𑌚𑌤𑍁𑌃𑌶𑍍𑌲𑍋𑌕𑍀

Mon, 11 Jul, 2016•ambarish•religion

𑌯𑌤𑍍𑌪𑌦𑌾𑌮𑍍𑌭𑍋𑌰𑍁𑌹𑌧𑍍𑌯𑌾𑌨𑌵𑌿𑌧𑍍𑌵𑌸𑍍𑌤𑌾𑌶𑍇𑌷𑌕𑌲𑍍𑌮𑌷𑌃 ।
𑌵𑌸𑍍𑌤𑍁𑌤𑌾𑌮𑍁𑌪𑌯𑌾𑌤𑍋𑌹𑌂 𑌯𑌾𑌮𑍁𑌨𑍇𑌯𑌂 𑌨𑌮𑌾𑌮𑌿 𑌤𑌮𑍍 ॥

𑌚𑌤𑍁𑌃𑌶𑍍𑌲𑍋𑌕𑍀𑌂 𑌲𑌕𑍍𑌷𑍍𑌮𑍀𑌸𑍍𑌤𑍁𑌤𑌿𑌮𑌨𑍁𑌪𑌮𑌾𑌂 𑌯𑌾𑌮𑍁𑌨𑌮𑍁𑌨𑍇𑌶𑍍𑌚 𑌯𑌾 𑌮𑌾𑌤𑍁𑌰𑍍𑌮𑌾𑌤𑌾𑌮𑌿𑌤𑌕𑌰𑍁𑌣𑌯𑌾 𑌮𑌾𑌂 𑌨𑌿𑌰𑌦𑌿𑌶𑌤𑍍 ।
𑌶𑍁𑌭𑌾𑌙𑍍𑌗𑌾𑌂 𑌤𑌾𑌂 𑌪𑍍𑌰𑌾𑌪𑍍𑌤𑍋𑌚𑍍𑌚𑌤𑌮𑌵𑌿𑌷𑌯𑌾𑌂 𑌦𑍍𑌰𑌾𑌮𑌿𑌡𑌗𑍁𑌰𑍁𑌂 𑌸𑍍𑌮𑌰𑌲𑍍𑌁𑌲𑌕𑍍𑌷𑍍𑌮𑍍𑌯𑌾𑌖𑍍𑌯𑌾𑌂 𑌤𑌦𑍍𑌵𑌿𑌵𑌰𑌣𑌮𑌿𑌦𑌂 𑌸𑍁𑌷𑍍𑌠𑍁 𑌕𑌲𑌯𑍇 ॥

𑌅𑌥 𑌸𑍍𑌤𑍁𑌤𑌿𑌃 ।

𑌕𑌾𑌨𑍍𑌤𑌸𑍍𑌤𑍇 𑌪𑍁𑌰𑍁𑌷𑍋𑌤𑍍𑌤𑌮𑌃 𑌫𑌣𑌿𑌪𑌤𑌿𑌃 𑌶𑌯𑍍𑌯𑌾𑌸𑌨𑌂 𑌵𑌾𑌹𑌨𑌂 𑌵𑍇𑌦𑌾𑌤𑍍𑌮𑌾 𑌵𑌿𑌹𑌗𑍇𑌶𑍍𑌵𑌰𑍋 𑌯𑌵𑌨𑌿𑌕𑌾 𑌮𑌾𑌯𑌾 𑌜𑌗𑌨𑍍𑌮𑍋𑌹𑌿𑌨𑍀 ।
𑌬𑍍𑌰𑌹𑍍𑌮𑍇𑌶𑌾𑌦𑌿𑌸𑍁𑌰𑌵𑍍𑌰𑌜𑌃 𑌸𑌦𑌯𑌿𑌤𑌸𑍍𑌤𑍍𑌵𑌦𑍍𑌦𑌾𑌸𑌦𑌾𑌸𑍀𑌗𑌣𑌃 𑌶𑍍𑌰𑍀𑌰𑌿𑌤𑍍𑌯𑍇𑌵 𑌚 𑌨𑌾𑌮 𑌤𑍇 𑌭𑌗𑌵𑌤𑌿 𑌬𑍍𑌰𑍂𑌮𑌃 𑌕𑌥𑌂 𑌤𑍍𑌵𑌾𑌂 𑌵𑌯𑌮𑍍 ॥

𑌭𑌗𑌵𑌤𑌿 । 𑌤𑍇 𑌕𑌾𑌨𑍍𑌤𑌃 𑌪𑍁𑌰𑍁𑌷𑍋𑌤𑍍𑌤𑌮𑌃 । 𑌤𑍇 𑌶𑌯𑍍𑌯𑌾 𑌫𑌣𑌿𑌪𑌤𑌿𑌃 । 𑌤𑍇 𑌆𑌸𑌨𑌂 𑌵𑌾𑌹𑌨𑌂 𑌵𑍇𑌦𑌾𑌤𑍍𑌮𑌾 𑌵𑌿𑌹𑌗𑍇𑌶𑍍𑌵𑌰𑌃 । 𑌤𑍇 𑌯𑌵𑌨𑌿𑌕𑌾 𑌮𑌾𑌯𑌾 𑌜𑌗𑌨𑍍𑌮𑍋𑌹𑌿𑌨𑍀 । 𑌤𑍍𑌵𑌦𑍍𑌦𑌾𑌸𑌦𑌾𑌸𑍀𑌗𑌣𑌃 𑌸𑌦𑌯𑌿𑌤𑌃 𑌬𑍍𑌰𑌹𑍍𑌮𑍇𑌶𑌾𑌦𑌿𑌸𑍁𑌰𑌵𑍍𑌰𑌜𑌃 । 𑌤𑍇 𑌨𑌾𑌮 𑌚 𑌶𑍍𑌰𑍀𑌰𑌿𑌤𑍍𑌯𑍇𑌵 । 𑌕𑌥𑌂 𑌵𑌯𑌂 𑌤𑍍𑌵𑌾𑌂 𑌬𑍍𑌰𑍂𑌮𑌃 ।

