𑌐𑌸𑍋𑌪𑌸𑍍𑌯 𑌕𑌥𑍇 𑌸𑌂𑌸𑍍𑌕𑍃𑌤𑍇𑌨𑌾𑌨𑍂𑌦𑌿𑌤𑍇

Tue, 16 Feb, 2021•ambarish

𑌅𑌨𑍁𑌵𑌾𑌦𑌾𑌭𑍍𑌯𑌾𑌸𑍇 𑌕𑌸𑍍𑌮𑌿𑌂𑌶𑍍𑌚𑌿𑌦𑍍𑌭𑌾𑌗𑌮𑌵𑌹𑌮𑍍 । 𑌖𑍍𑌯𑌾𑌤𑌸𑍍𑌯 𑌯𑌵𑌨𑌕𑌥𑌾𑌚𑌾𑌰𑍍𑌯𑌸𑍍𑌯 𑌐𑌸𑍋𑌪𑌸𑍍𑌯 𑌕𑌥𑍇 𑌅𑌨𑍂𑌦𑌿𑌤𑍇 𑌮𑌯𑌾 ।

𑌮𑌣𑍍𑌡𑍂𑌕𑌵𑍃𑌷𑌮𑍍

𑌮𑌣𑍍𑌡𑍂𑌕𑌾𑌃 𑌵𑍃𑌷𑌶𑍍𑌚 𑌇𑌤𑌿 𑌕𑌥𑌾𑌯𑌾𑌃 𑌆𑌙𑍍𑌗𑍍𑌲𑍇𑌯𑌾𑌨𑍁𑌵𑌾𑌦𑌃 । 𑌤𑌮𑌨𑍁𑌵𑌾𑌦𑌮𑌾𑌶𑍍𑌰𑌿𑌤𑍍𑌯 𑌪𑍁𑌨𑌰𑌨𑍁𑌵𑌾𑌦𑌃 𑌉𑌪𑌰𑌿 ।

𑌅𑌨𑌡𑍍𑌵𑌾𑌂𑌸𑍍𑌕𑌶𑍍𑌚𑌿𑌦𑌾𑌯𑌾𑌤𑌸𑍍𑌤𑍃𑌣𑌾𑌚𑍍𑌛𑌨𑍍𑌨𑌂 𑌮𑌹𑌾𑌸𑌰𑌃 ।
𑌦𑍀𑌰𑍍𑌘𑌕𑌾𑌲𑌾𑌤𑍍𑌪𑌰𑌿𑌶𑍍𑌰𑌾𑌨𑍍𑌤𑌃 𑌕𑍍𑌷𑍁𑌤𑍍𑌕𑍍𑌷𑌾𑌮𑍇𑌣 𑌚 𑌪𑍀𑌡𑌿𑌤𑌃 ॥

𑌜𑌲𑌾𑌮𑍃𑌤𑌂 𑌵𑌿𑌪𑌶𑍍𑌯𑌂𑌸𑍍𑌤𑌦𑌾𑌶𑍁 𑌸𑌰𑌸𑌿 𑌪𑍁𑌪𑍍𑌲𑍁𑌵𑍇 ।
𑌕𑍍𑌰𑍀𑌡𑌨𑍍𑌤𑌂 𑌬𑌾𑌲𑌭𑍇𑌕𑌂 𑌸 𑌸𑍍𑌵𑌭𑌾𑌰𑍇𑌣 𑌵𑌿𑌮𑌮𑍍𑌰𑌦𑍇 ॥

𑌅𑌥 𑌭𑍇𑌕𑌮𑌹𑌾𑌰𑌾𑌜𑍍𑌞𑍀 𑌵𑍃𑌦𑍍𑌧𑌾 𑌸𑌰𑍍𑌵𑍈𑌃 𑌸𑍁𑌵𑌨𑍍𑌦𑌿𑌤𑌾 ।
𑌦𑍍𑌰𑌷𑍍𑌟𑍁𑌕𑌾𑌮𑌾 𑌪𑍍𑌰𑌿𑌯𑌂 𑌬𑌾𑌲𑌮𑌾𑌪𑍍𑌤𑌬𑌨𑍍𑌧𑍂𑌨𑍍𑌵𑍍𑌯𑌚𑌾𑌰𑌯𑌤𑍍 ॥

