Ambarish Sridharanarayanan

Personal website + blog of Ambarish Sridharanarayanan.

𑌰𑌾𑌘𑌵𑌾𑌷𑍍𑌟𑌕𑌮𑍍

•ambarish•religion

𑌶𑍍𑌰𑍁𑌤𑌿𑌸𑍍𑌮𑍃𑌤𑌿𑌪𑍁𑌰𑌾𑌣𑌾𑌨𑌾𑌮𑌾𑌲𑌯𑌂 𑌕𑌰𑍁𑌣𑌾𑌲𑌯𑌮𑍍 ।
𑌨𑌮𑌾𑌮𑌿 𑌭𑌗𑌵𑌤𑍍𑌪𑌾𑌦𑌶𑌙𑍍𑌕𑌰𑌂 𑌲𑍋𑌕𑌶𑌙𑍍𑌕𑌰𑌮𑍍 ॥

𑌦𑍈𑌨𑌂 𑌸𑍍𑌵𑌰𑌾𑌙𑍍𑌕𑌿𑌤𑌪𑌦𑌾𑌲𑌿 𑌪𑌿𑌤𑌾𑌮𑌹𑍀 𑌯𑌾 𑌯𑌚𑍍𑌛𑌾𑌙𑍍𑌕𑌰𑌂 𑌸𑍁𑌮𑌧𑍁𑌰𑌂 𑌸𑍍𑌤𑌵𑌨𑌂 𑌨𑍍𑌯𑌗𑌾𑌦𑍀𑌤𑍍 ।
𑌤𑌾𑌂 𑌨𑌿𑌰𑍍𑌵𑍃𑌤𑌾𑌂 𑌕𑌨𑌕𑌵𑌲𑍍𑌲𑌿𑌮𑍁𑌪𑌾𑌸𑍍𑌯 𑌭𑍂𑌯𑌸𑍍𑌤𑌦𑍍𑌰𑌾𑌘𑌵𑌾𑌷𑍍𑌟𑌕𑌮𑌿𑌦𑌂 𑌵𑌿𑌵𑍃𑌣𑍋𑌮𑌿 𑌭𑍂𑌤𑍍𑌯𑍈 ॥

𑌅𑌥𑌾𑌷𑍍𑌟𑌕𑌮𑍍 । 𑌯𑌦𑍍𑌯𑌪𑌿 𑌶𑌙𑍍𑌕𑌰𑌭𑌗𑌵𑌤𑍍𑌪𑌾𑌦𑌕𑍃𑌤𑍀𑌨𑌾𑌂 𑌸𑌮𑍍𑌪𑍂𑌰𑍍𑌣𑌾𑌵𑌲𑍍𑌯𑌾𑌮𑍍 𑌅𑌷𑍍𑌟𑌕𑌮𑌿𑌦𑌂 𑌨𑌾𑌨𑍍𑌤𑌰𑍍𑌭𑍂𑌤𑌂 𑌯𑌦𑍍𑌯𑌪𑌿 𑌚 𑌆𑌦𑍍𑌯𑌃 𑌪𑍃𑌥𑌗𑍍𑌭𑍂𑌤𑌃 𑌶𑍍𑌲𑍋𑌕𑌃 𑌤𑌤𑍍𑌸𑌾𑌮𑌾𑌨𑍍𑌯𑌕𑍃𑌤𑌿𑌷𑍁 𑌨 𑌭𑌵𑌤𑌿 𑌤𑌥𑌾𑌪𑌿 𑌸𑌮𑍍𑌪𑍍𑌰𑌦𑌾𑌯𑌾𑌤𑍍 𑌸𑍍𑌤𑍋𑌤𑍍𑌰𑌮𑌿𑌦𑌂 𑌶𑌾𑌙𑍍𑌕𑌰𑌂 𑌮𑌨𑍍𑌯𑌤𑍇 ।

𑌰𑌾𑌮 𑌰𑌾𑌮 𑌨𑌮𑍋𑌸𑍍𑌤𑍁𑌤𑍇 𑌜𑌯 𑌰𑌾𑌮𑌭𑌦𑍍𑌰 𑌨𑌮𑍋𑌸𑍍𑌤𑍁𑌤𑍇 𑌰𑌾𑌮𑌚𑌨𑍍𑌦𑍍𑌰 𑌨𑌮𑍋𑌸𑍍𑌤𑍁𑌤𑍇 𑌜𑌯 𑌰𑌾𑌘𑌵𑌾𑌯 𑌨𑌮𑍋𑌸𑍍𑌤𑍁𑌤𑍇 ।
𑌦𑍇𑌵𑌦𑍇𑌵 𑌨𑌮𑍋𑌸𑍍𑌤𑍁𑌤𑍇 𑌜𑌯 𑌦𑍇𑌵𑌰𑌾𑌜 𑌨𑌮𑍋𑌸𑍍𑌤𑍁𑌤𑍇 𑌵𑌾𑌸𑍁𑌦𑍇𑌵 𑌨𑌮𑍋𑌸𑍍𑌤𑍁𑌤𑍇 𑌜𑌯 𑌵𑍀𑌰𑌰𑌾𑌜 𑌨𑌮𑍋𑌸𑍍𑌤𑍁𑌤𑍇 ॥

𑌆𑌦𑍌 𑌰𑌾𑌮𑌨𑌾𑌮𑌜𑌪𑌾𑌤𑍍 𑌉𑌪𑌕𑍍𑌰𑌮𑌤𑍇 । 𑌰𑌾𑌮𑌰𑌾𑌮𑍇𑌤𑌿 𑌦𑍍𑌵𑌿𑌰𑍁𑌕𑍍𑌤𑌿𑌃 𑌵𑌾𑌕𑍍𑌯𑌾𑌦𑍇𑌰𑌾𑌮𑌨𑍍𑌤𑍍𑌰𑌿𑌤𑌸𑍍𑌯𑌾𑌸𑍂𑌯𑌾𑌸𑌮𑍍𑌮𑌤𑌿𑌕𑍋𑌪𑌕𑍁𑌤𑍍𑌸𑌨𑌭𑌰𑍍𑌤𑍍𑌸𑌨𑍇𑌷𑍍𑌵𑌿𑌤𑌿 𑌸𑌮𑍍𑌮𑌤𑍌 । 𑌤𑍇 𑌇𑌤𑌿 𑌚𑌤𑍁𑌰𑍍𑌥𑍀 𑌨𑌮𑌃𑌸𑍍𑌵𑌸𑍍𑌤𑌿𑌸𑍍𑌵𑌾𑌹𑌾𑌸𑍍𑌵𑌧𑌾𑌲𑌮𑍍𑌵𑌷𑌡𑍍𑌯𑍋𑌗𑌾𑌚𑍍𑌚 𑌇𑌤𑌿 । 𑌜𑌯𑍇𑌤𑌿 𑌪𑍍𑌰𑍇𑌰𑌣𑌾𑌵𑌾𑌚𑌕𑌮𑍍 । 𑌰𑌾𑌮𑌭𑌦𑍍𑌰𑌃 𑌰𑌾𑌮𑌶𑍍𑌚𑌾𑌸𑍌 𑌭𑌦𑍍𑌰𑌶𑍍𑌚 । 𑌰𑌾𑌮𑌚𑌨𑍍𑌦𑍍𑌰𑌃 𑌰𑌾𑌮𑌃 𑌚𑌨𑍍𑌦𑍍𑌰 𑌇𑌵 । 𑌦𑍇𑌵𑌦𑍇𑌵 𑌦𑍇𑌵𑌾𑌨𑌾𑌂 𑌸𑍁𑌰𑌾𑌣𑌾𑌂 𑌸𑍍𑌤𑌵𑍍𑌯𑌃 । 𑌦𑍇𑌵𑌰𑌾𑌜𑌃 𑌸𑍁𑌰𑌾𑌣𑌾𑌮𑍍 𑌅𑌧𑌿𑌪𑌤𑌿𑌃 । 𑌰𑌾𑌜𑌾𑌹𑌸𑍍𑌸𑌖𑌿𑌭𑍍𑌯𑌷𑍍𑌟𑌚𑍍 𑌇𑌤𑌿 𑌨𑌸𑍍𑌤𑌦𑍍𑌧𑌿𑌤𑍇 𑌇𑌤𑌿 𑌚 𑌅𑌕𑌾𑌰𑌾𑌨𑍍𑌤𑌤𑌾 । 𑌵𑌾𑌸𑍁𑌦𑍇𑌵𑌃 𑌵𑌾𑌸𑍁𑌶𑍍𑌚𑌾𑌸𑍌 𑌦𑍇𑌵𑌶𑍍𑌚 𑌵𑌸𑌤𑌿 𑌸𑌰𑍍𑌵𑌤𑍍𑌰 𑌵𑍍𑌯𑌾𑌪𑌯𑌤𑍀𑌤𑌿 𑌸𑌰𑍍𑌵𑌮𑍍 𑌅𑌸𑍍𑌮𑌿𑌨𑍍 𑌵𑌸𑌤𑍀𑌤𑌿 𑌚 𑌵𑌾𑌸𑍁𑌃 । 𑌦𑍀𑌵𑍍𑌯𑌤𑌿 𑌕𑍍𑌰𑍀𑌡𑌤𑌿 𑌲𑍀𑌲𑌾𑌵𑌿𑌭𑍂𑌤𑍍𑌯𑌾 𑌵𑌿𑌜𑍀𑌗𑍀𑌷𑌤𑌿 𑌶𑌤𑍍𑌰𑍂𑌨𑍍 𑌰𑌾𑌜𑌤𑍇 𑌵𑍇𑌤𑌿 𑌦𑍇𑌵𑌃 । 𑌯𑌦𑍍𑌵𑌾 𑌵𑌸𑍁𑌦𑍇𑌵𑌸𑍍𑌯 𑌅𑌪𑌤𑍍𑌯𑌂 𑌪𑍁𑌮𑌾𑌨𑌿𑌤𑌿 । 𑌨𑌾𑌮𑍍𑌨𑌾𑌨𑍇𑌨 𑌶𑍍𑌰𑍀𑌰𑌾𑌮𑌚𑌨𑍍𑌦𑍍𑌰𑌸𑍍𑌯 𑌯𑌦𑍍𑌯𑌪𑌿 𑌮𑌨𑍁𑌷𑍍𑌯𑌰𑍂𑌪𑌸𑍍𑌯 𑌪𑌰𑌵𑌾𑌸𑍁𑌦𑍇𑌵𑌾𑌵𑌤𑌾𑌰𑌤𑍍𑌵𑌂 𑌦𑍍𑌯𑍋𑌤𑌿𑌤𑌮𑍍 । 𑌵𑍀𑌰𑌰𑌾𑌜𑌃 𑌵𑍀𑌰𑍇𑌷𑍁 𑌶𑍍𑌰𑍇𑌷𑍍𑌠𑌃 । 𑌮𑌤𑍍𑌤𑌕𑍋𑌕𑌿𑌲𑌵𑍃𑌤𑍍𑌤𑌂 𑌰𑌃 𑌸𑌜𑍌 𑌜𑌭𑌰𑌾𑌃 𑌕𑍍𑌰𑌮𑍇𑌣 𑌹𑌿 𑌮𑌤𑍍𑌤𑌕𑍋𑌕𑌿𑌲𑌮𑍁𑌚𑍍𑌯𑌤𑍇 । 𑌅𑌸𑍍𑌯 𑌮𑌲𑍍𑌲𑌿𑌕𑌾𑌮𑌾𑌲𑍇𑌤𑌿 𑌕𑍇𑌚𑌨𑌾𑌭𑌿𑌦𑌧𑌤𑍇 । 𑌸𑌰𑍍𑌵𑌾𑌣𑌿 𑌪𑌦𑍍𑌯𑌾𑌨𑌿 𑌵𑍃𑌤𑍍𑌤𑍇𑌨𑌾𑌨𑍇𑌨 𑌰𑌚𑌿𑌤𑌾𑌨𑌿 ।