𑌅𑌤𑍍𑌰 𑌤𑍁 𑌶𑍍𑌰𑌿𑌯𑌂 𑌮𑌹𑌾𑌰𑌾𑌜𑍍𑌞𑍀𑌂 𑌭𑌾𑌵𑌯𑌨𑍍 𑌶𑍍𑌰𑍇𑌷𑍍𑌠𑌤𑌮𑌾𑌨𑌿 𑌤𑌦𑍁𑌪𑌲𑌕𑍍𑌷𑌣𑌾𑌨𑌿 𑌵𑌰𑍍𑌣𑌯𑌤𑌿 𑌕𑌵𑌿𑌃 । 𑌭𑌗𑌵𑌤𑌿 । 𑌹𑍇 𑌸𑌰𑍍𑌵𑌮𑌙𑍍𑌗𑌲𑌵𑌤𑌿 । 𑌅𑌸𑍍𑌯𑌾𑌸𑍍𑌤𑌿 𑌇𑌤𑌿 𑌮𑌤𑍁𑌪𑍍 । 𑌕𑌾𑌨𑍍𑌤𑌃 𑌪𑍍𑌰𑌿𑌯𑌤𑌮𑍋 𑌦𑌯𑌿𑌤𑌃 । 𑌕𑌰𑍍𑌤𑌰𑌿 𑌕𑍍𑌤𑌃 । 𑌪𑍁𑌰𑍁𑌷𑍋𑌤𑍍𑌤𑌮𑌃 𑌉𑌤𑍍𑌤𑌮𑌃 𑌪𑍁𑌰𑍁𑌷𑍋 𑌨𑌾𑌰𑌾𑌯𑌣𑌃 । 𑌨 𑌨𑌿𑌰𑍍𑌧𑌾𑌰𑌣𑍇 𑌇𑌤𑍍𑌯𑌸𑍍𑌮𑌾𑌤𑍍𑌷𑌷𑍍𑌠𑍀𑌤𑌤𑍍𑌪𑍁𑌰𑍁𑌷𑌨𑌿𑌷𑍇𑌧𑌾𑌤𑍍𑌕𑌰𑍍𑌮𑌧𑌾𑌰𑌯𑌵𑍍𑌯𑍁𑌤𑍍𑌪𑌤𑍍𑌤𑌿𑌃 । 𑌶𑌯𑍍𑌯𑌾 𑌤𑌲𑍍𑌪𑌮𑍍 । 𑌫𑌣𑌿𑌪𑌤𑌿𑌃 𑌫𑌣𑌿𑌨𑌾𑌂 𑌸𑌰𑍍𑌪𑌾𑌣𑌾𑌂 𑌪𑌤𑌿𑌃 𑌆𑌦𑌿𑌶𑍇𑌷𑌃 । 𑌫𑌣𑌃 𑌸𑍍𑌫𑌟𑌾 । 𑌅𑌤 𑌇𑌨𑌿𑌠𑌨𑍌 𑌇𑌤𑌿 𑌮𑌤𑍁𑌬𑌰𑍍𑌥 𑌇𑌨𑍍 । 𑌆𑌸𑌨𑌮𑌾𑌸𑌨𑍍𑌦𑌃 𑌆𑌸𑍍𑌯𑌤 𑌅𑌸𑍍𑌮𑌿𑌨𑍍𑌨𑌿𑌤𑌿 । 𑌵𑌾𑌹𑌨𑌂 𑌯𑌾𑌨𑌂 𑌵𑌾𑌹𑌯𑌤𑍀𑌤𑌿 । 𑌵𑌿𑌹𑌗𑍇𑌶𑍍𑌵𑌰𑍋 𑌵𑌿𑌹𑌗𑌾𑌨𑌾𑌂 𑌖𑌗𑌾𑌨𑌾𑌮𑍀𑌶𑍍𑌵𑌰𑍋 𑌗𑌰𑍁𑌡𑌃 । 𑌲𑌕𑍍𑌷𑍍𑌮𑍀𑌸𑍍𑌤𑍁 𑌵𑌿𑌷𑍍𑌣𑍁𑌵𑌕𑍍𑌷𑌃𑌸𑍍𑌥𑌲𑌸𑍍𑌥𑌿𑌤𑌾 𑌨𑌿𑌤𑍍𑌯𑌾𑌨𑌪𑌾𑌯𑌿𑌨𑍀 𑌗𑌰𑍁𑌤𑍍𑌮𑌤𑌿 𑌆𑌸𑍍𑌤𑍇 𑌤𑍇𑌨 𑌵𑌾𑌹𑍍𑌯𑌤𑍇 𑌚𑍇𑌤𑌿 𑌯𑌾𑌵𑌤𑍍 । 𑌪𑌰𑌸𑍍𑌪𑌰𑌂 𑌵𑌿𑌰𑍋𑌧𑍇𑌪𑌿 𑌲𑌕𑍍𑌷𑍍𑌮𑍀𑌨𑌾𑌰𑌾𑌯𑌣𑍌 𑌶𑍇𑌷𑌂 𑌗𑌰𑍁𑌡𑌮𑍁𑌭𑌾𑌵𑌪𑌿 𑌭𑍁𑌞𑍍𑌜𑌾𑌤 𑌇𑌤𑌿 𑌵𑌿𑌚𑌿𑌤𑍍𑌰𑌾𑌸𑍍𑌪𑌦𑌮𑍍 । 𑌯𑌵𑌨𑌿𑌕𑌾 𑌤𑌿𑌰𑌸𑍍𑌕𑌰𑌿𑌣𑍀 । 𑌪𑍁𑌰𑌾 𑌰𑌾𑌜𑌸𑍍𑌤𑍍𑌰𑌿𑌯𑍋 𑌹𑍍𑌰𑌿𑌯𑌾 𑌯𑌵𑌨𑌿𑌕𑌾𑌨𑍍𑌤𑌰𑍍𑌹𑌿𑌤𑌾 𑌇𑌤𑌿 । 𑌜𑌗𑌤𑍋 𑌮𑍋𑌹𑌃 𑌜𑌗𑌨𑍍𑌮𑍋𑌹𑌃 । 𑌅𑌤 𑌇𑌨𑌿𑌠𑌨𑍌 𑌇𑌤𑌿 𑌮𑌤𑍁𑌬𑌰𑍍𑌥 𑌇𑌨𑍍 𑌸𑍍𑌤𑍍𑌰𑍀𑌤𑍍𑌵𑌾𑌤𑍍 𑌙𑍀 𑌚 । 𑌮𑌾𑌯𑌾 𑌜𑌗𑌨𑍍𑌮𑍋𑌹𑌿𑌨𑍀 𑌲𑍋𑌕𑌾𑌨𑍍𑌮𑍋𑌹𑌯𑌤𑌿 𑌯𑌥𑌾 𑌤𑍇 𑌲𑍋𑌕𑌾 𑌮𑌹𑌾𑌲𑌕𑍍𑌷𑍍𑌮𑍀𑌂 𑌦𑍍𑌰𑌷𑍍𑌟𑍁𑌂 𑌨𑌾𑌲𑌮𑍍 । 𑌬𑍍𑌰𑌹𑍍𑌮𑌾 𑌚𑌤𑍁𑌰𑍍𑌮𑍁𑌖𑌃 𑌈𑌶𑍋 𑌰𑍁𑌦𑍍𑌰𑌃 । 𑌤𑍌 𑌆𑌦𑍀 𑌯𑌸𑍍𑌯 𑌸 𑌬𑍍𑌰𑌹𑍍𑌮𑍇𑌶𑌾𑌦𑌿𑌃 । 𑌤𑌥𑌾𑌵𑌿𑌧𑌃 𑌸𑍁𑌰𑌵𑍍𑌰𑌜𑍋 𑌦𑍇𑌵𑌸𑌮𑍂𑌹𑌃 । 𑌸𑌦𑌯𑌿𑌤𑌃 𑌸𑌪𑍍𑌰𑌿𑌯𑌃 𑌪𑌤𑍍𑌨𑍀𑌭𑌿𑌃 𑌸𑌹𑌿𑌤𑌃 । 𑌮𑌹𑌾𑌰𑌾𑌜𑍍𑌞𑍍𑌯𑌾 𑌦𑌾𑌸𑌦𑌾𑌸𑍍𑌯𑌃 𑌕𑍍𑌵𑍇𑌤𑌿 𑌚𑍇𑌤𑍍 𑌗𑌣𑍋𑌯𑌮𑍇𑌵𑍇𑌤𑌿 । 𑌸𑌰𑍍𑌵𑌾𑌣𑌿 𑌰𑌾𑌜𑌲𑌕𑍍𑌷𑌣𑌾𑌨𑍍𑌯𑍁𑌪𑌵𑌰𑍍𑌣𑍍𑌯 𑌅𑌨𑍍𑌤𑍇 𑌨𑌾𑌮𑍈𑌵 𑌅𑌨𑍁𑌪𑌮𑌮𑌿𑌤𑍍𑌯𑌾𑌹 । 𑌪𑌾𑌞𑍍𑌚𑌰𑌾𑌤𑍍𑌰𑌾𑌗𑌮𑌾𑌤𑍍 𑌶𑍍𑌰𑍀𑌯𑌤𑍇 𑌶𑍍𑌰𑌯𑌤𑍇 𑌶𑍍𑌰𑍁𑌣𑍋𑌤𑌿 𑌶𑍍𑌰𑌾𑌵𑌯𑌤𑌿 𑌶𑍍𑌰𑍁𑌣𑌾𑌤𑌿 𑌶𑍍𑌰𑍀𑌣𑌾𑌤𑌿 𑌚𑍇𑌤𑌿 𑌶𑍍𑌰𑍀𑌨𑌾𑌮𑌧𑍇𑌯𑌾 । 𑌤𑌥𑌾 𑌸𑌤𑍍𑌯𑌾𑌂 𑌤𑍍𑌵𑌯𑌿 𑌕𑌥𑌂 𑌵𑌾 𑌬𑍍𑌰𑍂𑌮𑍋 𑌵𑌯𑌮𑌿𑌤𑌿 𑌕𑌵𑍇𑌰𑌾𑌶𑍍𑌚𑌰𑍍𑌯𑌂 𑌭𑌕𑍍𑌤𑌿𑌶𑍍𑌚 ।