𑌤𑍇𑌷𑍍𑌵𑌨𑍍𑌯𑌤𑌮𑍋𑌵𑌾𑌦𑍀𑌦𑍍𑌦𑍁𑌰𑍍𑌵𑌾𑌰𑍍𑌤𑌾𑌂 𑌹𑍃𑌦𑌯𑌙𑍍𑌗𑌮𑌾𑌮𑍍 ॥
𑌬𑍃𑌹𑌦𑍍𑌭𑍂𑌤𑍇𑌨 𑌘𑍋𑌰𑍇𑌣 𑌸 𑌪𑌦𑍍𑌭𑍍𑌯𑌾𑌂 𑌹𑌨𑍍𑌤 𑌚𑍂𑌰𑍍𑌣𑌿𑌤𑌃 ॥

𑌤𑌚𑍍𑌛𑍍𑌰𑍁𑌤𑍍𑌵𑌾 𑌵𑍃𑌦𑍍𑌧𑌮𑌣𑍍𑌡𑍂𑌕𑌾 𑌜𑌾𑌤𑌾 𑌶𑍋𑌕𑌸𑌮𑌨𑍍𑌵𑌿𑌤𑌾 ।
𑌅𑌪𑌿 𑌜𑌿𑌜𑍍𑌞𑌾𑌸𑌯𑌾 𑌤𑌸𑍍𑌯𑌾 𑌮𑌨𑍋𑌕𑍌𑌤𑍂𑌹𑌲𑌾𑌯𑌤 ॥

𑌶𑌶𑌾𑌸 𑌬𑌨𑍍𑌧𑍁𑌭𑍇𑌕𑌂 𑌸𑌾 𑌭𑍂𑌤𑌮𑌾𑌨𑌂 𑌕𑌿𑌯𑌦𑍍𑌵𑌦 ।
𑌤𑌤𑌃 𑌶𑌰𑍀𑌰𑌮𑌾𑌧𑍍𑌮𑌾𑌯 𑌹𑍍𑌯𑍁𑌪𑌮𑌾𑌤𑍁𑌂 𑌤𑌮𑌾𑌦𑌿𑌶𑌤𑍍 ॥

𑌬𑌨𑍍𑌧𑍁𑌂 𑌪𑍃𑌷𑍍𑌟𑍍𑌵𑌾 𑌚 𑌸𑌾 𑌤𑍇𑌨 𑌤𑌤 𑌊𑌰𑍍𑌧𑍍𑌵𑌮𑌿𑌤𑍀𑌰𑌿𑌤𑌾 ।
𑌵𑌾𑌰𑌂 𑌵𑌰𑍍𑌧𑌿𑌤𑌦𑍇𑌹𑌾 𑌸𑌾 𑌭𑍂𑌤𑌦𑍇𑌹𑌾𑌭𑌿𑌭𑌾𑌵𑌿𑌤𑌾 ॥

𑌕𑌥𑌂 𑌨𑌾𑌮𑌾𑌤𑌿𑌰𑌿𑌕𑍍𑌤𑌂 𑌤𑌨𑍍𑌮𑌾𑌮𑍁𑌤𑍍𑌤𑍁𑌙𑍍𑌗𑌾𑌂 𑌘𑌨𑌂𑌲𑌿𑌹𑌾𑌂 ।
𑌇𑌤𑍍𑌯𑌵𑌿𑌶𑍍𑌵𑌸𑍍𑌯 𑌤𑌦𑍍𑌵𑌾𑌕𑍍𑌯𑍇 𑌕𑌾𑌯𑌂 𑌦𑌧𑍍𑌮𑍌 𑌪𑍁𑌨𑌃 𑌪𑍁𑌨𑌃 ॥