𑌰𑌾𑌘𑌵𑌂 𑌕𑌰𑍁𑌣𑌾𑌕𑌰𑌂 𑌮𑍁𑌨𑌿𑌸𑍇𑌵𑌿𑌤𑌂 𑌸𑍁𑌰𑌵𑌨𑍍𑌦𑌿𑌤𑌂 𑌜𑌾𑌨𑌕𑍀𑌵𑌦𑌨𑌾𑌰𑌵𑌿𑌨𑍍𑌦𑌦𑌿𑌵𑌾𑌕𑌰𑌂 𑌗𑍁𑌣𑌭𑌾𑌜𑌨𑌮𑍍 ।
𑌵𑌾𑌲𑌿𑌸𑍂𑌨𑍁𑌹𑍃𑌦𑍀𑌕𑍍𑌷𑌣𑌂 𑌹𑌨𑍁𑌮𑌤𑍍𑌪𑍍𑌰𑌿𑌯𑌂 𑌕𑌮𑌲𑍇𑌕𑍍𑌷𑌣𑌂 𑌯𑌾𑌤𑍁𑌧𑌾𑌨𑌭𑌯𑌙𑍍𑌕𑌰𑌂 𑌪𑍍𑌰𑌣𑌮𑌾𑌮𑌿 𑌰𑌾𑌘𑌵𑌕𑍁𑌞𑍍𑌜𑌰𑌮𑍍 ॥

𑌰𑌾𑌘𑌵𑌂 𑌰𑌘𑍁𑌕𑍁𑌲𑍇 𑌭𑌵𑌂 𑌕𑌰𑍁𑌣𑌾𑌕𑌰𑌂 𑌦𑌯𑌾𑌵𑌨𑍍𑌤𑌂 𑌮𑍁𑌨𑌿𑌸𑍇𑌵𑌿𑌤𑌮𑍍 𑌋𑌷𑌿𑌶𑍍𑌰𑌿𑌤𑌂 𑌸𑍁𑌰𑌵𑌨𑍍𑌦𑌿𑌤𑌂 𑌦𑍇𑌵𑌪𑍂𑌜𑌿𑌤𑌂 । 𑌜𑌾𑌨𑌕𑍀𑌵𑌦𑌨𑌾𑌰𑌵𑌿𑌨𑍍𑌦𑌦𑌿𑌵𑌾𑌕𑌰𑌂 𑌜𑌾𑌨𑌕𑍀 𑌜𑌨𑌕𑌤𑌨𑌯𑌾 𑌸𑍀𑌤𑌾 𑌤𑌦𑍍𑌵𑌦𑌨𑌮𑍇𑌵𑌾𑌰𑌵𑌿𑌨𑍍𑌦𑌂 𑌜𑌾𑌨𑌕𑍀𑌵𑌦𑌨𑌾𑌰𑌵𑌿𑌨𑍍𑌦𑌂 𑌤𑌥𑌾𑌭𑍂𑌤𑌸𑍍𑌯 𑌦𑌿𑌵𑌾𑌕𑌰𑌃 𑌉𑌤𑍍𑌫𑍁𑌲𑍍𑌲𑌯𑌿𑌤𑌾 𑌸𑌨𑍍𑌤𑍋𑌷𑌕𑌃 𑌯𑌥𑌾 𑌸𑍂𑌰𑍍𑌯𑌃 𑌕𑌮𑌲𑌂 𑌵𑌿𑌕𑌾𑌸𑌯𑌤𑌿 । 𑌗𑍁𑌣𑌭𑌾𑌜𑌨𑌂 𑌸𑌦𑍍𑌗𑍁𑌣𑌾𑌨𑌾𑌂 𑌪𑌾𑌤𑍍𑌰𑌮𑍍 । 𑌵𑌾𑌲𑌿𑌸𑍂𑌨𑍁𑌹𑍃𑌦𑍀𑌕𑍍𑌷𑌣𑌂 𑌵𑌾𑌲𑌿𑌨𑌃 𑌸𑍂𑌨𑍁𑌃 𑌨𑌲𑍋𑌪𑌃 𑌪𑍍𑌰𑌾𑌤𑌿𑌪𑌦𑌿𑌕𑌾𑌨𑍍𑌤𑌸𑍍𑌯 𑌇𑌤𑍍𑌯𑌸𑍍𑌮𑌾𑌤𑍍 𑌵𑌾𑌲𑌿𑌸𑍂𑌨𑍁𑌰𑌙𑍍𑌗𑌦𑌃 । 𑌤𑌦𑍍𑌧𑍃𑌤𑍍 𑌹𑍃𑌦𑌯𑌮𑍍 । 𑌈𑌕𑍍𑌷𑍍𑌯𑌤𑍇 𑌇𑌤𑌿 𑌈𑌕𑍍𑌷𑌣𑌃 𑌲𑌕𑍍𑌷𑍍𑌯𑌮𑍍 । 𑌅𑌙𑍍𑌗𑌦𑌹𑍃𑌦𑌯𑌲𑌕𑍍𑌷𑍍𑌯𑌮𑍍 𑌅𑌙𑍍𑌗𑌦𑌾𑌰𑍍𑌚𑌿𑌤𑌮𑌿𑌤𑌿 𑌯𑌾𑌵𑌤𑍍 । 𑌹𑌨𑍁𑌮𑌤𑍍𑌪𑍍𑌰𑌿𑌯𑌂 𑌆𑌞𑍍𑌜𑌨𑍇𑌯𑌵𑌲𑍍𑌲𑌭𑌂 𑌕𑌲𑌮𑍇𑌕𑍍𑌷𑌣𑌂 𑌪𑌦𑍍𑌮𑌾𑌕𑍍𑌷𑌂 𑌯𑌾𑌤𑍁𑌧𑌾𑌨𑌭𑌯𑌙𑍍𑌕𑌰𑌂 𑌤𑌦𑍍𑌵𑌰𑍍𑌗𑍀𑌯𑌰𑌾𑌕𑍍𑌷𑌸𑌾𑌨𑌾𑌂 𑌭𑌯𑌙𑍍𑌕𑌰𑌂 𑌭𑍀𑌷𑌣𑌂 𑌪𑍍𑌰𑌣𑌮𑌾𑌮𑌿 𑌤𑌥𑌾𑌭𑍂𑌤𑌂 𑌶𑍍𑌰𑍀𑌰𑌾𑌮𑌚𑌨𑍍𑌦𑍍𑌰𑌂 𑌨𑌮𑌾𑌮𑌿 𑌨𑍌𑌮𑌿 𑌰𑌾𑌘𑌵𑌕𑍁𑌞𑍍𑌜𑌰𑌂 𑌰𑌘𑍁𑌕𑍁𑌲𑌶𑌾𑌰𑍍𑌦𑍂𑌲𑌮𑍍 ।

𑌮𑍈𑌥𑌿𑌲𑍀𑌕𑍁𑌚𑌭𑍂𑌷𑌣𑌾𑌮𑌲𑌨𑍀𑌲𑌮𑍌𑌕𑍍𑌤𑌿𑌕𑌮𑍀𑌶𑍍𑌵𑌰𑌂 𑌰𑌾𑌵𑌣𑌾𑌨𑍁𑌜𑌪𑌾𑌲𑌨𑌂 𑌰𑌘𑍁𑌪𑍁𑌙𑍍𑌗𑌵𑌂 𑌮𑌮 𑌦𑍈𑌵𑌤𑌮𑍍 ।
𑌮𑍇𑌦𑌿𑌨𑍀𑌤𑌨𑌯𑌾𑌮𑍁𑌖𑌾𑌮𑍍𑌬𑍁𑌜𑌬𑍋𑌧𑌕𑌾𑌰𑌿𑌦𑌿𑌵𑌾𑌕𑌰𑌂 𑌸𑍂𑌰𑍍𑌯𑌵𑌂𑌶𑌵𑌿𑌵𑌰𑍍𑌧𑌨𑌂 𑌪𑍍𑌰𑍍𑌣𑌮𑌾𑌮𑌿 𑌰𑌾𑌘𑌵𑌕𑍁𑌞𑍍𑌜𑌰𑌮𑍍 ॥