𑌯𑌸𑍍𑌯𑌾𑌸𑍍𑌤𑍇 𑌮𑌹𑌿𑌮𑌾𑌨𑌮𑌾𑌤𑍍𑌮𑌨 𑌇𑌵 𑌤𑍍𑌵𑌦𑍍𑌵𑌲𑍍𑌲𑌭𑍋𑌪𑌿 𑌪𑍍𑌰𑌭𑍁𑌰𑍍𑌨𑌾𑌲𑌂 𑌮𑌾𑌤𑍁𑌮𑌿𑌯𑌤𑍍𑌤𑌯𑌾 𑌨𑌿𑌰𑌵𑌧𑌿𑌂 𑌨𑌿𑌤𑍍𑌯𑌾𑌨𑍁𑌕𑍂𑌲𑌂 𑌸𑍍𑌵𑌤𑌃 ।
𑌤𑌾𑌂 𑌤𑍍𑌵𑌾𑌂 𑌦𑌾𑌸 𑌇𑌤𑌿 𑌪𑍍𑌰𑌪𑌨𑍍𑌨 𑌇𑌤𑌿 𑌚 𑌸𑍍𑌤𑍋𑌷𑍍𑌯𑌾𑌮𑍍𑌯𑌹𑌂 𑌨𑌿𑌰𑍍𑌭𑌯𑍋 𑌲𑍋𑌕𑍈𑌕𑍇𑌶𑍍𑌵𑌰𑌿 𑌲𑍋𑌕𑌨𑌾𑌥𑌦𑌯𑌿𑌤𑍇 𑌦𑌾𑌨𑍍𑌤𑍇 𑌦𑌯𑌾𑌂 𑌤𑍇 𑌵𑌿𑌦𑌨𑍍 ॥

𑌲𑍋𑌕𑍈𑌕𑍇𑌶𑍍𑌵𑌰𑌿 । 𑌲𑍋𑌕𑌨𑌾𑌥𑌦𑌯𑌿𑌤𑍇 । 𑌦𑌾𑌨𑍍𑌤𑍇 । 𑌯𑌸𑍍𑌯𑌾𑌃 𑌤𑍇 𑌨𑌿𑌰𑌵𑌧𑌿𑌂 𑌸𑍍𑌵𑌤𑍋 𑌨𑌿𑌤𑍍𑌯𑌾𑌨𑍁𑌕𑍂𑌲𑌂 𑌮𑌹𑌿𑌮𑌾𑌨𑌮𑍍 𑌆𑌤𑍍𑌮𑌨𑌃 𑌮𑌹𑌿𑌮𑌾𑌨𑌮𑍍 𑌇𑌵 𑌤𑍍𑌵𑌦𑍍𑌵𑌲𑍍𑌲𑌭𑌃 𑌪𑍍𑌰𑌭𑍁𑌰𑌪𑌿 𑌇𑌯𑌤𑍍𑌤𑌯𑌾 𑌮𑌾𑌤𑍁𑌂 𑌨 𑌅𑌲𑌮𑍍 । 𑌤𑌾𑌂 𑌤𑍍𑌵𑌾𑌂 𑌦𑌾𑌸𑌃 𑌇𑌤𑌿 𑌪𑍍𑌰𑌪𑌨𑍍𑌨𑌶𑍍𑌚𑍇𑌤𑌿 𑌨𑌿𑌰𑍍𑌭𑌯𑍋𑌹𑌂 𑌤𑍇 𑌦𑌯𑌾𑌂 𑌵𑌿𑌦𑌨𑍍 𑌸𑍍𑌤𑍋𑌷𑍍𑌯𑌾𑌮𑌿 ।