𑌕𑍍𑌷𑌣𑍇𑌨 𑌬𑌤 𑌮𑌣𑍍𑌡𑍂𑌕𑌾𑌭𑌵𑌦𑍍𑌵𑌿𑌸𑍍𑌫𑍋𑌟𑌦𑍇𑌹𑌕𑌾 ।
𑌵𑍃𑌷𑌮𑌣𑍍𑌡𑍂𑌕𑌵𑍃𑌤𑍍𑌤𑌾𑌨𑍍𑌤𑌾𑌤𑍍𑌤𑍍𑌯𑌜𑍍𑌯𑍇𑌦𑌦𑌗𑍍𑌧𑌦𑌾𑌹𑌨𑌮𑍍 ॥

𑌮𑌾𑌰𑍍𑌜𑌾𑌰𑌘𑌣𑍍𑌟𑌾𑌬𑌨𑍍𑌧𑌮𑍍

𑌮𑌾𑌰𑍍𑌜𑌾𑌰𑍍𑌯𑌾𑌂 𑌘𑌣𑍍𑌟𑌾𑌵𑌨𑍍𑌧𑌨𑌮𑍍 𑌇𑌤𑌿 𑌕𑌥𑌾𑌯𑌾𑌃 𑌆𑌙𑍍𑌗𑍍𑌲𑍇𑌯𑌾𑌨𑍁𑌵𑌾𑌦𑌃 । 𑌤𑌮𑌨𑍁𑌵𑌾𑌦𑌮𑌾𑌶𑍍𑌰𑌿𑌤𑍍𑌯 𑌪𑍁𑌨𑌰𑌨𑍁𑌵𑌾𑌦𑌃 𑌉𑌪𑌰𑌿 ।

𑌅𑌥 𑌬𑍈𑌡𑌾𑌲𑌪𑍀𑌡𑌾𑌰𑍍𑌤𑌾 𑌮𑍂𑌷𑌕𑌾𑌃 𑌶𑌤𑍍𑌰𑍁𑌹𑌿𑌂𑌸𑌿𑌤𑌾𑌃 ।
𑌉𑌪𑌾𑌯𑌾𑌂𑌶𑍍𑌚𑌿𑌨𑍍𑌤𑌯𑌾𑌮𑌾𑌸𑍁𑌰𑍇𑌕𑍀𑌭𑍂𑌯 𑌧𑍍𑌰𑍁𑌵𑌾𑌨𑍍𑌵𑌰𑌾𑌨𑍍 ॥

𑌮𑌾𑌰𑍍𑌜𑌾𑌰𑍀𑌨𑌖𑌦𑍁𑌰𑍍𑌗𑍍𑌰𑌸𑍍𑌤𑍈𑌃 𑌸𑌰𑍍𑌵𑌤𑍋𑌭𑌯𑌮𑌾𑌨𑌸𑍈𑌃 ।
𑌅𑌹𑌰𑍍𑌨𑌿𑌶𑌂 𑌬𑌿𑌲𑍇 𑌬𑌦𑍍𑌧𑍈𑌰𑍍𑌯𑍁𑌕𑍍𑌤𑌿𑌃 𑌕𑌾𑌚𑌿𑌦𑌭𑍀𑌪𑍍𑌸𑌿𑌤𑌾 ॥

𑌮𑌾𑌰𑍍𑌜𑌾𑌰𑍍𑌯𑌾 𑌮𑍋𑌚𑌨𑍋𑌪𑌾𑌯𑍋 𑌦𑍁𑌰𑍍𑌲𑌭 𑌇𑌤𑍍𑌯𑌵𑍇𑌤𑍍𑌯 𑌚 ।
𑌆𑌗𑌮𑌜𑍍𑌞𑌾𑌨𑌸𑌙𑍍𑌕𑍇𑌤𑌂 𑌬𑌿𑌡𑌾𑌲𑍍𑌯𑌾𑌸𑍍𑌤𑍇 𑌪𑍍𑌰𑌪𑍇𑌦𑌿𑌰𑍇 ॥