𑌮𑍈𑌥𑌿𑌲𑍀𑌕𑍁𑌚𑌭𑍂𑌷𑌣𑌾𑌮𑌲𑌨𑍀𑌲𑌮𑍌𑌕𑍍𑌤𑌿𑌕𑌂 𑌮𑍈𑌥𑌿𑌲𑍀 𑌮𑌿𑌥𑌿𑌲𑌾𑌯𑌾𑌂 𑌭𑌵𑌾 𑌸𑍀𑌤𑌾𑌦𑍇𑌵𑍀 𑌤𑌤𑍍𑌕𑍁𑌚𑍌 𑌸𑍍𑌤𑌨𑍌 𑌤𑌯𑍋𑌰𑍍𑌭𑍂𑌷𑌣𑌮𑍍 𑌆𑌭𑌰𑌣𑌂 𑌭𑍂𑌷𑌯𑌤𑌿 𑌅𑌲𑌙𑍍𑌕𑌰𑍋𑌤𑍀𑌤𑌿 𑌕𑌰𑍍𑌤𑌰𑌿 𑌲𑍍𑌯𑍁𑌟𑍍 । 𑌤𑌦𑍇𑌵 𑌨𑍀𑌲𑌮𑍌𑌕𑍍𑌤𑌿𑌕𑌂 𑌮𑍇𑌚𑌕𑌮𑍁𑌕𑍍𑌤𑌾𑌮𑌣𑌿𑌃 । 𑌰𑌾𑌮𑌃 𑌸𑍀𑌤𑌯𑌾 𑌕𑍍𑌰𑍀𑌡𑌨𑍍 𑌨𑍀𑌲𑌮𑍇𑌘𑌜𑌿𑌤𑌗𑌾𑌤𑍍𑌰𑌃 𑌸𑍀𑌤𑌾𑌸𑍍𑌤𑌨𑍍𑌯𑌪𑍍𑌰𑌦𑍇𑌶𑌸𑍍𑌥𑌮𑌣𑌿𑌰𑌿𑌵 𑌰𑌾𑌰𑌾𑌜𑍍𑌯𑌤𑍇 𑌇𑌤𑌿 𑌯𑌾𑌵𑌤𑍍 । 𑌈𑌶𑍍𑌵𑌰𑌮𑍍 𑌈𑌷𑍍𑌟𑍇 𑌸𑍍𑌥𑍇𑌶𑌭𑌾𑌸𑌪𑌿𑌸𑌕𑌸𑍋 𑌵𑌰𑌚𑍍 𑌇𑌤𑌿 𑌤𑌾𑌚𑍍𑌛𑍀𑌲𑍍𑌯𑍇 𑌈𑌶𑍍𑌵𑌰𑌃 𑌤𑌮𑍍 । 𑌰𑌾𑌵𑌣𑌾𑌨𑍁𑌜𑌪𑌾𑌲𑌨𑌂 𑌰𑌾𑌵𑌣𑌾𑌨𑍁𑌜𑌃 𑌵𑌿𑌭𑍀𑌷𑌣𑌃 𑌤𑌤𑍍𑌪𑌾𑌲𑌨𑌂 𑌰𑌕𑍍𑌷𑌕𑌂 𑌕𑌰𑍍𑌤𑌰𑌿 𑌲𑍍𑌯𑍁𑌟𑍍 । 𑌰𑌘𑍁𑌪𑍁𑌙𑍍𑌗𑌵𑌂 𑌰𑌘𑍁𑌕𑍁𑌲𑌨𑌾𑌯𑌕𑌮𑍍 । 𑌮𑌮 𑌮𑌦𑍀𑌯𑌂 𑌵𑍈𑌯𑌕𑍍𑌤𑌿𑌕𑌂 𑌗𑍁𑌣𑌾𑌲𑌙𑍍𑌕𑍃𑌤𑌂 𑌭𑌕𑍍𑌤𑌿𑌪𑌾𑌤𑍍𑌰𑌂 𑌦𑍈𑌵𑌤𑌂 𑌪𑌰𑌦𑍇𑌵𑌤𑌾𑌸𑍍𑌵𑌰𑍂𑌪𑌂 𑌭𑌗𑌵𑌨𑍍𑌤𑌮𑍍 । 𑌮𑍇𑌦𑌿𑌨𑍀𑌤𑌨𑌯𑌾𑌮𑍁𑌖𑌾𑌮𑍍𑌬𑍁𑌜𑌬𑍋𑌧𑌕𑌾𑌰𑌿𑌵𑌿𑌕𑌾𑌰𑌂 𑌮𑍇𑌦𑌿𑌨𑍀𑌤𑌨𑌯𑌾 𑌭𑍂𑌮𑌿𑌸𑍁𑌤𑌾 𑌪𑍁𑌨𑌶𑍍𑌚 𑌸𑍀𑌤𑌦𑍇𑌵𑍀 𑌤𑌨𑍍𑌮𑍁𑌖𑌮𑍇𑌵 𑌅𑌮𑍍𑌬𑍁𑌜𑌂 𑌮𑍁𑌖𑌾𑌮𑍍𑌬𑍁𑌜𑌂 𑌵𑌦𑌨𑌕𑌮𑌲𑌮𑍍 । 𑌤𑌦𑍍𑌬𑍋𑌧𑌕𑌾𑌰𑍀 𑌕𑌰𑍋𑌤𑍀𑌤𑌿 𑌕𑌾𑌰𑍀 𑌕𑍃𑌞𑍋 𑌣𑌿𑌨𑌿𑌃 । 𑌬𑍋𑌧𑌸𑍍𑌯 𑌵𑌿𑌕𑌾𑌸𑌸𑍍𑌯 𑌕𑌾𑌰𑍀 𑌵𑌿𑌕𑌾𑌸𑌯𑌿𑌤𑌾 । 𑌦𑌿𑌵𑌾𑌕𑌰𑌃 𑌸𑍀𑌰𑍍𑌯𑌃 । 𑌯𑌥𑌾 𑌸𑍂𑌰𑍍𑌯𑌾𑌗𑌮𑌨𑍇𑌨 𑌕𑌮𑌲𑌾𑌨𑌿 𑌵𑌿𑌕𑌸𑌨𑍍𑌤𑌿 𑌤𑌥𑌾 𑌰𑌾𑌮𑌚𑌨𑍍𑌦𑍍𑌰𑌾𑌗𑌮𑌨𑍇𑌨 𑌸𑍀𑌤𑌾𑌨𑌨𑌂 𑌵𑌿𑌕𑌸𑌤𑌿 । 𑌤𑌥𑌾𑌭𑍂𑌤𑌮𑍍 । 𑌸𑍂𑌰𑍍𑌯𑌵𑌂𑌶𑌵𑌿𑌵𑌰𑍍𑌧𑌨𑌂 𑌰𑌵𑌿𑌕𑍁𑌲𑌵𑌰𑍍𑌧𑌿𑌷𑍍𑌣𑍁𑌮𑍍 ।

𑌹𑍇𑌮𑌕𑍁𑌣𑍍𑌡𑌲𑌮𑌣𑍍𑌡𑌿𑌤𑌾𑌮𑌲𑌗𑌣𑍍𑌡𑌦𑍇𑌶𑌮𑌰𑌿𑌨𑍍𑌦𑌮𑌂 𑌶𑌾𑌤𑌕𑍁𑌮𑍍𑌭𑌮𑌯𑍂𑌰𑌨𑍇𑌤𑍍𑌰𑌵𑌿𑌭𑍂𑌷𑌣𑍇𑌨 𑌵𑌿𑌭𑍂𑌷𑌿𑌤𑌮𑍍 ।
𑌚𑌾𑌰𑍁𑌨𑍂𑌪𑍁𑌰𑌹𑌾𑌰𑌕𑍌𑌸𑍍𑌤𑍁𑌭𑌕𑌰𑍍𑌣𑌭𑍂𑌷𑌣𑌭𑍂𑌷𑌿𑌤𑌂 𑌭𑌾𑌨𑍁𑌵𑌂𑌶𑌵𑌿𑌵𑌰𑍍𑌧𑌨𑌂 𑌪𑍍𑌰𑌣𑌮𑌾𑌮𑌿 𑌰𑌾𑌘𑌵𑌕𑍁𑌞𑍍𑌜𑌰𑌮𑍍 ॥

𑌹𑍇𑌮𑌕𑍁𑌣𑍍𑌡𑌲𑌮𑌣𑍍𑌡𑌿𑌤𑌾𑌮𑌲𑌗𑌣𑍍𑌡𑌦𑍇𑌶𑌂 𑌹𑍇𑌮𑍍𑌨𑌾 𑌕𑌨𑌕𑍇𑌨 𑌕𑍃𑌤𑍇 𑌕𑍁𑌣𑍍𑌡𑌲𑍇 𑌕𑌰𑍍𑌣𑌵𑍇𑌷𑍍𑌟𑌨𑌾𑌭𑌰𑌣𑌯𑍁𑌗𑌲𑌂 𑌤𑌾𑌭𑍍𑌯𑌾𑌂 𑌮𑌣𑍍𑌡𑌿𑌤𑌃 𑌭𑍂𑌷𑌿𑌤𑌃 𑌅𑌮𑌲𑌃 𑌨𑌿𑌰𑍍𑌮𑌲𑌃 𑌗𑌣𑍍𑌡𑌦𑍇𑌶𑌃 𑌕𑌪𑍋𑌲𑌸𑍍𑌥𑌾𑌨𑌂 𑌯𑌸𑍍𑌯 𑌤𑌮𑌿𑌤𑌿 । 𑌅𑌰𑌿𑌨𑍍𑌦𑌮𑌂 𑌶𑌤𑍍𑌰𑍍𑌰𑍋𑌪𑌶𑌮𑌨𑌂 𑌸𑌞𑍍𑌜𑍍𑌞𑌾𑌯𑌾𑌂 𑌭𑍃𑌤𑍄𑌵𑍃𑌜𑌿𑌧𑌾𑌰𑌿𑌸𑌹𑌿𑌤𑌪𑌿𑌦𑌮𑌃 𑌇𑌤𑍍𑌯𑌸𑍍𑌮𑌾𑌤𑍍 𑌖𑌚𑍍 𑌅𑌰𑍁𑌰𑍍𑌦𑍍𑌵𑌿𑌷𑌦𑌜𑌨𑍍𑌤𑌸𑍍𑌯 𑌮𑍁𑌮𑍍 𑌇𑌤𑍍𑌯𑌸𑍍𑌮𑌾𑌤𑍍 𑌮𑍁𑌂 𑌚 । 𑌶𑌾𑌤𑌕𑍁𑌮𑍍𑌭𑌮𑌯𑍂𑌰𑌨𑍇𑌤𑍍𑌰𑌵𑌿𑌭𑍂𑌷𑌣𑍇𑌨 𑌶𑌾𑌤𑌕𑍁𑌮𑍍𑌭𑌂 𑌸𑍁𑌵𑌰𑍍𑌣𑌂 𑌤𑍇𑌨 𑌨𑌿𑌰𑍍𑌮𑌿𑌤𑌂 𑌮𑌯𑍂𑌰𑌨𑍇𑌤𑍍𑌰𑌮𑍍 𑌇𑌤𑌿 𑌵𑌿𑌭𑍂𑌷𑌣𑍇𑌨 𑌆𑌭𑌰𑌣𑍇𑌨 𑌵𑌿𑌭𑍂𑌷𑌿𑌤𑌂 𑌅𑌲𑌙𑍍𑌗𑍃𑌤𑌮𑍍 । 𑌚𑌾𑌰𑍁𑌨𑍂𑌪𑍁𑌰𑌹𑌾𑌰𑌕𑍌𑌸𑍍𑌤𑍁𑌭𑌕𑌰𑍍𑌣𑌭𑍂𑌷𑌣𑌭𑍂𑌷𑌿𑌤𑌂 𑌚𑌾𑌰𑌵𑌃 𑌮𑌨𑍋𑌹𑌰𑌾𑌃 𑌨𑍂𑌪𑍁𑌰𑍌 𑌮𑌞𑍍𑌜𑍀𑌰𑍌 𑌹𑌾𑌰𑌃 𑌮𑌾𑌲𑌾 𑌕𑍌𑌸𑍍𑌤𑍁𑌭𑍋 𑌸𑌮𑍁𑌦𑍍𑌰𑌮𑌨𑍍𑌥𑌨𑌾𑌲𑍍𑌲𑌬𑍍𑌧𑌃 𑌉𑌰𑍋𑌮𑌣𑌿𑌃 𑌕𑌰𑍍𑌣𑌭𑍂𑌷𑌣𑍇 𑌶𑍍𑌰𑍋𑌤𑍍𑌰𑌲𑌙𑍍𑌕𑌾𑌰𑌵𑌸𑍍𑌤𑍁𑌨𑍀 𑌤𑍈𑌰𑍍𑌭𑍂𑌷𑌿𑌤𑌂 𑌮𑌣𑍍𑌡𑌿𑌤𑌮𑍍 ।