𑌕𑌵𑌿𑌰𑌤𑍍𑌰 𑌦𑍇𑌵𑍍𑌯𑌾 𑌅𑌨𑌨𑍍𑌤𑌂 𑌮𑌹𑌿𑌮𑌾𑌨𑌂 𑌵𑌰𑍍𑌣𑌯𑌨𑍍𑌨𑌾𑌹 । 𑌲𑍋𑌕𑍈𑌕𑍇𑌶𑍍𑌵𑌰𑌿 । 𑌲𑍋𑌕𑌾𑌨𑌾𑌂 𑌸𑌰𑍍𑌵𑌜𑌨𑌾𑌨𑌾𑌮𑍍 𑌏𑌕𑌾 𑌕𑍇𑌵𑌲𑌾 𑌈𑌶𑌵𑌰𑍀 𑌈𑌶𑌿𑌤𑍍𑌰𑍀 𑌸𑌮𑍍𑌬𑍁𑌦𑍍𑌧𑍌 । 𑌏𑌕𑍋𑌲𑍍𑌪𑌾𑌰𑍍𑌥𑍇 𑌪𑍍𑌰𑌧𑌾𑌨𑍇 𑌚 𑌪𑍍𑌰𑌥𑌮𑍇 𑌕𑍇𑌵𑌲𑍇 𑌤𑌥𑌾 । 𑌸𑌾𑌧𑌾𑌰𑌣𑍇 𑌸𑌮𑌾𑌨𑍇𑌪𑌿 𑌸𑌙𑍍𑌖𑍍𑌯𑌾𑌯𑌾𑌂 𑌚 𑌪𑍍𑌰𑌯𑍁𑌜𑍍𑌯𑌤𑍇 । 𑌲𑍋𑌕𑌨𑌾𑌥𑌦𑌯𑌿𑌤𑍇 । 𑌜𑌗𑌤𑍍𑌪𑌤𑌿𑌪𑍍𑌰𑌿𑌯𑍇 । 𑌦𑌾𑌨𑍍𑌤𑍇 । 𑌦𑌮𑌵𑌤𑌿 । 𑌦𑌮𑍁𑌁 𑌉𑌪𑌶𑌮𑍇 𑌇𑌤𑍍𑌯𑌸𑍍𑌮𑌾𑌤𑍍 𑌕𑍍𑌤𑌃 𑌕𑌰𑍍𑌤𑌰𑌿 । 𑌅𑌨𑍁𑌨𑌾𑌸𑌿𑌕𑌸𑍍𑌯 𑌕𑍍𑌵𑌿𑌜𑍍𑌝𑌲𑍋𑌃 𑌕𑍍𑌙𑌿𑌤𑌿 𑌇𑌤𑌿 𑌉𑌪𑌧𑌾𑌦𑍈𑌰𑍍𑌘𑍍𑌯𑌮𑍍 । 𑌨𑌿𑌰𑌵𑌧𑌿𑌮𑍍 𑌅𑌵𑌧𑌿𑌰𑌹𑌿𑌤𑌮𑍍 𑌅𑌪𑌰𑌿𑌮𑌿𑌤𑌮𑍍 । 𑌸𑍍𑌵𑌤𑌃 𑌲𑍋𑌕𑌨𑌾𑌥𑌾𑌤𑍍 𑌤𑍍𑌵𑌦𑍍𑌵𑌲𑍍𑌲𑌭𑌾𑌤𑍍 𑌨𑌾𑌮 𑌶𑍍𑌰𑍀𑌮𑌨𑍍𑌨𑌾𑌰𑌾𑌯𑌣𑌤𑌃 𑌨𑌿𑌤𑍍𑌯𑌾𑌨𑍁𑌕𑍂𑌲𑌂 𑌸𑌦𑌾𑌨𑍁𑌸𑌾𑌰𑌮𑍍 । 𑌮𑌹𑌿𑌮𑌾𑌨𑌂 𑌮𑌹𑌤𑍍𑌤𑍍𑌵𑌮𑍍 । 𑌆𑌤𑍍𑌮𑌨𑌃 𑌸𑍍𑌵𑌸𑍍𑌯 𑌤𑌨𑍍𑌨𑌾𑌮 𑌶𑍍𑌰𑍀𑌪𑌤𑍇𑌃 । 𑌤𑍍𑌵𑌦𑍍𑌵𑌲𑍍𑌲𑌭𑌸𑍍𑌤𑌵 𑌪𑍍𑌰𑌿𑌯𑌤𑌮𑌃 । 𑌪𑍍𑌰𑌭𑍁𑌃 𑌸𑍍𑌵𑌾𑌮𑍀 𑌪𑍁𑌨𑌶𑍍𑌚 𑌭𑌗𑌵𑌾𑌨𑍍 । 𑌇𑌯𑌤𑍍𑌤𑌯𑌾 𑌏𑌤𑌾𑌵𑌦𑌿𑌤𑌿 । 𑌮𑌾𑌤𑍁𑌂 𑌤𑍋𑌲𑌯𑌿𑌤𑍁𑌮𑍍 । 𑌨 𑌅𑌲𑌮𑍍 𑌅𑌪𑌰𑍍𑌯𑌾𑌪𑍍𑌤𑌃 । 𑌯𑌸𑍍𑌯𑌾𑌃 𑌤𑌾𑌦𑍃𑌕𑍍 𑌮𑌹𑌿𑌮𑌾 𑌯𑌂 𑌮𑌾𑌤𑍁𑌂 𑌭𑌗𑌵𑌾𑌨𑌪𑌿 𑌅𑌪𑌰𑍍𑌯𑌾𑌪𑍍𑌤𑌃 𑌤𑌾𑌦𑍃𑌶𑌾𑌂 𑌤𑌾𑌂 𑌤𑍍𑌵𑌾𑌂 𑌸𑍍𑌤𑍋𑌷𑍍𑌯𑌾𑌮𑌿 𑌨𑍁𑌤𑌿𑌂 𑌕𑌰𑌿𑌷𑍍𑌯𑍇 । 𑌕𑌥𑌂𑌭𑍂𑌤𑌃 𑌸𑍍𑌤𑍋𑌷𑍍𑌯𑌾𑌮𑍀𑌤𑌿 𑌚𑍇𑌤𑍍 । 𑌦𑌾𑌸𑌃 𑌕𑌿𑌙𑍍𑌕𑌰𑌃 । 𑌪𑍍𑌰𑌪𑌨𑍍𑌨𑌃 𑌶𑌰𑌣𑌂 𑌗𑌤𑌃 । 𑌨𑌿𑌰𑍍𑌭𑌯𑌃 𑌅𑌪𑌗𑌤𑌤𑍍𑌰𑌾𑌸𑌃 । 𑌕𑌿𑌮𑌰𑍍𑌥𑌂 𑌨𑌿𑌰𑍍𑌭𑌯 𑌇𑌤𑌿 𑌚𑍇𑌤𑍍 । 𑌭𑌵𑌤𑍍𑌯𑌾𑌃 𑌦𑌯𑌾𑌂 𑌕𑌰𑍁𑌣𑌾𑌂 𑌵𑌿𑌦𑌨𑍍 𑌜𑌾𑌨𑌾𑌨𑌃 । 𑌮𑌹𑌾𑌲𑌕𑍍𑌷𑍍𑌮𑍍𑌯𑌾𑌃 𑌅𑌪𑌾𑌰𑌾𑌂 𑌕𑌰𑍁𑌣𑌾𑌂 𑌸𑌮𑍍𑌯𑌕𑍍 𑌅𑌵𑌬𑍁𑌧𑍍𑌯𑌨𑍍 𑌤𑌦𑍍𑌦𑌯𑌯𑌾 𑌭𑌵𑌸𑌾𑌗𑌰𑌂 𑌤𑌰𑍀𑌷𑍍𑌯𑌾𑌮𑍀𑌤𑌿 𑌵𑌿𑌶𑍍𑌵𑌸𑌨𑍍 𑌵𑌿𑌗𑌤𑌭𑌯𑌃 𑌸𑍍𑌤𑍋𑌷𑍍𑌯𑌾𑌮𑍀𑌤𑌿 𑌅𑌭𑌿𑌪𑍍𑌰𑌾𑌯𑌃 ।

