍍𑌯𑌵𑍀𑌕𑍍𑌷𑌾𑌯𑌾𑌃 𑌆𑌸𑍍𑌪𑌦𑌮𑍍 𑌕𑌾𑌰𑍁𑌣𑍍𑌯𑌵𑍀𑌕𑍍𑌷𑌾𑌸𑍍𑌪𑌦𑌮𑍍 । 𑌵𑍇𑌦𑌾𑌨𑍍𑌤𑌦𑍇𑌶𑌿𑌕𑌯𑌤𑍀𑌨𑍍𑌦𑍍𑌰𑌮𑌹𑌾𑌦𑍇𑌶𑌿𑌕𑌸𑍍𑌯 𑌦𑌯𑌯𑍈𑌵 𑌨𑌾𑌰𑌾𑌯𑌣𑌯𑌤𑍀𑌨𑍍𑌦𑍍𑌰𑌮𑌹𑌾𑌦𑍇𑌶𑌿𑌕𑌃 𑌸𑌨𑍍𑌨𑍍𑌯𑌾𑌸𑌾𑌶𑍍𑌰𑌮𑌂 𑌪𑍍𑌰𑌤𑌿𑌪𑌨𑍍𑌨 𑌇𑌤𑌿 𑌦𑍍𑌯𑍋𑌤𑌿𑌤𑌮𑍍 । 𑌕𑌿𑌞𑍍𑌚 𑌤𑌤𑍍𑌕𑌰𑍁𑌣𑌯𑌾 𑌕𑌿𑌲 𑌨𑌾𑌰𑌾𑌯𑌣𑌯𑌤𑍀𑌨𑍍𑌦𑍍𑌰𑌮𑌹𑌾𑌦𑍇𑌶𑌿𑌕𑍇𑌨 𑌮𑌠𑌾𑌧𑌿𑌪𑌤𑌿𑌤𑌾 𑌸𑌮𑍍𑌪𑍍𑌰𑌾𑌪𑍍𑌤𑌾 𑌇𑌤𑌿 𑌸𑍂𑌚𑌕𑌃 𑌪𑌾𑌦𑌃 ।

𑌸𑍇𑌵𑍇 𑌉𑌪𑌾𑌸𑍇 । 𑌰𑌙𑍍𑌗𑌧𑍁𑌰𑍀𑌣𑌶𑌾𑌸𑌨𑌵𑌶𑌮𑍍 । 𑌧𑍁𑌰𑍀𑌣𑍋 𑌨𑌾𑌯𑌕𑍋 𑌨𑌾𑌥𑌃 । 𑌧𑍂𑌰𑍍𑌵𑌹𑍇 𑌧𑍁𑌰𑍍𑌯𑌧𑍌𑌰𑍇𑌯𑌧𑍁𑌰𑍀𑌣𑌾𑌃 𑌸𑌧𑍁𑌰𑌨𑍍𑌧𑌰𑌾𑌃 𑌇𑌤𑍍𑌯𑌮𑌰𑌃 । 𑌰𑌙𑍍𑌗𑌸𑍍𑌯 𑌧𑍁𑌰𑍀𑌣𑍋 𑌰𑌙𑍍𑌗𑌧𑍁𑌰𑍀𑌣𑌃 𑌰𑌙𑍍𑌗𑌨𑌾𑌥𑌃 𑌶𑍍𑌰𑍀𑌰𑌙𑍍𑌗𑌸𑍍𑌥𑍋𑌰𑍍𑌚𑌾𑌮𑍂𑌰𑍍𑌤𑌿𑌃 । 𑌤𑌚𑍍𑌛𑌾𑌸𑌨𑌂 𑌨𑌿𑌰𑍍𑌦𑍇𑌶𑌃 । 𑌅𑌵𑌵𑌾𑌦𑌸𑍍𑌤𑍁 𑌨𑌿𑌰𑍍𑌦𑍇𑌶𑍋 𑌨𑌿𑌦𑍇𑌶𑌃 𑌶𑌾𑌸𑌨𑌂 𑌚 𑌸𑌃 𑌇𑌤𑍍𑌯𑌮𑌰𑌃 । 𑌰𑌙𑍍𑌗𑌧𑍁𑌰𑍀𑌣𑌶𑌾𑌸𑌨𑌂 𑌵𑌶𑍋 𑌯𑌸𑍍𑌯 𑌸𑌃 𑌰𑌙𑍍𑌗𑌧𑍁𑌰𑍀𑌣𑌶𑌾𑌸𑌨𑌵𑌶𑌃 । 𑌤𑌮𑍍 । 𑌪𑌞𑍍𑌚𑌚𑌤𑍍𑌵𑌾𑌰𑌿𑌂𑌶𑌃 𑌮𑌠𑌾𑌧𑌿𑌪𑌤𑌿𑌃 𑌜𑍍𑌞𑌾𑌪𑌿𑌤𑌃 𑌪𑌾𑌦𑍇𑌸𑍍𑌮𑌿𑌨𑍍 । 𑌨𑌾𑌰𑌾𑌯𑌣𑌂 𑌨𑌾𑌰𑌾𑌯𑌣𑌯𑌤𑍀𑌨𑍍𑌦𑍍𑌰𑌮𑌹𑌾𑌦𑍇𑌶𑌿𑌕𑌾𑌭𑌿𑌧𑌮𑍍 । 𑌯𑍋𑌗𑌿𑌨𑌂 𑌯𑌤𑌿𑌮𑍍 ।

𑌇𑌤𑍍𑌥𑌂 𑌚𑌤𑍁𑌰𑍍𑌣𑌾𑌮𑌪𑌿 𑌪𑍂𑌰𑍍𑌵𑌭𑍂𑌤𑌾𑌨𑌾𑌂 𑌮𑌠𑌾𑌧𑍀𑌶𑌾𑌨𑌾𑌂 𑌗𑍍𑌰𑌹𑌣𑍇𑌨 𑌸𑌕𑌲𑌾𑌯𑌾𑌃 𑌆𑌚𑌾𑌰𑍍𑌯𑌪𑌰𑌮𑍍𑌪𑌰𑌾𑌯𑌾𑌃 𑌜𑍍𑌞𑌾𑌪𑌨𑌂 𑌵𑌿𑌶𑍇𑌷𑌃 ।

॥ 𑍐 𑌸𑌰𑍍𑌵𑌂 𑌶𑍍𑌰𑍀𑌕𑍃𑌷𑍍𑌣𑌾𑌰𑍍𑌪𑌣𑌮𑌸𑍍𑌤𑍁 ॥