𑌦𑌣𑍍𑌡𑌕𑌾𑌖𑍍𑌯𑌵𑌨𑍇 𑌰𑌤𑌂 𑌸𑍁𑌰𑌸𑌿𑌦𑍍𑌧𑌯𑍋𑌗𑌿𑌗𑌣𑌾𑌶𑍍𑌰𑌯𑌂 𑌶𑌿𑌷𑍍𑌟𑌪𑌾𑌲𑌨𑌤𑌤𑍍𑌪𑌰𑌂 𑌧𑍃𑌤𑌿𑌶𑌾𑌲𑌿𑌪𑌾𑌰𑍍𑌥𑌕𑍃𑌤𑌸𑍍𑌤𑍁𑌤𑌿𑌮𑍍 ।
𑌕𑍁𑌮𑍍𑌭𑌕𑌰𑍍𑌣𑌭𑍁𑌜𑌾𑌭𑍁𑌜𑌙𑍍𑌗𑌵𑌿𑌕𑌰𑍍𑌤𑌨𑍇 𑌸𑍁𑌵𑌿𑌶𑌾𑌰𑌦𑌂 𑌲𑌕𑍍𑌷𑍍𑌮𑌨𑌾𑌨𑍁𑌜𑌵𑌤𑍍𑌸𑌲𑌂 𑌪𑍍𑌰𑌣𑌮𑌾𑌮𑌿 𑌰𑌾𑌘𑌵𑌕𑍁𑌞𑍍𑌜𑌰𑌮𑍍 ॥

𑌦𑌣𑍍𑌡𑌕𑌾𑌖𑍍𑌯𑌵𑌨𑍇 𑌦𑌣𑍍𑌡𑌕𑌨𑌾𑌮𑌨𑌿 𑌅𑌰𑌣𑍍𑌯𑍇 𑌰𑌤𑌂 𑌤𑌤𑍍𑌰 𑌵𑌸𑌨𑍍 𑌸𑌨𑍍𑌤𑍁𑌷𑍍𑌟𑌃 𑌤𑌥𑌾𑌭𑍂𑌤𑌮𑍍 । 𑌸𑍁𑌰𑌸𑌿𑌦𑍍𑌧𑌯𑍋𑌗𑌿𑌗𑌣𑌾𑌶𑍍𑌰𑌯𑌂 𑌸𑍁𑌰𑌾𑌃 𑌅𑌮𑌰𑌾𑌃 𑌸𑌿𑌦𑍍𑌧𑌾𑌃 𑌦𑍇𑌵𑌯𑍋𑌨𑌿𑌵𑌿𑌶𑍇𑌷𑌭𑍂𑌤𑌾𑌃 𑌯𑍋𑌗𑌿𑌨𑌃 𑌯𑌤𑌯𑌃 𑌤𑍇𑌷𑌾𑌂 𑌗𑌣𑌸𑍍𑌯 𑌸𑌮𑍂𑌹𑌸𑍍𑌯 𑌆𑌶𑍍𑌰𑌯𑌃 𑌅𑌯𑌨𑌮𑍍 । 𑌶𑌿𑌷𑍍𑌟𑌪𑌾𑌲𑌨𑌤𑌤𑍍𑌪𑌰𑌂 𑌶𑌿𑌷𑍍𑌟𑌾𑌃 𑌸𑌾𑌧𑌵𑌃 𑌤𑍇𑌷𑌾𑌂 𑌪𑌾𑌲𑌨𑌮𑍍 𑌅𑌭𑌿𑌰𑌕𑍍𑌷𑌣𑌂 𑌤𑌸𑍍𑌮𑌿𑌨𑍍 𑌕𑌰𑍍𑌮𑌣𑌿 𑌤𑌤𑍍𑌪𑌰𑌃 𑌆𑌸𑌕𑍍𑌤𑌃 𑌤𑌮𑍍 । 𑌧𑍃𑌤𑌿𑌶𑌾𑌲𑌿𑌵𑌾𑌲𑌿𑌕𑍃𑌤𑌸𑍍𑌤𑍁𑌤𑌿𑌂 𑌧𑍃𑌤𑌿𑌃 𑌧𑌾𑌰𑌣𑌾𑌶𑌕𑍍𑌤𑌿𑌃 𑌤𑌚𑍍𑌛𑌾𑌲𑍀 𑌤𑌦𑍍𑌵𑌾𑌨𑍍 𑌵𑌾𑌲𑍀 𑌦𑍇𑌵𑍇𑌨𑍍𑌦𑍍𑌰𑌸𑍁𑌤𑌃 𑌸𑍁𑌗𑍍𑌰𑍀𑌵𑌾𑌗𑍍𑌰𑌜𑌃 𑌵𑌾𑌨𑌰𑌾𑌧𑌿𑌪𑌃 𑌤𑍇𑌨 𑌕𑍃𑌤𑌾 𑌵𑌿𑌰𑌚𑌿𑌤𑌾 𑌸𑍍𑌤𑍁𑌤𑌿𑌃 𑌨𑍁𑌤𑌿𑌃 𑌯𑌸𑍍𑌯 𑌤𑌮𑍍 । 𑌕𑍁𑌮𑍍𑌭𑌕𑌰𑍍𑌣𑌭𑍁𑌜𑌾𑌭𑍁𑌜𑌙𑍍𑌗𑌵𑌿𑌕𑌰𑍍𑌤𑌨𑍇 𑌕𑍁𑌮𑍍𑌭𑌕𑌰𑍍𑌣𑌸𑍍𑌯 𑌤𑌨𑍍𑌨𑌾𑌮𑍍𑌨𑌃 𑌦𑍈𑌤𑍍𑌯𑌸𑍍𑌯 𑌰𑌾𑌵𑌣𑌾𑌨𑍁𑌜𑌸𑍍𑌯 𑌭𑍁𑌜𑍇 𑌬𑌾𑌹𑍂 𑌤𑍇 𑌭𑍁𑌜𑌙𑍍𑌗𑍌 𑌇𑌵 𑌕𑍁𑌮𑍍𑌭𑌕𑌰𑍍𑌣𑌭𑍁𑌜𑌾𑌭𑍁𑌜𑌙𑍍𑌗𑍌 𑌤𑌯𑍋𑌃 𑌵𑌿𑌕𑌰𑍍𑌤𑌨𑍇 𑌭𑍇𑌦𑌨𑍇 𑌸𑍁𑌵𑌿𑌶𑌾𑌰𑌦𑌂 𑌅𑌤𑌿𑌨𑌿𑌪𑍁𑌣𑌂 । 𑌲𑌕𑍍𑌷𑍍𑌮𑌣𑌾𑌨𑍁𑌜𑌵𑌤𑍍𑌸𑌲𑌂 𑌲𑌕𑍍𑌷𑍍𑌮𑌣𑌸𑍍𑌯 𑌅𑌨𑍁𑌜𑌃 𑌶𑌤𑍍𑌰𑍁𑌘𑍍𑌨𑌃 𑌤𑌸𑍍𑌮𑌿𑌨𑍍 𑌵𑌤𑍍𑌸𑌲𑌂 𑌸𑍍𑌨𑌿𑌗𑍍𑌧𑌮𑍍 ।

𑌕𑍇𑌤𑌕𑍀𑌕𑌰𑌵𑍀𑌰𑌜𑌾𑌤𑌿𑌸𑍁𑌗𑌨𑍍𑌧𑌿𑌮𑌾𑌲𑍍𑌯𑌸𑍁𑌶𑍋𑌭𑌿𑌤𑌂 𑌶𑍍𑌰𑍀𑌧𑌰𑌂 𑌮𑌿𑌥𑌿𑌲𑌾𑌤𑍍𑌮𑌜𑌾𑌕𑍁𑌚𑌕𑍁𑌙𑍍𑌕𑍁𑌮𑌾𑌰𑍁𑌣𑌵𑌕𑍍𑌷𑌸𑌮𑍍 ।
𑌦𑍇𑌵𑌦𑍇𑌵𑌮𑌶𑍇𑌷𑌭𑍂𑌤𑌮𑌨𑍋𑌹𑌰𑌂 𑌜𑌗𑌤𑌾𑌂 𑌪𑌤𑌿𑌂 𑌦𑌾𑌸𑌭𑍂𑌤𑌜𑌨𑌾𑌵𑌨𑌂 𑌪𑍍𑌰𑌣𑌮𑌾𑌮𑌿 𑌰𑌾𑌘𑌵𑌕𑍁𑌞𑍍𑌜𑌰𑌮𑍍 ॥