𑌈𑌷𑌤𑍍𑌤𑍍𑌵𑌤𑍍𑌕𑌰𑍁𑌣𑌾𑌨𑌿𑌰𑍀𑌕𑍍𑌷𑌣𑌸𑍁𑌧𑌾𑌸𑌨𑍍𑌧𑍁𑌕𑍍𑌷𑌣𑌾𑌦𑍍𑌰𑌕𑍍𑌷𑍍𑌯𑌤𑍇 𑌨𑌷𑍍𑌟𑌂 𑌪𑍍𑌰𑌾𑌕𑍍𑌤𑌦𑌲𑌾𑌭𑌤𑌸𑍍𑌤𑍍𑌰𑌿𑌭𑍁𑌵𑌨𑌂 𑌸𑌮𑍍𑌪𑍍𑌰𑌤𑍍𑌯𑌨𑌨𑍍𑌤𑍋𑌦𑌯𑌮𑍍 ।
𑌶𑍍𑌰𑍇𑌯𑍋 𑌨 𑌹𑍍𑌯𑌰𑌵𑌿𑌨𑍍𑌦𑌲𑍋𑌚𑌨𑌮𑌨𑌃𑌕𑌾𑌨𑍍𑌤𑌾𑌪𑍍𑌰𑌸𑌾𑌦𑌾𑌦𑍃𑌤𑍇 𑌸𑌂𑌸𑍃𑌤𑍍𑌯𑌕𑍍𑌷𑌰𑌵𑍈𑌷𑍍𑌣𑌵𑌾𑌧𑍍𑌵𑌸𑍁 𑌨𑍃𑌣𑌾𑌂 𑌸𑌮𑍍𑌭𑌾𑌵𑍍𑌯𑌤𑍇 𑌕𑌰𑍍𑌹𑌿𑌚𑌿𑌤𑍍 ॥

𑌤𑍍𑌰𑌿𑌭𑍁𑌵𑌨𑌮𑍍 𑌅𑌨𑌨𑍍𑌤𑍋𑌦𑌯𑌂 𑌰𑌕𑍍𑌷𑍍𑌯𑌤𑍇 𑌈𑌷𑌤𑍍 𑌤𑍍𑌵𑌤𑍍𑌕𑌰𑍁𑌣𑌾𑌨𑌿𑌰𑍀𑌕𑍍𑌷𑌣𑌸𑍁𑌧𑌾𑌸𑌨𑍍𑌧𑍁𑌕𑍍𑌷𑌣𑌾𑌤𑍍 𑌪𑍍𑌰𑌾𑌕𑍍 𑌨𑌷𑍍𑌟𑌂 𑌤𑌦𑌲𑌾𑌭𑌤𑌃 । 𑌨𑍃𑌣𑌾𑌂 𑌸𑌂𑌸𑍍𑌰𑍁𑌤𑍍𑌯𑌕𑍍𑌷𑌰𑌵𑍈𑌷𑍍𑌣𑌵𑌾𑌧𑍍𑌵𑌸𑍁 𑌶𑍍𑌰𑍇𑌯𑌃 𑌨 𑌹𑌿 𑌸𑌮𑍍𑌭𑌾𑌵𑍍𑌯𑌤𑍇 𑌅𑌰𑌵𑌿𑌨𑍍𑌦𑌲𑍋𑌚𑌨𑌮𑌨𑌃𑌕𑌾𑌨𑍍𑌤𑌾𑌪𑍍𑌰𑌸𑌾𑌦𑌾𑌤𑍍 𑌋𑌤𑍇 ।