𑌸𑌙𑍍𑌕𑍇𑌤𑌯𑌿𑌤𑍁𑌮𑌾𑌯𑌾𑌤𑌿𑌂 𑌵𑌿𑌵𑌿𑌧𑌾 𑌯𑍋𑌜𑌨𑌾𑌃 𑌕𑍃𑌤𑌾𑌃 ।
𑌨 𑌤𑌾𑌸𑍍𑌵𑍇𑌕𑌾𑌪𑌿 𑌨𑌿𑌶𑍍𑌚𑍇𑌤𑍁𑌂 𑌮𑌨𑌶𑍍𑌚𑌕𑍍𑌰𑌿𑌰 𑌆𑌖𑌵𑌃 ॥

𑌚𑌿𑌰𑌕𑌾𑌲𑌵𑌿𑌵𑌾𑌦𑌾𑌨𑍍𑌤𑍇 𑌬𑌾𑌲𑌾𑌖𑍁𑌸𑍍𑌤𑍁 𑌸𑌮𑍁𑌤𑍍𑌥𑌿𑌤𑌃 ।
𑌉𑌵𑌾𑌚 𑌸𑌰𑌲𑌾𑌂 𑌯𑍁𑌕𑍍𑌤𑌿𑌂 𑌸𑌫𑌲𑌾𑌶𑍀𑌰𑍍𑌵𑌚𑌾𑌂𑌸𑌿 𑌚 ॥

𑌓𑌤𑍋𑌃 𑌕𑌣𑍍𑌠𑍇 𑌮𑌣𑌿𑌰𑍍𑌬𑌨𑍍𑌧𑍍𑌯𑍋 𑌹𑍍𑌯𑌸𑍍𑌮𑌚𑍍𑌛𑌤𑍍𑌰𑍋𑌰𑍍𑌮𑌹𑌾𑌸𑍍𑌵𑌨𑌃 ।
𑌤𑌸𑍍𑌯𑌾𑌮𑌾𑌕𑍍𑌰𑌮𑌮𑌾𑌣𑌾𑌯𑌾𑌂 𑌜𑌾𑌨𑍀𑌯𑌾𑌮 𑌮𑌣𑌿𑌧𑍍𑌵𑌨𑍇𑌃 ॥

𑌆𑌶𑍍𑌚𑌰𑍍𑌯𑌚𑌕𑌿𑌤𑍇 𑌵𑍃𑌨𑍍𑌦𑍇 𑌮𑍋𑌦𑌮𑌾𑌨𑍇 𑌮𑍁𑌜𑍇𑌷𑌣𑍇 ।
𑌕𑌾𑌚𑌿𑌜𑍍𑌜𑍀𑌰𑍍𑌣𑌾𑌖𑍁𑌰𑌾𑌚𑌷𑍍𑌟 𑌕𑍋𑌣𑌾𑌦𑍍𑌧𑍀𑌨𑌸𑍍𑌵𑌰𑌾𑌙𑍍𑌕𑌿𑌤𑌾 ॥

𑌅𑌭𑌿𑌨𑌨𑍍𑌦𑌾𑌮𑌿 𑌬𑌾𑌲𑌾𑌖𑍁𑌂 𑌯𑍁𑌕𑍍𑌤𑌿𑌸𑍍𑌤𑍁 𑌚𑌤𑍁𑌰𑌾 𑌵𑌰𑌾 ।
𑌤𑌤𑍍𑌪𑍃𑌚𑍍𑌛𑌾𑌮𑌿 𑌗𑌲𑍇 𑌹𑍍𑌰𑍀𑌕𑍋𑌰𑍍𑌮𑌣𑌿𑌃 𑌕𑍇𑌨 𑌚 𑌭𑌨𑍍𑌤𑍍𑌸𑍍𑌯𑌤𑍇 ॥

𑌵𑌾𑌕𑍍𑌯𑌮𑌾𑌤𑍍𑌰𑌪𑍍𑌰𑌦𑌾𑌨𑍇𑌨 𑌸𑌾𑌫𑌲𑍍𑌯𑌂 𑌨 𑌹𑌿 𑌲𑌭𑍍𑌯𑌤𑍇 ।
𑌦𑍁𑌃𑌸𑌾𑌧𑍍𑌯𑌕𑌦𑍁𑌪𑌾𑌯𑌸𑍍𑌯 𑌵𑍍𑌯𑌾𑌖𑍍𑌯𑌾𑌨𑍈𑌕𑍇𑌨 𑌕𑌿𑌂 𑌫𑌲𑌮𑍍 ॥

॥ 𑌶𑌮𑍍 ॥