𑌕𑍇𑌤𑌕𑍀𑌕𑌰𑌵𑍀𑌰𑌜𑌾𑌤𑌿𑌸𑍁𑌗𑌨𑍍𑌧𑌿𑌮𑌾𑌲𑍍𑌯𑌸𑍁𑌶𑍋𑌭𑌿𑌤𑌂 𑌕𑍇𑌤𑌕𑍀 𑌕𑌰𑌵𑍀𑌰𑌃 𑌜𑌾𑌤𑌿𑌶𑍍𑌚 𑌕𑍁𑌸𑍁𑌮𑌵𑌿𑌶𑍇𑌷𑌾𑌃 𑌤𑍈𑌃 𑌶𑍋𑌭𑌨𑍋 𑌗𑌨𑍍𑌧𑍋 𑌆𑌮𑍋𑌦𑍋 𑌯𑌸𑍍𑌯 𑌤𑌤𑍍 𑌸𑍁𑌗𑌨𑍍𑌧𑌿 𑌗𑌨𑍍𑌧𑌸𑍍𑌯𑍇𑌦𑍁𑌤𑍍𑌪𑍂𑌤𑌿𑌸𑍁𑌸𑍁𑌰𑌭𑌿𑌭𑍍𑌯𑌃 𑌇𑌤𑌿 𑌇𑌦𑌾𑌗𑌮𑍇𑌨 𑌕𑍇𑌤𑌕𑍀𑌕𑌰𑌵𑍀𑌰𑌜𑌾𑌤𑌿𑌸𑍁𑌗𑌨𑍍𑌧𑌿 । 𑌤𑌥𑌾𑌭𑍂𑌤𑌂 𑌮𑌾𑌲𑍍𑌯𑌂 𑌮𑌾𑌲𑌾 𑌤𑍇𑌨 𑌸𑍁𑌶𑍋𑌭𑌿𑌤𑌂 𑌪𑍍𑌰𑌦𑍀𑌪𑍍𑌤𑌮𑍍 । 𑌶𑍍𑌰𑍀𑌧𑌰𑌂 𑌲𑌕𑍍𑌷𑍍𑌮𑍀𑌭𑌰𑍍𑌤𑌾𑌰𑌂 𑌧𑌰𑌤𑍀𑌤𑌿 𑌧𑌰𑌃 𑌶𑍍𑌰𑌿𑌯𑍋 𑌧𑌰𑌃 𑌤𑌮𑍍 𑌇𑌤𑌿 𑌷𑌷𑍍𑌠𑍀𑌤𑌤𑍍𑌪𑍁𑌰𑍁𑌷𑌵𑍍𑌯𑍁𑌤𑍍𑌪𑌤𑍍𑌤𑌿𑌃 । 𑌮𑌿𑌥𑌿𑌲𑌾𑌤𑍍𑌮𑌜𑌾𑌕𑍁𑌚𑌕𑍁𑌙𑍍𑌕𑍁𑌮𑌾𑌰𑍁𑌣𑌵𑌕𑍍𑌷𑌸𑌂 𑌮𑌿𑌥𑌿𑌲𑌾 𑌵𑌿𑌦𑍇𑌹𑌰𑌾𑌜𑌧𑌾𑌨𑍀 𑌤𑌦𑌾𑌤𑍍𑌮𑌜𑌾 𑌪𑍁𑌤𑍍𑌤𑍍𑌰𑍀 𑌸𑍀𑌤𑌾𑌦𑍇𑌵𑍀 𑌤𑌤𑍍𑌕𑍁𑌚𑌯𑍋𑌃 𑌸𑍍𑌤𑌨𑌯𑍋𑌃 𑌕𑍁𑌙𑍍𑌕𑍁𑌮𑍇𑌨 𑌅𑌰𑍁𑌣𑌂 𑌰𑌕𑍍𑌤𑌵𑌰𑍍𑌣𑌂 𑌵𑌕𑍍𑌷𑌃 𑌉𑌰𑌃 𑌯𑌸𑍍𑌯 𑌸𑌃 𑌮𑌿𑌥𑌿𑌲𑌾𑌤𑍍𑌮𑌜𑌾𑌕𑍁𑌚𑌕𑍁𑌙𑍍𑌕𑍁𑌮𑌾𑌰𑍁𑌣𑌵𑌕𑍍𑌷𑌾𑌃 𑌤𑌮𑍍 । 𑌸𑍀𑌤𑌾𑌰𑌾𑌮𑌯𑍋𑌃 𑌕𑍍𑌰𑍀𑌡𑌯𑌾 𑌸𑍀𑌤𑌾𑌕𑍁𑌚𑌸𑍍𑌥𑌂 𑌕𑍁𑌙𑍍𑌕𑍁𑌮𑌂 𑌰𑌾𑌮𑌵𑌕𑍍𑌷𑍋𑌗𑌤𑌮𑍍 𑌇𑌤𑌿 𑌭𑌾𑌵𑌃 । 𑌦𑍇𑌵𑌦𑍇𑌵𑌂 𑌸𑍁𑌰𑍇𑌶𑌮𑍍 𑌅𑌶𑍇𑌷𑌭𑍂𑌤𑌮𑌨𑍋𑌹𑌰𑌂 𑌸𑌰𑍍𑌵𑌪𑍍𑌰𑌾𑌣𑌿𑌚𑍇𑌤𑍋𑌗𑍍𑌰𑌾𑌹𑌿𑌣𑌮𑍍 । 𑌜𑌗𑌤𑌾𑌂 𑌲𑍋𑌕𑌾𑌨𑌾𑌂 𑌪𑌤𑌿𑌂 𑌨𑌾𑌥𑌮𑍍 । 𑌦𑌾𑌸𑌭𑍂𑌤𑌜𑌨𑌾𑌵𑌨𑌂 𑌦𑌾𑌸𑌭𑍂𑌤𑌾𑌃 𑌦𑌾𑌸𑌾𑌃 𑌕𑌿𑌙𑍍𑌕𑌰𑌾𑌃 𑌭𑍂𑌤𑌾𑌃 𑌸𑌮𑍍𑌪𑌨𑍍𑌨𑌾𑌃 𑌜𑌨𑌾 𑌮𑌨𑍁𑌷𑍍𑌯𑌾𑌃 𑌤𑍇𑌷𑌾𑌮𑍍 𑌅𑌵𑌨𑌂 𑌰𑌕𑍍𑌷𑌕𑌮𑍍 ।

𑌯𑌾𑌗𑌦𑌾𑌨𑌸𑌮𑌾𑌧𑌿𑌹𑍋𑌮𑌜𑌪𑌾𑌦𑌿𑌕𑌰𑍍𑌮𑌕𑌰𑍈𑌰𑍍𑌦𑍍𑌵𑌿𑌜𑍈𑌰𑍍𑌵𑍇𑌦𑌪𑌾𑌰𑌗𑌤𑍈𑌰𑌹𑌰𑍍𑌨𑌿𑌶𑌮𑌾𑌦𑌰𑍇𑌣 𑌸𑍁𑌪𑍂𑌜𑌿𑌤𑌮𑍍 ।
𑌤𑌾𑌟𑌕𑌾𑌵𑌧𑌧𑍀𑌰𑌮𑌙𑍍𑌗𑌦𑌨𑌾𑌥𑌵𑌾𑌲𑌿𑌨𑌿𑌷𑍂𑌦𑌨𑌂 𑌪𑍈𑌤𑍃𑌕𑍋𑌦𑌿𑌤𑌪𑌾𑌲𑌕𑌂 𑌪𑍍𑌰𑌣𑌮𑌾𑌮𑌿 𑌰𑌾𑌘𑌵𑌕𑍁𑌞𑍍𑌜𑌰𑌮𑍍 ॥