𑌅𑌥 𑌶𑍍𑌰𑌿𑌯𑌃 𑌅𑌨𑌨𑍍𑌤𑌾 𑌕𑌰𑍁𑌣𑌾 𑌤𑌦𑍍𑌧𑍇𑌤𑍂𑌨𑌿 𑌫𑌲𑌾𑌨𑌿 𑌚 𑌵𑌰𑍍𑌣𑍍𑌯𑌨𑍍𑌤𑍇 । 𑌤𑍍𑌰𑌿𑌭𑍁𑌵𑌨𑌂 𑌲𑍋𑌕𑌤𑍍𑌰𑌯𑌂 𑌭𑍂𑌰𑍍𑌭𑍁𑌵𑌃𑌸𑍍𑌵𑌰𑍍𑌗𑌾𑌤𑍍𑌮𑌕𑌮𑍍 । 𑌏𑌕𑌵𑌦𑍍𑌭𑌾𑌵𑍀 𑌦𑍍𑌵𑌿𑌗𑍁𑌃 𑌤𑍍𑌰𑌯𑌾𑌣𑌾𑌂 𑌭𑍁𑌵𑌨𑌾𑌨𑌾𑌂 𑌲𑍋𑌕𑌾𑌨𑌾𑌂 𑌸𑌮𑌾𑌹𑌾𑌰 𑌇𑌤𑌿 । 𑌅𑌨𑌨𑍍𑌤𑍋𑌦𑌯𑌂 𑌅𑌨𑌨𑍍𑌤𑌾𑌃 𑌉𑌦𑌯𑌾𑌃 𑌯𑌸𑍍𑌯 𑌤𑌾𑌦𑍃𑌕𑍍 𑌤𑍍𑌰𑌿𑌭𑍁𑌵𑌨𑌂 𑌨𑌿𑌰𑌵𑌧𑌿𑌕𑌾𑌲𑌮𑌿𑌤𑌿 । 𑌪𑍍𑌰𑌾𑌕𑍍 𑌨𑌷𑍍𑌟𑌂 𑌚𑌤𑍁𑌰𑍍𑌯𑍁𑌗𑌾𑌨𑍍𑌤𑍇 𑌪𑍍𑌰𑌲𑍀𑌨𑌂 𑌪𑌰𑌬𑍍𑌰𑌹𑍍𑌮𑌣𑌿 । 𑌕𑍍𑌵𑍇𑌤𑌿 𑌚𑍇𑌤𑍍 । 𑌤𑌦𑌲𑌾𑌭𑌤𑌃 । 𑌤𑍍𑌵𑌦𑍍𑌦𑌯𑌾𑌕𑌟𑌾𑌕𑍍𑌷𑌮𑍍 𑌅𑌨𑌵𑌾𑌪𑍍𑌯 । 𑌅𑌤𑌿𑌗𑍍𑌰𑌹𑌾𑌵𑍍𑌯𑌥𑌨𑌕𑍍𑌷𑍇𑌪𑍇𑌷𑍍𑌵𑌕𑌰𑍍𑌤𑌰𑌿 𑌤𑍃𑌤𑍀𑌯𑌾𑌯𑌾𑌃 𑌇𑌤𑌿 𑌤𑌸𑌿𑌁 । 𑌸𑌰𑍍𑌵𑌨𑌾𑌮𑍍𑌨𑌃 𑌤𑍍𑌵𑌤𑍍𑌕𑌰𑍁𑌣𑌾𑌨𑌿𑌰𑍀𑌕𑍍𑌷𑌣𑌸𑍁𑌧𑌾𑌸𑌨𑍍𑌧𑍁𑌕𑍍𑌷𑌣𑍇𑌨𑍍𑌵𑌯𑌃 । 𑌪𑍍𑌰𑌾𑌙𑍍𑌨𑌷𑍍𑌟𑌮𑌧𑍁𑌨𑌾 𑌰𑌕𑍍𑌷𑍍𑌯𑌤𑍇 𑌭𑍁𑌜𑍍𑌯𑌤𑍇 । 𑌕𑍁𑌤 𑌇𑌤𑌿 । 𑌤𑍍𑌵𑌤𑍍𑌕𑌰𑍁𑌣𑌾𑌨𑌿𑌰𑍀𑌕𑍍𑌷𑌣𑌸𑍁𑌧𑌾𑌸𑌨𑍍𑌧𑍁𑌕𑍍𑌷𑌣𑌾𑌤𑍍 । 𑌪𑌞𑍍𑌚𑌮𑍀 𑌹𑍇𑌤𑍌 । 𑌤𑌵 𑌕𑌰𑍁𑌣𑌾𑌯𑌾𑌃 𑌦𑌯𑌾𑌯𑌾𑌃 𑌨𑌿𑌰𑍀𑌕𑍍𑌷𑌣𑌮𑍇𑌵 𑌦𑍃𑌷𑍍𑌟𑌿𑌰𑍇𑌵 𑌸𑍁𑌧𑌾 𑌅𑌮𑍃𑌤𑌮𑍍 । 𑌤𑌸𑍍𑌯𑌾𑌃 𑌸𑌨𑍍𑌧𑍁𑌕𑍍𑌷𑌣𑌂 𑌸𑍍𑌫𑍂𑌰𑍍𑌤𑌿𑌃 । 𑌤𑌸𑍍𑌮𑌾𑌤𑍍 𑌤𑌸𑍍𑌯 𑌹𑍇𑌤𑍁𑌨𑌾 । 𑌜𑌗𑌨𑍍𑌤𑌿 𑌵𑌰𑍀𑌵𑍃𑌤𑌤𑌿 𑌤𑌸𑍍𑌯𑌾𑌃 𑌕𑌰𑍁𑌣𑌯𑌾 𑌚𑍇𑌤𑍍 𑌪𑍁𑌰𑍁𑌷𑌾𑌰𑍍𑌥𑌾 𑌅𑌪𑌿 𑌕𑌿𑌂 𑌤𑌸𑍍𑌯𑌾𑌃 𑌦𑌯𑌯𑌾 𑌲𑌭𑍍𑌯𑍇𑌰𑌨𑍍 । 𑌆𑌮𑌿𑌤𑍍𑌯𑌾𑌹 𑌯𑌥𑌾 । 𑌅𑌰𑌵𑌿𑌨𑍍𑌦𑌲𑍋𑌚𑌮𑌨𑌃𑌕𑌾𑌨𑍍𑌤𑌾𑌪𑍍𑌰𑌸𑌾𑌦𑌾𑌤𑍍 । 𑌅𑌰𑌵𑌿𑌨𑍍𑌦𑍇 𑌤𑌾𑌮𑌰𑌸𑍇 𑌇𑌵 𑌲𑍋𑌚𑌨𑍇 𑌯𑌸𑍍𑌯 𑌸𑌃 𑌨𑌾𑌰𑌾𑌯𑌣𑌃 । 𑌤𑌸𑍍𑌯 𑌕𑌾𑌨𑍍𑌤𑌾 𑌸𑌹𑌧𑌰𑍍𑌮𑌿𑌣𑍀 𑌶𑍍𑌰𑍀𑌃 । 𑌤𑌸𑍍𑌯𑌾 𑌮𑌨𑌃 𑌚𑍇𑌤𑌃 । 𑌤𑌤𑍍𑌪𑍍𑌰𑌸𑌾𑌦𑌃 𑌤𑍋𑌷𑌾𑌤𑍍 𑌅𑌨𑍁𑌗𑍍𑌰𑌹𑌃 । 𑌤𑌸𑍍𑌮𑌾𑌦𑍃𑌤𑍇 𑌤𑌂 𑌵𑌿𑌨𑌾 𑌨𑍇𑌤𑌿 । 𑌋𑌤𑍇 𑌕𑌿𑌂 𑌨 । 𑌨𑍃𑌣𑌾𑌂 𑌮𑌨𑍁𑌷𑍍𑌯𑌾𑌣𑌾𑌂 𑌸𑌂𑌸𑍃𑌤𑍌 𑌸𑌂𑌸𑌾𑌰𑌸𑌮𑍍𑌬𑌦𑍍𑌧𑍇𑌷𑍁 𑌐𑌶𑍍𑌵𑌰𑍍𑌯𑌾𑌦𑌿𑌷𑍁 𑌫𑌲𑍇𑌷𑍁 𑌅𑌕𑍍𑌷𑌰𑍇 𑌕𑍈𑌵𑌲𑍍𑌯𑌮𑍋𑌕𑍍𑌷𑍇 𑌵𑍈𑌷𑍍𑌣𑌵𑌾𑌧𑍍𑌵𑌨𑌿 𑌪𑌰𑌮𑌪𑌦𑌪𑍍𑌰𑌾𑌪𑍍𑌤𑍌 𑌶𑍍𑌰𑍇𑌯𑌃 𑌭𑌦𑍍𑌰𑌂 𑌨 𑌹𑌿 𑌸𑌮𑍍𑌭𑌾𑌵𑍍𑌯𑌤𑍇 𑌉𑌪𑌪𑌦𑍍𑌯𑌤𑍇 𑌕𑌰𑍍𑌹𑌿𑌚𑌿𑌤𑍍 𑌕𑌦𑌾𑌚𑌨 । 𑌕𑌿𑌮𑍁𑌤 𑌇𑌤𑌰𑍇 𑌪𑍁𑌰𑍁𑌷𑌾𑌰𑍍𑌥𑌾𑌃 𑌮𑍋𑌕𑍍𑌷𑍋𑌪𑌿 𑌦𑍇𑌵𑍍𑌯𑌾𑌃 𑌕𑌰𑍁𑌣𑌾𑌕𑌟𑌾𑌕𑍍𑌷𑌾𑌵𑌲𑌮𑍍𑌬𑌿𑌤 𑌇𑌤𑍍𑌯𑌭𑌿𑌪𑍍𑌰𑍈𑌤𑌿 ।

𑌶𑌾𑌨𑍍𑌤𑌾𑌨𑌨𑍍𑌦𑌮𑌹𑌾𑌵𑌿𑌭𑍂𑌤𑌿 𑌪𑌰𑌮𑌂 𑌯𑌦𑍍𑌬𑍍𑌰𑌹𑍍𑌮 𑌰𑍂𑌪𑌂 𑌹𑌰𑍇𑌰𑍍𑌮𑍂𑌰𑍍𑌤𑌂 𑌬𑍍𑌰𑌹𑍍𑌮 𑌤𑌤𑍋𑌪𑌿 𑌤𑌤𑍍𑌪𑍍𑌰𑌿𑌯𑌤𑌰𑌂 𑌰𑍂𑌪𑌂 𑌯𑌦𑌤𑍍𑌯𑌦𑍍𑌭𑍁𑌤𑌮𑍍 ।
𑌯𑌾𑌨𑍍𑌯𑌨𑍍𑌯𑌾𑌨𑌿 𑌯𑌥𑌾𑌸𑍁𑌖𑌂 𑌵𑌿𑌹𑌰𑌤𑍋 𑌰𑍂𑌪𑌾𑌣𑌿 𑌸𑌰𑍍𑌵𑌾𑌣𑌿 𑌤𑌾𑌨𑍍𑌯𑌾𑌹𑍁𑌃 𑌸𑍍𑌵𑍈𑌰𑌨𑍁𑌰𑍂𑌪𑌰𑍂𑌪𑌵𑌿𑌭𑌵𑍈𑌰𑍍𑌗𑌾𑌢𑍋𑌪𑌗𑍂𑌢𑌾𑌨𑌿 𑌤𑍇 ॥

𑌯𑌤𑍍 𑌶𑌾𑌨𑍍𑌤𑌾𑌨𑌨𑍍𑌦𑌮𑌹𑌾𑌵𑌿𑌭𑍂𑌤𑌿 𑌪𑌰𑌮𑌂 𑌬𑍍𑌰𑌹𑍍𑌮 𑌰𑍂𑌪𑌂 । 𑌤𑌤𑍋𑌪𑌿 𑌤𑌤𑍍 𑌪𑍍𑌰𑌿𑌯𑌤𑌰𑌂 𑌰𑍂𑌪𑌂 𑌯𑌤𑍍 𑌮𑍂𑌰𑍍𑌤𑌂 𑌬𑍍𑌰𑌹𑍍𑌮 𑌅𑌤𑍍𑌯𑌦𑍍𑌭𑍁𑌤𑌮𑍍 । 𑌯𑌥𑌾𑌸𑍁𑌖𑌂 𑌵𑌿𑌹𑌰𑌤𑌃 𑌹𑌰𑍇𑌃 𑌯𑌾𑌨𑌿 𑌅𑌨𑍍𑌯𑌾𑌨𑌿 𑌰𑍂𑌪𑌾𑌣𑌿 । 𑌤𑌾𑌨𑌿 𑌸𑌰𑍍𑌵𑌾𑌣𑌿 𑌤𑍇 𑌸𑍍𑌵𑍈𑌰𑌨𑍁𑌰𑍂𑌪𑌰𑍂𑌪𑌵𑌿𑌭𑌵𑍈𑌃 𑌗𑌾𑌢𑍋𑌪𑌗𑍂𑌢𑌾𑌨𑌿 𑌆𑌹𑍁𑌃 ।