𑌯𑌾𑌗𑌦𑌾𑌨𑌸𑌮𑌾𑌧𑌿𑌹𑍋𑌮𑌜𑌪𑌾𑌦𑌿𑌕𑌰𑍍𑌮𑌕𑌰𑍈𑌃 𑌯𑌾𑌗𑌃 𑌮𑌖𑌃 𑌦𑍇𑌵𑌤𑌾𑌪𑍍𑌰𑍀𑌤𑍍𑌯𑍈 𑌫𑌲𑌦𑍍𑌰𑌵𑍍𑌯𑌾𑌦𑍀𑌨𑌾𑌂 𑌅𑌗𑍍𑌨𑍈 𑌤𑍍𑌯𑌾𑌗𑌰𑍂𑌪𑌂 𑌕𑌰𑍍𑌮 । 𑌦𑌾𑌨𑌮𑍍 𑌉𑌚𑌿𑌤𑍇𑌷𑍁 𑌪𑌾𑌤𑍍𑌰𑍇𑌷𑍁 𑌨𑌿𑌰𑍍𑌧𑌨𑌾𑌦𑌿𑌷𑍁 𑌦𑍍𑌰𑌵𑍍𑌯𑌵𑌿𑌤𑌰𑌣𑌮𑍍 । 𑌹𑍋𑌮𑌃 𑌮𑌨𑍍𑌤𑍍𑌰𑌸𑌹𑌿𑌤𑌂 𑌸𑍍𑌵𑌾𑌹𑌾𑌦𑌿𑌸𑌹𑌿𑌤𑌂 𑌅𑌗𑍍𑌨𑍌 𑌘𑍃𑌤𑌵𑌿𑌸𑌰𑍍𑌗𑌃 । 𑌜𑌪𑌃 𑌅𑌧𑍍𑌯𑌯𑌨𑌮𑍍 । 𑌇𑌤𑍍𑌯𑌾𑌦𑍀𑌨𑌿 𑌕𑌰𑍍𑌮𑌾𑌣𑌿 𑌕𑌰𑍋𑌤𑍀𑌤𑌿 𑌕𑌰𑍍𑌮𑌣𑌿 𑌭𑍃𑌤𑍌 𑌇𑌤𑍍𑌯𑌸𑍍𑌮𑌾𑌤𑍍 𑌟𑌃 𑌇𑌤𑌿 𑌪𑍍𑌰𑌤𑍍𑌯𑌯𑌾𑌤𑍍 𑌯𑌾𑌗𑌦𑌾𑌨𑌸𑌮𑌾𑌧𑌿𑌹𑍋𑌮𑌜𑌪𑌾𑌦𑌿𑌕𑌰𑍍𑌮𑌕𑌰𑌾𑌃 𑌤𑍈𑌃 । 𑌅𑌤𑍍𑌰 𑌭𑍃𑌤𑍇𑌃 𑌪𑍍𑌰𑌸𑌙𑍍𑌗𑌃 𑌕𑍍𑌵𑍇𑌤𑌿 । 𑌯𑌾𑌗𑌾𑌦𑌿𑌕𑌰𑍍𑌮𑌣𑌾𑌂 𑌫𑌲𑌸𑍍𑌯 𑌮𑍂𑌲𑍍𑌯𑌤𑍍𑌵𑌾𑌤𑍍 𑌭𑍃𑌤𑌿𑌰𑌸𑍍𑌤𑍍𑌯𑍇𑌵 । 𑌦𑍍𑌵𑌿𑌜𑍈𑌃 𑌵𑌿𑌪𑍍𑌰𑍈𑌃 𑌦𑍍𑌵𑌿𑌰𑍍𑌜𑌾𑌯𑌤𑍇 𑌮𑌾𑌤𑍁𑌰𑌗𑍍𑌰𑍇 𑌮𑍌𑌞𑍍𑌜𑌿𑌬𑌨𑍍𑌧𑌨𑌾𑌚𑍍𑌚𑍇𑌤𑌿 𑌅𑌨𑍍𑌯𑍇𑌭𑍍𑌯𑍋𑌪𑌿 𑌦𑍃𑌶𑍍𑌯𑌤𑍇 𑌇𑌤𑌿 𑌡𑌃 । 𑌵𑍇𑌦𑌪𑌾𑌰𑌗𑌤𑍈𑌃 𑌵𑍇𑌦𑍇𑌷𑍁 𑌆𑌮𑍍𑌨𑌾𑌯𑍇𑌷𑍁 𑌪𑌾𑌰𑌗𑌤𑌾𑌃 𑌅𑌧𑍀𑌤𑌸𑌕𑌲𑌾𑌃 𑌤𑌾𑌦𑍃𑌗𑍍𑌭𑌿𑌃 𑌦𑍍𑌵𑌿𑌜𑍈𑌰𑌿𑌤𑌿 𑌯𑌾𑌵𑌤𑍍 । 𑌅𑌹𑌰𑍍𑌨𑌿𑌶𑌂 𑌰𑌾𑌤𑍍𑌰𑌿𑌨𑍍𑌦𑌿𑌵𑌂 𑌅𑌹𑌶𑍍𑌚 𑌰𑌾𑌤𑍍𑌰𑌿𑌶𑍍𑌚 𑌇𑌤𑍍𑌯𑌤𑍍𑌰 𑌅𑌹𑌨𑍍 𑌪𑌦𑌸𑍍𑌯 𑌰𑍋𑌸𑍁𑌪𑌿 𑌇𑌤𑍍𑌯𑌸𑍍𑌮𑌾𑌤𑍍 𑌰𑍇𑌫𑌾𑌨𑍍𑌤𑌤𑍍𑌵𑌾𑌤𑍍 𑌅𑌹𑌰𑍍𑌨𑌿𑌶𑌪𑌦𑌸𑍍𑌯 𑌸𑌮𑌾𑌹𑌾𑌰𑌦𑍍𑌵𑌨𑍍𑌦𑍍𑌵𑌤𑍍𑌵𑌾𑌚𑍍𑌚 𑌕𑍍𑌲𑍈𑌬𑍍𑌯𑌾𑌤𑍍 𑌸𑌿𑌦𑍍𑌧𑌂 𑌰𑍂𑌪𑌮𑍍 । 𑌆𑌦𑌰𑍇𑌣 𑌸𑌤𑍍𑌕𑌾𑌰𑍇𑌣 𑌸𑍁𑌪𑍂𑌜𑌿𑌤𑌮𑍍 𑌅𑌭𑍍𑌯𑌰𑍍𑌚𑌿𑌤𑌮𑍍 । 𑌤𑌾𑌟𑌕𑌾𑌵𑌧𑌧𑍀𑌰𑌂 𑌤𑌾𑌟𑌕𑌾𑌨𑌾𑌮𑍍𑌨𑍍𑌯𑌾𑌃 𑌰𑌾𑌕𑍍𑌷𑌸𑍍𑌯𑌾𑌃 𑌵𑌧𑍇 𑌹𑌨𑌨𑍇 𑌧𑍀𑌰𑌂 𑌬𑍁𑌦𑍍𑌧𑌿𑌮𑌨𑍍𑌤𑌮𑍍 । 𑌅𑌙𑍍𑌗𑌦𑌨𑌾𑌥𑌵𑌾𑌲𑌿𑌨𑌿𑌷𑍂𑌦𑌨𑌮𑍍 𑌅𑌙𑍍𑌗𑌦𑌨𑌾𑌮𑍍𑌨𑌃 𑌵𑌾𑌨𑌰𑌸𑍍𑌯 𑌨𑌾𑌥𑌃 𑌤𑌾𑌤𑌃 । 𑌤𑌥𑌾𑌭𑍂𑌤𑌶𑍍𑌚 𑌅𑌸𑍌 𑌵𑌾𑌲𑍀 𑌤𑌨𑍍𑌨𑌾𑌮𑌾 𑌅𑌙𑍍𑌗𑌦𑌨𑌾𑌥𑌵𑌾𑌲𑍀 । 𑌤𑌸𑍍𑌯 𑌨𑌿𑌷𑍂𑌦𑌨𑌃 𑌮𑌰𑍍𑌦𑌨𑌃 𑌤𑌮𑍍 । 𑌪𑍈𑌤𑍃𑌕𑍋𑌦𑌿𑌤𑌪𑌾𑌲𑌕𑌂 𑌪𑍈𑌤𑍃𑌕𑌂 𑌪𑌿𑌤𑍁𑌰𑌿𑌦𑌮𑍍 𑌇𑌤𑌿 𑌠𑌞𑍍 𑌉𑌦𑌿𑌤𑌂 𑌵𑌚𑌃 𑌤𑌤𑍍𑌪𑌾𑌲𑌕𑌃 𑌰𑌕𑍍𑌷𑌿𑌤𑌾 𑌤𑌮𑍍 ।

𑌲𑍀𑌲𑌯𑌾 𑌖𑌰𑌦𑍂𑌷𑌣𑌾𑌦𑌿𑌨𑌿𑌶𑌾𑌚𑌰𑌾𑌶𑍁𑌵𑌿𑌨𑌾𑌶𑌨𑌂 𑌰𑌾𑌵𑌣𑌾𑌨𑍍𑌤𑌕𑌮𑌚𑍍𑌯𑍁𑌤𑌂 𑌹𑌰𑌿𑌯𑍂𑌥𑌕𑍋𑌟𑌿𑌸𑌮𑌾𑌵𑍃𑌤𑌮𑍍 ।
𑌨𑍀𑌰𑌜𑌾𑌨𑌨𑌮𑌮𑍍𑌬𑍁𑌜𑌾𑌙𑍍𑌘𑍍𑌰𑌿𑌯𑍁𑌗𑌂 𑌹𑌰𑌿𑌂 𑌭𑍁𑌵𑌨𑌾𑌶𑍍𑌰𑌯𑌂 𑌦𑍇𑌵𑌕𑌾𑌰𑍍𑌯𑌵𑌿𑌚𑌕𑍍𑌷𑌣𑌂 𑌪𑍍𑌰𑌣𑌮𑌾𑌮𑌿 𑌰𑌾𑌘𑌕𑍁𑌞𑍍𑌜𑌰𑌮𑍍 ॥