𑌅𑌥 𑌦𑌿𑌵𑍍𑌯𑌦𑌮𑍍𑌪𑌤𑍍𑌯𑍋𑌰𑌨𑌪𑌾𑌯𑌿𑌤𑍍𑌵𑌮𑍍 𑌉𑌪𑌵𑌰𑍍𑌣𑌯𑌤𑌿 । 𑌨𑌾𑌰𑌾𑌯𑌣𑌸𑍍𑌯 𑌯𑌾𑌨𑌿 𑌰𑍂𑌪𑌾𑌣𑌿 𑌮𑍂𑌰𑍍𑌤𑌯𑌃 𑌸𑌨𑍍𑌤𑌿 । 𑌕𑍀𑌦𑍃𑌂𑌶𑌿 । 𑌪𑍍𑌰𑌥𑌮𑌂 𑌦𑌿𑌵𑍍𑌯𑌾𑌤𑍍𑌮𑌸𑍍𑌵𑌰𑍂𑌪𑌮𑍍 । 𑌶𑌾𑌨𑍍𑌤𑌾𑌨𑌨𑍍𑌦𑌮𑌹𑌾𑌵𑌿𑌭𑍂𑌤𑌿 । 𑌶𑌾𑌨𑍍𑌤𑌂 𑌷𑌡𑍍𑌭𑌿𑌰𑍂𑌰𑍍𑌮𑌿𑌭𑌿𑌃 𑌪𑌿𑌪𑌾𑌸𑌾𑌕𑍍𑌷𑍁𑌚𑍍𑌛𑍋𑌕𑌮𑍋𑌹𑌜𑌰𑌾𑌮𑍃𑌤𑍍𑌯𑍁𑌭𑍀 𑌰𑌹𑌿𑌤𑌮𑍍 । 𑌆𑌨𑌨𑍍𑌦𑌮𑍍 𑌜𑍍𑌞𑌾𑌨𑌾𑌨𑌨𑍍𑌦𑌮𑌯𑌮𑍍 । 𑌮𑌹𑌾𑌵𑌿𑌭𑍂𑌤𑌿 𑌸𑌰𑍍𑌵𑌵𑍍𑌯𑌾𑌪𑌿 । 𑌤𑌥𑌾 𑌶𑌾𑌨𑍍𑌤𑌮𑍍 𑌆𑌨𑌨𑍍𑌦𑌂 𑌮𑌹𑌾𑌵𑌿𑌭𑍂𑌤𑌿 𑌶𑌾𑌨𑍍𑌤𑌾𑌨𑌨𑍍𑌦𑌮𑌹𑌾𑌵𑌿𑌭𑍂𑌤𑍀𑌤𑌿 । 𑌪𑌰𑌮𑌂 𑌪𑌰𑍋 𑌮𑌾𑌸𑍍𑌯𑍇𑌤𑌿 𑌪𑌰𑌮𑌂 𑌨𑌿𑌰𑍁𑌪𑌮𑌮𑍍 । 𑌬𑍍𑌰𑌹𑍍𑌮 𑌬𑍃𑌹𑌤𑍍 𑌬𑍃𑌂𑌹𑌣𑌂 𑌚 । 𑌅𑌧𑍁𑌨𑌾 𑌦𑌿𑌵𑍍𑌯𑌮𑌙𑍍𑌗𑌲𑌵𑌿𑌗𑍍𑌰𑌹𑌃 । 𑌮𑍂𑌰𑍍𑌤𑌂 𑌮𑍂𑌰𑍍𑌤𑌿𑌮𑌤𑍍 𑌬𑍍𑌰𑌹𑍍𑌮 𑌬𑍍𑌰𑌹𑍍𑌮𑌶𑌬𑍍𑌦𑌵𑌾𑌚𑍍𑌯𑌮𑍍 𑌅𑌤𑍍𑌯𑌦𑍍𑌭𑍁𑌤𑌮𑌤𑍍𑌯𑌾𑌶𑍍𑌚𑌰𑍍𑌯𑌕𑌰𑌂 𑌤𑌤𑍋𑌪𑌿 𑌅𑌮𑍂𑌰𑍍𑌤𑌰𑍂𑌪𑌾𑌦𑌪𑌿 𑌪𑍍𑌰𑌿𑌯𑌤𑌰𑌂 𑌲𑍋𑌕𑌾𑌨𑌾𑌂 𑌸𑍌𑌲𑌭𑍍𑌯𑌾𑌤𑍍 𑌯𑌦𑍍𑌰𑍂𑌪𑌂 𑌤𑌤𑍍 । 𑌹𑌰𑌿𑌰𑍍𑌵𑌿𑌷𑍍𑌣𑍁𑌃 𑌯𑌥𑌾𑌸𑍁𑌖𑌂 𑌯𑌥𑍇𑌚𑍍𑌛𑌂 𑌵𑌿𑌹𑌰𑌤𑌿 𑌪𑌰𑌿𑌕𑍍𑌰𑌾𑌮𑌤𑌿 । 𑌤𑌥𑌾𑌭𑍂𑌤𑌸𑍍𑌯 𑌯𑌾𑌨𑌿 𑌅𑌨𑍍𑌯𑌾𑌨𑌿 𑌰𑍂𑌪𑌾𑌣𑌿 𑌸𑍍𑌯𑍁𑌃 । 𑌵𑌿𑌭𑌵𑌾𑌦𑌿𑌮𑍂𑌰𑍍𑌤𑍀𑌨𑌾𑌂 𑌗𑍍𑌰𑌹𑌣𑌮𑌤𑍍𑌰 । 𑌆𑌹𑍁𑌃 𑌪𑍍𑌰𑌮𑌾𑌣𑌾 𑌇𑌤𑌿 𑌶𑍇𑌷𑌃 । 𑌕𑌿𑌮𑌾𑌹𑍁𑌃 । 𑌤𑌾𑌨𑌿 𑌸𑌰𑍍𑌵𑌾𑌣𑌿 𑌰𑍂𑌪𑌾𑌣𑌿 𑌤𑍇 𑌤𑌵 𑌸𑍍𑌵𑍈𑌃 𑌸𑍍𑌵𑌕𑍀𑌯𑍈𑌃 𑌅𑌨𑍁𑌰𑍂𑌪𑌰𑍂𑌪𑌵𑌿𑌭𑌵𑍈𑌃 𑌅𑌨𑍁𑌰𑍂𑌪𑌾𑌣𑌾𑌮𑍍 𑌅𑌨𑍁𑌕𑍂𑌲𑌾𑌨𑌾𑌂 𑌰𑍂𑌪𑌾𑌣𑌾𑌂 𑌮𑍂𑌰𑍍𑌤𑍀𑌨𑌾𑌂 𑌵𑌿𑌭𑌵𑍈𑌃 𑌕𑍀𑌰𑍍𑌤𑌿𑌮𑌦𑍍𑌭𑌿𑌃 𑌗𑌾𑌢𑍋𑌪𑌗𑍂𑌢𑌾𑌨𑌿 𑌗𑌾𑌢𑌮𑍍 𑌦𑍃𑌢𑌮𑍍 𑌉𑌪𑌗𑍂𑌢𑌾𑌨𑌿 𑌆𑌲𑌿𑌙𑍍𑌗𑌿𑌤𑌾𑌨𑌿 𑌅𑌨𑌪𑌾𑌯𑍀𑌨𑌿 ।

𑌆𑌕𑌾𑌰𑌤𑍍𑌰𑌯𑌸𑌮𑍍𑌪𑌨𑍍𑌨𑌾𑌮𑌰𑌵𑌿𑌨𑍍𑌦𑌨𑌿𑌵𑌾𑌸𑌿𑌨𑍀𑌮𑍍 ।
𑌅𑌶𑍇𑌷𑌜𑌗𑌦𑍀𑌶𑌿𑌤𑍍𑌰𑍀𑌂 𑌵𑌨𑍍𑌦𑍇 𑌵𑌰𑌦𑌵𑌲𑍍𑌲𑌭𑌾𑌮𑍍 ॥

॥ 𑍐 𑌸𑌰𑍍𑌵𑌂 𑌶𑍍𑌰𑍀𑌕𑍃𑌷𑍍𑌣𑌾𑌰𑍍𑌪𑌣𑌮𑌸𑍍𑌤𑍁 ॥