𑌲𑍀𑌲𑌯𑌾 𑌵𑌿𑌲𑌾𑌸𑍇𑌨 । 𑌖𑌰𑌦𑍂𑌷𑌣𑌾𑌦𑌿𑌨𑌿𑌶𑌾𑌚𑌰𑌾𑌶𑍁𑌵𑌿𑌨𑌾𑌶𑌨𑌂 𑌖𑌰𑌃 𑌦𑍂𑌷𑌣𑌃 𑌤𑌨𑍍𑌨𑌾𑌮𑌾𑌨𑍌 𑌰𑌾𑌕𑍍𑌷𑌸𑍌 𑌤𑍌 𑌆𑌦𑍀 𑌯𑍇𑌷𑌾𑌂 𑌤𑍇 𑌤𑌦𑌾𑌦𑌯𑌃 । 𑌨𑌿𑌶𑌾𑌚𑌰𑌾𑌃 𑌰𑌾𑌕𑍍𑌷𑌸𑌾𑌃 𑌨𑌿𑌶𑌾𑌯𑌾𑌂 𑌰𑌾𑌤𑍍𑌰𑍌 𑌚𑌰𑌤𑍀𑌤𑍍𑌯𑌰𑍍𑌥𑍇 𑌚𑌰𑍇𑌷𑍍𑌟𑌃 𑌇𑌤𑍍𑌯𑌸𑍍𑌮𑌾𑌤𑍍 𑌟𑌃 𑌇𑌤𑌿 𑌪𑍍𑌰𑌤𑍍𑌯𑌬𑌲𑌾𑌤𑍍 𑌨𑌿𑌶𑌾𑌚𑌰𑌃 । 𑌤𑍇𑌷𑌾𑌂 𑌆𑌶𑍁𑌵𑌿𑌨𑌾𑌶𑌨𑌃 𑌶𑍍𑌰𑍀𑌘𑍍𑌰𑌘𑌾𑌤𑌕𑌃 𑌤𑌮𑍍 । 𑌰𑌾𑌵𑌣𑌾𑌨𑍍𑌤𑌕𑌂 𑌦𑌶𑌕𑌣𑍍𑌠𑌮𑍃𑌤𑍍𑌯𑍁𑌕𑌾𑌰𑌕𑌮𑍍 । 𑌅𑌚𑍍𑌯𑍁𑌤𑌂 𑌨 𑌚𑍍𑌯𑍁𑌤𑌃 𑌪𑌤𑌿𑌤𑌃 𑌪𑌰𑌤𑍍𑌵𑌾𑌦𑌿𑌤𑌿 𑌅𑌚𑍍𑌯𑍁𑌤𑌃 𑌤𑌮𑍍 । 𑌹𑌰𑌿𑌯𑍂𑌥𑌕𑍋𑌟𑌿𑌸𑌮𑌾𑌵𑍃𑌤𑌂 𑌹𑌰𑍀𑌣𑌾𑌂 𑌕𑌪𑍀𑌨𑌾𑌂 𑌯𑍂𑌥𑌾𑌨𑌾𑌂 𑌗𑌣𑌾𑌨𑌾𑌂 𑌕𑍋𑌟𑌿𑌭𑌿𑌃 𑌶𑌤𑌶𑌃 𑌲𑌕𑍍𑌷𑍈𑌃 𑌸𑌮𑌾𑌵𑍃𑌤𑌮𑍍 𑌆𑌵𑍇𑌷𑍍𑌟𑌿𑌤𑌮𑍍 । 𑌨𑍀𑌰𑌜𑌾𑌨𑌨𑌂 𑌨𑍀𑌰𑌜𑌂 𑌕𑌮𑌲𑌪𑍁𑌷𑍍𑌪𑌮𑍍 𑌇𑌵 𑌆𑌨𑌨𑌂 𑌮𑍁𑌖𑌂 𑌯𑌸𑍍𑌯 𑌤𑌂 𑌕𑌮𑌲𑌮𑍁𑌖𑌮𑍍 । 𑌅𑌮𑍍𑌬𑍁𑌜𑌾𑌙𑍍𑌘𑍍𑌰𑌿𑌯𑍁𑌗𑌂 𑌅𑌮𑍍𑌬𑍁𑌜𑍇 𑌕𑌮𑌲𑌪𑍁𑌷𑍍𑌪𑍇 𑌇𑌵 𑌅𑌙𑍍𑌘𑍍𑌰𑌿𑌯𑍁𑌗𑌂 𑌪𑌦𑌦𑍍𑌵𑌯𑌂 𑌪𑌾𑌦𑍌 𑌯𑌸𑍍𑌯 𑌤𑌂 𑌕𑌮𑌲𑌚𑌰𑌣𑌮𑍍 । 𑌹𑌰𑌿𑌂 𑌵𑌿𑌷𑍍𑌣𑍁𑌂 𑌹𑌰𑌤𑌿 𑌪𑌾𑌪𑌾𑌨𑍀𑌤𑍍𑌯𑌰𑍍𑌥𑍇 𑌹𑍃𑌪𑌿𑌷𑌿𑌰𑍁𑌹𑌿𑌵𑍃𑌤𑌿𑌵𑌿𑌦𑌿𑌛𑌿𑌦𑌿𑌕𑍀𑌰𑍍𑌤𑌿𑌭𑍍𑌯𑌶𑍍𑌚𑍇𑌤𑌿 𑌇𑌨𑍍 𑌇𑌤𑌿 𑌪𑍍𑌰𑌤𑍍𑌯𑌯𑌬𑌾𑌤𑍍 𑌹𑌰𑌿𑌃 𑌤𑌮𑍍 । 𑌭𑍁𑌵𑌨𑌾𑌶𑍍𑌰𑌯𑌂 𑌲𑍋𑌕𑌶𑌰𑌣𑍍𑌯𑌮𑍍 । 𑌦𑍇𑌵𑌕𑌾𑌰𑍍𑌯𑌵𑌿𑌚𑌕𑍍𑌷𑌣𑌂 𑌦𑍇𑌵𑌾𑌨𑌾𑌂 𑌸𑍁𑌰𑌾𑌣𑌾𑌂 𑌕𑌾𑌰𑍍𑌯𑍇𑌷𑍁 𑌪𑌾𑌲𑌨𑌵𑌰𑍍𑌧𑌨𑌾𑌦𑌿𑌷𑍁 𑌵𑌿𑌚𑌕𑍍𑌷𑌣𑌃 𑌮𑌨𑍀𑌷𑍀 𑌤𑌮𑍍 ।

𑌕𑍌𑌶𑌿𑌕𑍇𑌨 𑌸𑍁𑌶𑌿𑌕𑍍𑌷𑌿𑌤𑌾𑌸𑍍𑌤𑍍𑌰𑌕𑌲𑌾𑌪𑌮𑌾𑌯𑌤𑌲𑍋𑌚𑌨𑌂 𑌚𑌾𑌰𑍁𑌹𑌾𑌸𑌮𑌨𑌾𑌥𑌬𑌮𑍍𑌨𑍍𑌧𑍁𑌮𑌶𑍇𑌷𑌲𑍋𑌕𑌨𑌿𑌵𑌾𑌸𑌿𑌨𑌮𑍍 ।
𑌵𑌾𑌸𑌵𑌾𑌦𑌿𑌸𑍁𑌰𑌾𑌰𑌿𑌰𑌾𑌵𑌣𑌶𑌾𑌸𑌨𑌂 𑌚 𑌪𑌰𑌾𑌂 𑌗𑌤𑌿𑌂 𑌨𑍀𑌲𑌮𑍇𑌘𑌨𑌿𑌭𑌾𑌕𑍃𑌤𑌿𑌂 𑌪𑍍𑌰𑌣𑌮𑌾𑌮𑌿 𑌰𑌾𑌘𑌵𑌕𑍁𑌞𑍍𑌜𑌰𑌮𑍍 ॥

𑌕𑍌𑌶𑌿𑌕𑍇𑌨 𑌵𑌿𑌶𑍍𑌵𑌾𑌮𑌿𑌤𑍍𑌰𑍇𑌣 𑌮𑌹𑌰𑍍𑌷𑌿𑌣𑌾 । 𑌸𑍁𑌶𑌿𑌕𑍍𑌷𑌿𑌤𑌾𑌸𑍍𑌤𑍍𑌰𑌕𑌲𑌾𑌪𑌂 𑌸𑍁𑌸𑌿𑌕𑍍𑌷𑌿𑌤𑌃 𑌸𑍁𑌷𑍍𑌠𑍁 𑌬𑍋𑌧𑌿𑌤𑌃 𑌅𑌸𑍍𑌤𑍍𑌰𑌾𑌣𑌾𑌮𑍍 𑌆𑌯𑍁𑌧𑌾𑌨𑌾𑌂 𑌕𑌲𑌾𑌪𑌃 𑌸𑌂𑌹𑌤𑌿𑌃 𑌯𑌸𑍍𑌮𑍈 𑌸𑌃 । 𑌶𑌿𑌕𑍍𑌷𑌣𑌕𑍍𑌰𑌿𑌯𑌾𑌯𑌾𑌃 𑌦𑍍𑌵𑌯𑍋𑌃 𑌕𑌰𑍍𑌮𑌣𑍋𑌃 𑌸𑌤𑍋𑌃 𑌕𑌰𑍍𑌮𑌣𑌿 𑌪𑍍𑌰𑌯𑍋𑌗𑍇 𑌗𑍌𑌣𑌕𑌰𑍍𑌮𑍀𑌭𑍂𑌤𑌸𑍍𑌯 𑌰𑌾𑌮𑌸𑍍𑌯 𑌏𑌵 𑌶𑌿𑌕𑍍𑌷𑌿𑌤𑌤𑍍𑌵𑍇 𑌸𑌿𑌦𑍍𑌧𑍇 𑌶𑌿𑌕𑍍𑌷𑌿𑌤𑌪𑌦𑌪𑍂𑌰𑍍𑌵𑌃 𑌬𑌹𑍁𑌵𑍍𑌰𑍀𑌹𑌿𑌸𑌮𑌾𑌸𑌃 𑌅𑌬𑌾𑌧𑌿𑌷𑍍𑌯𑌤 । 𑌅𑌤𑌃 𑌶𑌿𑌕𑍍𑌷𑌣𑌪𑌾𑌤𑍍𑌰𑍇 𑌰𑌾𑌮𑍇 𑌸𑌮𑍍𑌪𑍍𑌰𑌦𑌾𑌨𑌕𑌾𑌰𑌕𑌤𑍍𑌵𑌮𑍍 𑌆𑌰𑍋𑌪𑍍𑌯 𑌤𑌸𑍍𑌯 𑌚𑌤𑍁𑌰𑍍𑌥𑍀𑌵𑌿𑌭𑌕𑍍𑌤𑌿𑌸𑌮𑍍𑌪𑌾𑌦𑌨𑍇𑌨 𑌬𑌹𑍁𑌵𑍍𑌰𑍀𑌹𑌿𑌸𑌮𑌾𑌸𑌃 𑌸𑌾𑌧𑍍𑌯𑍋 𑌭𑌵𑌤𑌿 । 𑌚𑌾𑌰𑍁𑌹𑌾𑌸𑌂 𑌚𑌾𑌰𑍁𑌃 𑌹𑌾𑌸𑍋 𑌯𑌸𑍍𑌯 𑌸𑌃 𑌰𑍁𑌚𑌿𑌰𑌸𑍍𑌮𑌿𑌤𑌃 𑌤𑌮𑍍 । 𑌅𑌨𑌾𑌥𑌬𑌨𑍍𑌧𑍁𑌮𑍍 𑌅𑌨𑌾𑌥𑌾𑌨𑌾𑌂 𑌵𑌿𑌧𑍁𑌰𑌾𑌣𑌾𑌂 𑌬𑌨𑍍𑌧𑍁𑌃 𑌜𑍍𑌨𑌾𑌤𑌿𑌃 𑌤𑌮𑍍 । 𑌅𑌶𑍇𑌷𑌲𑍋𑌕𑌨𑌿𑌵𑌾𑌸𑌿𑌨𑌂 𑌸𑌰𑍍𑌵𑌵𑍍𑌯𑌾𑌪𑌿𑌨𑌮𑍍 । 𑌵𑌾𑌸𑌵𑌾𑌦𑌿𑌸𑍁𑌰𑌾𑌰𑌿𑌰𑌾𑌵𑌣𑌶𑌾𑌸𑌨𑌂 𑌵𑌾𑌸𑌵𑌸𑍍𑌯 𑌇𑌨𑍍𑌦𑍍𑌰𑌸𑍍𑌯 𑌅𑌰𑌿𑌃 𑌵𑍈𑌰𑍀 𑌤𑌥𑌾𑌭𑍂𑌤𑌃 𑌰𑌾𑌵𑌣𑌃 𑌤𑌨𑍍𑌨𑌾𑌮𑌾𑌸𑍁𑌰𑌃 𑌤𑌸𑍍𑌯 𑌶𑌾𑌸𑌨𑌂 𑌦𑌣𑍍𑌡𑌕𑌰𑍍𑌤𑌾𑌰𑌮𑍍 । 𑌚𑌕𑌾𑌰𑌃 𑌅𑌪𑍍𑌯𑌰𑍍𑌥𑍇 । 𑌪𑌰𑌾𑌂 𑌗𑌤𑌿𑌂 𑌜𑍀𑌵𑌾𑌨𑌾𑌂 𑌪𑌰𑌾𑌯𑌣𑌮𑍍 । 𑌨𑍀𑌲𑌮𑍇𑌘𑌨𑌿𑌭𑌾𑌕𑍃𑌤𑌿𑌂 𑌨𑍀𑌲𑌮𑍇𑌘𑌃 𑌕𑌾𑌲𑌾𑌮𑍍𑌬𑍁𑌦𑌃 𑌤𑍇𑌨 𑌸𑌦𑍃𑌶𑍀 𑌆𑌕𑍃𑌤𑌿𑌃 𑌆𑌕𑌾𑌰𑌃 𑌯𑌸𑍍𑌯 𑌸𑌃 𑌤𑌮𑍍 ।

𑌰𑌾𑌘𑌵𑌾𑌷𑍍𑌟𑌕𑌮𑌿𑌷𑍍𑌟𑌸𑌿𑌦𑍍𑌧𑌿𑌦𑌮𑌚𑍍𑌯𑍁𑌤𑌾𑌲𑌯𑌸𑌾𑌧𑌕𑌂 𑌭𑌕𑍍𑌤𑌿𑌮𑍁𑌕𑍍𑌤𑌿𑌫𑌲𑌪𑍍𑌰𑌦𑌂 𑌧𑌨𑌧𑌾𑌨𑍍𑌯𑌪𑍁𑌤𑍍𑌰𑌵𑌿𑌵𑌰𑍍𑌧𑌨𑌮𑍍 ।
𑌰𑌾𑌮𑌚𑌨𑍍𑌦𑍍𑌰𑌕𑍃𑌪𑌾𑌕𑌟𑌾𑌕𑍍𑌷𑌦𑌮𑌾𑌦𑌰𑍇𑌣 𑌸𑌦𑌾 𑌪𑌠𑍇𑌦𑍍𑌰𑌾𑌮𑌚𑌨𑍍𑌦𑍍𑌰𑌪𑌦𑌾𑌮𑍍𑌬𑍁𑌜𑌦𑍍𑌵𑌯𑌸𑌨𑍍𑌤𑌤𑌾𑌰𑍍𑌪𑌿𑌤𑌮𑌾𑌨𑌸𑌃 ॥

𑌅𑌥 𑌫𑌲𑌶𑍍𑌰𑍁𑌤𑌿𑌃 । 𑌰𑌾𑌘𑌵𑌾𑌷𑍍𑌟𑌕𑌮𑍍 𑌰𑌾𑌮𑌸𑍍𑌯 𑌅𑌷𑍍𑌟𑌾𑌭𑌿𑌃 𑌶𑍍𑌲𑍋𑌕𑍈𑌃 𑌕𑍍𑌰𑌤𑌂 𑌸𑍍𑌤𑍋𑌤𑍍𑌰𑌮𑌿𑌦𑌮𑍍 𑌇𑌷𑍍𑌟𑌸𑌿𑌦𑍍𑌧𑌿𑌦𑌮𑍍 𑌇𑌷𑍍𑌟𑌾 𑌵𑌾𑌞𑍍𑌛𑌿𑌤𑌾 𑌸𑌿𑌦𑍍𑌧𑌿𑌃 𑌭𑍂𑌤𑌿𑌃 𑌤𑌦𑍍𑌦𑌂 𑌦𑌾𑌤𑍁𑌂 𑌯𑍋𑌗𑍍𑌯𑌮𑍍 । 𑌅𑌚𑍍𑌯𑍁𑌤𑌾𑌲𑌯𑌸𑌾𑌧𑌕𑌂 𑌅𑌚𑍍𑌯𑍁𑌤𑌸𑍍𑌯 𑌨𑌾𑌰𑌾𑌯𑌣𑌸𑍍𑌯 𑌆𑌲𑌯𑌸𑍍𑌯 𑌸𑌦𑌨𑌸𑍍𑌯 𑌵𑍈𑌕𑍁𑌣𑍍𑌠𑌸𑍍𑌯 𑌸𑌾𑌧𑌕𑌮𑍍 𑌪𑍍𑌰𑌾𑌪𑍍𑌤𑍍𑌯𑍁𑌪𑌕𑌰𑌣𑌮𑍍 । 𑌭𑍁𑌕𑍍𑌤𑌿𑌮𑍁𑌕𑍍𑌤𑌿𑌫𑌲𑌪𑍍𑌰𑌦𑌂 𑌭𑍁𑌕𑍍𑌤𑌿𑌃 𑌭𑍋𑌗𑌃 𑌏𑌹𑌿𑌕𑍀 𑌜𑍁𑌷𑍍𑌟𑌿𑌃 𑌮𑍁𑌕𑍍𑌤𑌿𑌃 𑌮𑍋𑌕𑍍𑌷𑌃 𑌪𑌾𑌰𑌲𑍌𑌕𑌿𑌕𑍀 𑌜𑍁𑌷𑍍𑌟𑌿𑌃 𑌤𑍇 𑌏𑌵 𑌫𑌲𑍇 𑌤𑌤𑍍𑌪𑍍𑌰𑌦𑌂 𑌪𑍍𑌰𑌦𑌾𑌤𑍁𑌂 𑌯𑍋𑌗𑍍𑌯𑌮𑍍 । 𑌧𑌨𑌧𑌾𑌨𑍍𑌯𑌪𑍁𑌤𑍍𑌰𑌵𑌿𑌵𑌰𑍍𑌧𑌨𑌂 𑌧𑌨𑌂 𑌵𑌸𑍁 𑌧𑌾𑌨𑍍𑌯𑌂 𑌵𑍍𑌰𑌿𑌹𑍍𑌯𑌾𑌦𑍀𑌨𑌿 𑌪𑍁𑌤𑍍𑌰𑌾𑌃 𑌅𑌪𑌤𑍍𑌯𑌾𑌨𑌿 𑌤𑍇𑌷𑌾𑌂 𑌵𑌿𑌵𑌰𑍍𑌧𑌨𑌮𑍍 𑌵𑍃𑌦𑍍𑌧𑌿𑌕𑌰𑌮𑍍 । 𑌰𑌾𑌮𑌚𑌨𑍍𑌦𑍍𑌰𑌕𑍃𑌪𑌾𑌕𑌟𑌾𑌕𑍍𑌷𑌦𑌂 𑌰𑌾𑌮𑌚𑌨𑍍𑌦𑍍𑌰𑌸𑍍𑌯 𑌰𑌾𑌘𑌵𑌸𑍍𑌯 𑌕𑍃𑌪𑌾𑌯𑌾𑌃 𑌦𑌯𑌾𑌯𑌾𑌃 𑌕𑌟𑌾𑌕𑍍𑌷𑌃 𑌅𑌪𑌾𑌙𑍍𑌗𑌦𑌰𑍍𑌶𑌨𑌂 𑌤𑌦𑍍𑌦𑌂 𑌦𑌾𑌤𑍁𑌂 𑌯𑍋𑌗𑍍𑌯𑌮𑍍 । 𑌆𑌦𑌰𑍇𑌣 𑌸𑌮𑍍𑌮𑌾𑌨𑍇𑌨 𑌸𑌦𑌾 𑌸𑌰𑍍𑌵𑌦𑌾 𑌪𑌠𑍇𑌤𑍍 𑌅𑌧𑍀𑌯𑍀𑌤 । 𑌜𑌨𑌃 𑌇𑌤𑌿 𑌶𑍇𑌷𑌃 । 𑌰𑌾𑌮𑌚𑌨𑍍𑌦𑍍𑌰𑌪𑌦𑌾𑌮𑍍𑌬𑍁𑌜𑌦𑍍𑌵𑌯𑌸𑌨𑍍𑌤𑌤𑌾𑌰𑍍𑌪𑌿𑌤𑌮𑌾𑌨𑌸𑌃 । 𑌰𑌾𑌮𑌚𑌨𑍍𑌦𑍍𑌰𑌃 𑌰𑌾𑌮𑌃 𑌚𑌨𑍍𑌦𑍍𑌰 𑌇𑌵 । 𑌤𑌸𑍍𑌯 𑌪𑌦𑌂 𑌚𑌰𑌣𑌃 𑌅𑌮𑍍𑌬𑍁𑌜𑌂 𑌕𑌮𑌲𑌪𑍁𑌷𑍍𑌪𑌮𑍍 𑌇𑌵 𑌪𑌦𑌾𑌮𑍍𑌬𑍁𑌜𑌮𑍍 । 𑌤𑌸𑍍𑌯 𑌦𑍍𑌵𑌯𑌂 𑌯𑍁𑌗𑌲𑌮𑍍 । 𑌤𑌸𑍍𑌮𑌿𑌨𑍍 𑌸𑌨𑍍𑌤𑌤𑌂 𑌸𑌦𑌾 𑌅𑌰𑍍𑌪𑌿𑌤𑌂 𑌦𑌤𑍍𑌤𑌂 𑌮𑌾𑌨𑌸𑌂 𑌚𑍇𑌤𑌃 𑌯𑌸𑍍𑌯 𑌸𑌃 𑌦𑌤𑍍𑌤𑌚𑍇𑌤𑌾𑌃 । 𑌤𑌥𑌾𑌭𑍂𑌤𑌃 𑌸𑌨𑍍 𑌪𑌠𑍇𑌦𑌿𑌤𑌿 𑌯𑌾𑌵𑌤𑍍 ।

॥ 𑌶𑌮𑍍 ॥